ភ្នំពេញៈ តម្លៃពោតក្រហមនៅខេត្តបាត់ដំបងនាដើមរដូវប្រមូលផលលើកទី១ ឆ្នាំនេះបានកើនឡើងគួរឱ្យកត់សម្គាល់ ប៉ុន្តែសម្រាប់បរិមាណនាំចេញផ្លូវការដែលបានកត់ត្រា គឺធ្លាក់ចុះខ្លះបើធៀបនឹងរយៈពេលដូចគ្នាឆ្នាំមុន។ នេះបើយោងតាមប្រធានមន្ទីរពាណិជ្ជកម្មខេត្តបាត់ដំបង។
ជារៀងរាល់ឆ្នាំការប្រមូលផលពោតក្រហមបានធ្វើឡើងចំនួន ២ លើក ដោយលើកទី១ ចាប់ពីដើមខែកក្កដា ដល់ខែសីហា និងលើកទី២ ចាប់ពីចុងខែតុលា ដល់ខែកុម្ភៈ។
ប្រធានមន្ទីរពាណិជ្ជកម្មខេត្តបាត់ដំបង លោក គឹម ហួត បានប្រាប់ ភ្នំពេញ ប៉ុស្តិ៍ នាថ្ងៃទី ២៦ ខែកក្កដាថា ទោះបីការប្រមូលផលពេលនេះទើបសម្រេចបានចន្លោះ ១០-១៥ ភាគរយ ប៉ុន្តែលោកសង្កេតឃើញថា តម្លៃពោតក្រហម (សើម) នាពេលនេះបានកើនជាង ២០ ភាគរយបើធៀបនឹងរយៈពេលដូចគ្នាឆ្នាំមុន ដោយមានតម្លៃជាមធ្យម ៧០០ រៀលក្នុង ១ គីឡូក្រាម កើនពី ៥៥០ រៀលក្នុងរយៈពេលដូចគ្នាឆ្នាំ ២០២០។
លោកបន្តថា ជាធម្មតាពោតក្រហមនៅខេត្តបាត់ដំបង និងបណ្តាខេត្តជាប់ព្រំដែនថៃប្រហែល ៨០ ភាគរយត្រូវបានឈ្មួញប្រមូលទិញយកទៅលក់នៅប្រទេសថៃ ខណៈសល់បន្តិចបន្តួចសម្រាប់ប្រើប្រាស់ក្នុងស្រុក (ធ្វើចំណីសត្វ)។
លោកថ្លែងថា៖ «ពោតក្រហមឆ្នាំនេះមានតម្លៃល្អច្រើនធៀបរយៈពេលដូចគ្នាឆ្នាំមុន ប៉ុន្តែការនាំចេញផ្លូវការទៅប្រទេសថៃ ឆ្នាំនេះនឹងអាចធ្លាក់ចុះខ្លះ»។
បើតាមលោក គឹម ហួត បញ្ហាប្រឈមនៃការនាំចេញពេលនេះ គឺដោយសារអាជ្ញាធរថៃបានរឹតបន្តឹងនៅតាមព្រំដែន ដោយគេបានតម្រូវឱ្យមានការបាញ់សម្លាញ់មេរោគ ព្រមទាំងមានលក្ខខណ្ឌភូតគាមអនាម័យជាច្រើនទៀត។
លោកអះអាងថា៖ «មកដល់ម៉ោងនេះ រាល់ឆ្នាំយើងនាំចេញតាមច្រកគីឡូ ១៣ (សំពៅលូន) ប៉ុន្តែពេលនេះច្រកនេះមិនអាចនាំចេញបានទេ គឺទាល់តែខាងភូតគាមអនាម័យបញ្ជាក់ទើបខាងថៃគេយល់ព្រមឱ្យចូល។ បើប្រៀបធៀបការនាំចេញក្នុងឆ្នាំនេះ អាចនឹងធ្លាក់ទាបជាងឆ្នាំមុន។ នេះបើតាមរបាយការណ៍នៃការស្នើសុំ C.O»។
ម្ចាស់សៃឡូ (កន្លែងប្រមូលទិញ) នៅស្រុកសំពៅលូន ខេត្តបាត់ដំបង អ្នកស្រី ចាន់ មួយ បានប្រាប់ថា តម្លៃពោតក្រហមពេលនេះបានឡើងខ្ពស់ជាងឆ្នាំមុន ពិសេសពោតស្ងួតដែលប្រឡេះគ្រាប់រួច ដោយក្នុងថ្ងៃនេះ (២៦ ខែកក្កដា) គ្រាប់ពោតស្ងួតមានតម្លៃជាមធ្យម ៩,៣ បាត (១ ១៥០ រៀល) ក្នុង ១ គីឡូក្រាម កើនឡើងពីប្រមាណ ៨,២ បាត (១ ០០០ រៀល) នារដូវប្រមូលផលឆ្នាំមុន ចំណែកពោតសើមមានតម្លៃ ៤,៧ បាត (៥៨០ រៀល) កើនពី ៤ បាត (៥០០ រៀល)។ អ្នកស្រីបន្តថា ដោយសារការប្រមូលផលមិនទាន់មានច្រើនដូច្នេះអ្នកស្រីមិនទាន់ហ៊ានសន្និដ្ឋានថា តម្លៃនឹងមានការប្រែប្រួលបែបណាទៀតទេ ព្រោះប្រទេសថៃគឺជាអ្នកកំណត់ថ្លៃ។
អ្នកស្រីនិយាយថា៖ «កសិករដាំពោតឆ្នាំនេះទទួលបានតម្លៃខ្ពស់ជាងឆ្នាំមុន ប៉ុន្តែនេះគ្រាន់តែដំណាក់កាលដំបូងប៉ុណ្ណោះ ចំណែកការនាំចេញទៅប្រទេសថៃក៏មិនមានឧបសគ្គអ្វីធ្ងន់ធ្ងរនោះទេ»។
លោក ហេង សិទ្ធិ មន្ត្រីមន្ទីរកសិកម្មខេត្តបាត់ដំបងបានឱ្យដឹងថា ក្នុងខេត្តបាត់ដំបងនារដូវប្រមូលផលលើកទី ១ នេះផ្ទៃដីដាំពោតមានចំនួន ៣៥ ២៩៧ ហិកតា ដោយជាទូទៅក្នុង ១ ហិកតាផ្តល់ផលចន្លោះពី ៤-៥ តោន ក្នុង ១ ឆ្នាំ (ប្រមូលផល ២ ដងក្នុង ១ ឆ្នាំ)។ ការប្រមូលផលពោត លើកទី ១ ឆ្នាំ ២០២១ នេះយឺត ដោយសារមិនមានទឹកគ្រប់គ្រាន់។ លោកបន្ថែមថា សម្រាប់ទិន្នផលឆ្នាំនេះ មន្ទីរកសិកម្មខេត្តរំពឹងថានឹងទទួលបានប្រហាក់ប្រហែលនឹងឆ្នាំមុន។
ដោយឡែក លោក តូច សុខន ប្រធានមន្ទីរពាណិជ្ជកម្មខេត្តត្បូងឃ្មុំ ដែលបច្ចុប្បន្នទីនោះការប្រមូលផលពោតសម្រេចបានប្រមាណជិតពាក់កណ្តាល បានប្រាប់ថា តម្លៃពោតក្រហមក្នុងខេត្តត្បូងឃ្មុំពេលនេះបានកើនឡើងតិចតួចធៀបឆ្នាំមុន ដោយពោតស្ងួតមានតម្លៃមធ្យម ១ ២០០ រៀលក្នុង ១ គីឡូក្រាម ចំណែកពោតសើមជាប់ស្នូលមានតម្លៃពី ៨០០-៩០០ រៀល។
លោកអះអាងថា៖ «ទោះខ្ញុំមិនមានតួលេខផ្ទៃដីដាំដុះពោតក្រហមក្នុងខេត្តត្បូងឃ្មុំ ប៉ុន្តែខ្ញុំដឹងថា សកម្មភាពនៃការដាំដុះបានកើនជាបន្តបន្ទាប់ ខណៈវាមានតម្លៃល្អអាចទទួលយកបានសម្រាប់អ្នកក្នុងរយៈពេលជាប់គ្នា ២-៣ ឆ្នាំ មកនេះ»។
លោកប្រាប់ទៀតថា ទិន្នផលពោតក្រហមក្នុងខេត្តត្បូងឃ្មុំភាគច្រើនត្រូវបាននាំមកភ្នំពេញ (រោងចក្រផលិតចំណីសត្វ) ក្រៅពីនោះសម្រាប់ប្រើប្រាស់ក្នុងខេត្ត និងនាំទៅប្រទេសវៀតណាម។
របាយការណ៍ក្រសួងកសិកម្ម រុក្ខាប្រមាញ់ និងនេសាទឱ្យដឹងថា ក្នុងឆមាសទី ១ ឆ្នាំ ២០២១ កម្ពុជានាំចេញគ្រាប់ពោតសរុប ១៤០ ៦៦៩,១៣ តោនកើនឡើង ១៧៦,៤៤ ភាគរយធៀបនឹងរយៈពេលដូចគ្នាឆ្នាំមុន។ ក្នុងនោះនាំទៅវៀតណាម ៩៧ ៥៨០ តោន, ថៃ ៤២ ៣៥០ តោន កោះតៃវ៉ាន់ ៦៧៦,១៣ តោន បង់ក្លាដែស ៤២ តោន និងកូរ៉េ ២១ តោន៕ LA