.jpg)
ស្ត្រីម្នាក់កំពុងបញ្ជាទិញទំនិញតាមប្រព័ន្ធអេឡិចត្រូនិកលើគេហទំព័រមួយ។ ហុង មិនា
ភ្នំពេញៈ ខណៈការធ្វើពាណិជ្ជកម្មតាមប្រព័ន្ធអេឡិចត្រូនិកកំពុងទទួលការពេញនិយមច្រើន ជាពិសេសក្នុងអំឡុងពេលនៃការរីករាលដាលជំងឺកូវីដ ១៩ ដែលទាមទារឱ្យរដ្ឋាភិបាលត្រូវពង្រឹងប្រសិទ្ធភាពនៃការគ្រប់គ្រងតាមរយៈការចុះបញ្ជីនៅក្រសួងពាណិជ្ជកម្មនោះមានសកម្មភាពចំនួន ៦ ប្រភេទ ត្រូវបានលើកលែងសម្រាប់ការចុះបញ្ជីនេះ។ នេះបើយោងតាមអ្នកនាំពាក្យក្រសួងពាណិជ្ជកម្ម។
ច្បាប់ស្តីពីការធ្វើពាណិជ្ជកម្មតាមប្រព័ន្ធអេឡិចត្រូនិកត្រូវបានប្រកាសដាក់ឱ្យប្រើប្រាស់ជាផ្លូវការកាលពីថ្ងៃទី ២ ខែវិច្ឆិកា ឆ្នាំ ២០១៩ ដោយមានគោលបំណងគ្រប់គ្រងការធ្វើពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា និងអន្តរជាតិ និងការផ្តល់នូវទំនុកចិត្តដល់សាធារណជនក្នុងការប្រើប្រាស់ទំនាក់ទំនងតាមប្រព័ន្ធអេឡិចត្រូនិក។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានប្រាប់ ភ្នំពេញ ប៉ុស្តិ៍ ក្នុងថ្ងៃទី ២៧ ខែកក្កដាថា អំឡុងពេលនៃវិបត្តិការឆ្លងរាលដាលជំងឺរាតត្បាតសកលកូវីដ ១៩ គេបានសង្កេតឃើញសកម្មភាពការធ្វើពាណិជ្ជកម្មតាមប្រព័ន្ធអេឡិចត្រូនិកបានរីកលូតលាស់ជាលំដាប់ ដែលទាមទារឱ្យរដ្ឋាភិបាលប្រទេសនីមួយៗត្រូវពង្រឹងការអនុវត្តច្បាប់ការធ្វើពាណិជ្ជកម្មតាមប្រព័ន្ធអេឡិចត្រូនិក។
លោកបានបន្តថា ការចុះបញ្ជីតាមច្បាប់កំណត់នឹងផ្តល់ប្រយោជន៍ច្រើនទាំងម្ចាស់អាជីវកម្ម (កិត្តិនាមល្អ) ទំនុកចិត្តអ្នកប្រើប្រាស់ និងរដ្ឋាភិបាល (ចំណូលពន្ធ)។
លោកបន្ថែមទៀតថា៖ «ការចុះបញ្ជីត្រឹមត្រូវនឹងធ្វើឱ្យកេរ្តិ៍ឈ្មោះម្ចាស់អាជីវកម្ម(សហគ្រាស/ក្រុមហ៊ុន) ក៏ដូចជាផលិតផលរបស់ខ្លួនដែលដាក់តាំងលក់ ទទួលបានកេរ្តិ៍ឈ្មោះពាណិជ្ជកម្មល្អ (Trade Name) ក៏ដូចជាបញ្ជាក់ពីភាពស្មោះត្រង់ទាំងការផ្តល់សេវា និងគុណភាពទំនិញផងដែរ»។
ជាមួយនឹងការតម្រូវឱ្យម្ចាស់អាជីវកម្មតាមប្រព័ន្ធអេឡិចត្រូនិកមកចុះបញ្ជីនេះ ច្បាប់ស្តីពីការធ្វើពាណិជ្ជកម្មតាមប្រព័ន្ធអេឡិចត្រូនិក ក៏បានលើកលែងការចុះបញ្ជីសម្រាប់ប្រភេទសកម្មភាពមួយចំនួនផងដែរ។
លោក សុវិជាតិ លើកឡើងថា ដើម្បីជួយសម្រួលលក់ការធ្វើពាណិជ្ជកម្មតាមប្រព័ន្ធអេឡិចត្រូនិកឱ្យមានភាពបត់បែន និងសម្រួលដល់ការធ្វើអាជីវកម្មដែលមិនមានលក្ខណៈផ្លូវការ និងអចិន្ត្រៃយ៍នោះ ច្បាប់នេះក៏បានលើកលែងសម្រាប់ការចុះបញ្ជីនូវប្រភេទសកម្មភាពមួយចំនួនដូចជា ការផ្សព្វផ្សាយពាណិជ្ជកម្មលើប្រព័ន្ធអេឡិចត្រូនិកអំពីទំនិញ ឬសេវាដែលមិនបង្កើតជាសំណើនៃកិច្ចសន្យា (គ្រាន់តែផ្សព្វផ្សាយដោយមិនបានប្រកាសតម្លៃផលិតផល និងត្រូវប្រាកដថាមិនមានការផ្ដល់សេវាទិញ-លក់), ការកក់បម្រុងទុកនូវសេវាដែលមិនមានការកក់ប្រាក់ (ការផ្ដល់ព័ត៌មានផ្សេងៗដល់អតិថិជន ឬអ្នកប្រើប្រាស់ក្នុងន័យជាការជជែកគ្នាដោយមិនបង្កើតសំណើកិច្ចសន្យាទិញ-លក់), និងការលក់ទំនិញ ឬសេវារបស់រូបវន្តបុគ្គល ដែលមានផលរបបក្រោមកម្រិតផលរបបជាអ្នកជាប់ពន្ធតូច។
ចំណុចផ្សេងៗទៀតរួមមាន ការលក់ទំនិញ ឬផ្ដល់សេវាលក្ខណៈគ្រួសារតាមរដូវកាល និងមិនមានលក្ខណៈអចិន្ត្រៃយ៍ (ការផ្សាយនៅលើបណ្ដាញសង្គមពីការលក់ផលិតផលកសិផលតាមរដូវកាល), ការលក់ទំនិញជាស្នាដៃសិល្បៈ (ស្នាដៃគំនូរ និងសិល្បៈ), និងការផ្តល់សេវាការបង្ហាត់បង្រៀនតាមប្រព័ន្ធអនឡាញលក្ខណៈឯកជន ឬការបង្ហាត់បង្រៀន ជាសិក្ខាសាលា ជាដើម។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជានិយាយថា ច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិកនឹងចូលរួមចំណែកយ៉ាងច្រើនក្នុងការគ្រប់គ្រងការធ្វើពាណិជ្ជកម្មតាមប្រព័ន្ធអេឡិចត្រូនិក ក៏ដូចជាជួយទប់ស្កាត់វិវាទផ្សេងៗពីការធ្វើពាណិជ្ជកម្មតាមប្រព័ន្ធអេឡិចត្រូនិកផងដែរ។
បើតាមលោក សុវិជាតិ ដោយសារពេលនេះកំពុងស្ថិតក្នុងដំណាក់កាលផ្សព្វផ្សាយ ក្រសួងពាណិជ្ជកម្មនៅមិនទាន់បានទទួលការចុះបញ្ជីពាណិជ្ជកម្មតាមប្រព័ន្ធអេឡិចត្រូនិកឱ្យរូបវន្តបុគ្គល ឬនីតិបុគ្គលនៅឡើយទេ។
ជាមួយនឹងការអភិវឌ្ឍដ៏ឆាប់រហ័សនៃបច្ចេកវិទ្យា និងនវានុវត្តន៍ ប្រទេសកម្ពុជា ទទួលបានចំណូលជិតកន្លះពាន់លានដុល្លារអាមេរិកពីអាជីវកម្មបចេ្ចកវិទ្យា និងឌីជីថលកាលពីឆ្នាំ ២០១៩។ នេះបើយោងតាមរបាយការណ៍ថ្មីបំផុតពីធនាគារអភិវឌ្ឍន៍អាស៊ី (ADB) ចេញផ្សាយកាលពីចុងខែឧសភា។
របាយការណ៍សមាហរណកម្មសេដ្ឋកិច្ចអាស៊ីឆ្នាំ ២០២១ របស់ ADB អំពី «ការធ្វើឱ្យដំណើរការវេទិកាឌីជីថលសម្រាប់អាស៊ី» បានបង្ហាញថា ប្រាក់ចំណូលឌីជីថលនៅកម្ពុជាកាលពីឆ្នាំ ២០១៩ មានចំនួនសរុប ៤៧០ លានដុល្លារ។
បើគិតតាមវិស័យពាណិជ្ជកម្មអេឡិចត្រូនិក គឺមានចំនួន ២៧,៦ ភាគរយ សេវាកម្មអេឡិចត្រូនិក ៧,៨ ភាគរយ ប្រព័ន្ធព័ត៌មានឌីជីថល មាន ១០,២ ភាគរយ បច្ចេកវិទ្យាផ្សព្វផ្សាយពាណិជ្ជកម្ម (AdTech) មាន ១២,៧ ភាគរយ ការដឹកជញ្ជូន ៣,៨ ភាគរយ និងការធ្វើដំណើរអនឡាញមានចំនួន ៣៧,៩ ភាគរយ៕ LA
