.jpg)
ស្រ្តីម្នាក់ដើរចេញពីហាងលក់សម្លៀកបំពាក់ H&M នៅទីក្រុងប៉េកាំង ប្រទេសចិន កាលពីថ្ងៃទី ២៥ ខែមីនា។ រូបថត AFP
ភ្នំពេញៈ Hennes & Mauritz AB (H&M) ដែលជាក្រុមហ៊ុនលក់រាយសម្លៀកបំពាក់អន្តរជាតិរបស់ប្រទេសស៊ុយអែត នឹងបើកហាងលើកដំបូងក្នុងប្រទេសកម្ពុជានៅឆ្នាំក្រោយ ដែលនេះជាផែនការពង្រីកអាជីវកម្មរបស់ក្រុមហ៊ុននៅក្នុងតំបន់ ខណៈទីផ្សារជាច្រើនបានចាប់ផ្តើមបើកដំណើរការឡើងវិញបន្ទាប់ពីមានការចាក់វ៉ាក់សាំងប្រឆាំងនឹងជំងឺកូវីដ ១៩ បានយ៉ាងរហ័ស។
របាយការណ៍ប្រចាំឆមាសទី ១ របស់ក្រុមហ៊ុនឱ្យដឹងថា ប្រទេសកម្ពុជានឹងក្លាយជាទីផ្សារថ្មីរបស់ខ្លួនតាមរយៈសិទ្ធិធ្វើអាជីវកម្មក្នុងឆ្នាំ ២០២២។
លោកស្រី Helena Helmersson អគ្គនាយកក្រុមហ៊ុន H&M បានថ្លែងថា៖ «ជាមួយនឹងម៉ូដសម្លៀកបំពាក់សម័យថ្មីរបស់យើង ការផ្លាស់ប្តូរជាបន្តបន្ទាប់របស់យើង និងការពិតដែលថាទីផ្សារជាច្រើនបានចាប់បើកដំណើរការឡើងវិញជាបណ្ដើរៗ ព្រមជាមួយនឹងការស្ទុះងើបឡើងវិញរបស់យើង គឺមានភាពរឹងមាំ។ ការលក់តាមអនឡាញបានបន្តអភិវឌ្ឍយ៉ាងល្អប្រសើរ ទោះបីជាហាងលក់ផ្ទាល់ជាច្រើនបានបើកដំណើរការដែលនេះបង្ហាញថាអតិថិជនពេញចិត្តនឹងម៉ូដសម័យថ្មី និងអាចទិញតាមរយៈបណ្ដាញដែលពួកគេចូលចិត្ត»។
លោកស្រីបានលើកឡើងថា ដោយសារតែប្រជាជនកាន់តែច្រើនឡើងៗបានចាក់វ៉ាក់សាំង និងការរឹតបន្តឹងត្រូវបានបន្ធូរបន្ថយ ពិភពលោកកំពុងបើកដំណើរការឡើងវិញជាបណ្ដើរៗហើយ។ ជាថ្មីម្ដងទៀតអតិថិជនអាចចូលមើលហាងលក់របស់ខ្លួនបានផងដែរ។
លោកស្រីថ្លែងថា៖ «ដោយមានការរួមបញ្ចូលគ្នានៃម៉ូដទាន់សម័យដែលមានការពេញចិត្ត ការសម្របខ្លួនយ៉ាងរហ័ស និងការកែលម្អបន្ថែមទៀត ការស្ទុះងើបឡើងវិញរបស់យើងនឹងមានភាពរឹងមាំ។ ទោះបីការរឹតបន្តឹងមានជាបន្តក៏ការលក់បានកើនឡើងគួរឱ្យកត់សម្គាល់ធៀបនឹងឆ្នាំ ២០១៩។ ត្រីមាសទី ៣ បានចាប់ផ្ដើមដំណើរការល្អប្រសើរ ហើយយើងជិតត្រឡប់ទៅរកកម្រិតដូចមុនពេល ការរីករាលដាលកូវីដ ១៩»។
លោកស្រីបន្តថា៖ «ខ្ញុំមានមោទនភាពលើការប្ដេជ្ញាចិត្ត និងការជំរុញរបស់សហការីក្នុងអំឡុងពេលដ៏ពិបាកនេះ។ វិបត្តិនេះធ្វើឱ្យយើងកាន់តែរឹងមាំ។ មេរៀនដែលយើងបានរៀនសូត្រកំពុងជំរុញឱ្យយើងកាន់តែល្អប្រសើរ និងកាន់តែលឿនជាមុននៅក្នុងទីផ្សារនូវឱកាសថ្មីៗច្រើនបំផុត ហើយយើងមានសុទិដ្ឋិនិយមអំពីអនាគត»។
លោក ខេន លូ អគ្គលេខាធិការ សមាគមរោងចក្រកាត់ដេរនៅកម្ពុជា បានឱ្យដឹងថា ក្រុមហ៊ុន H&M គឺជាអ្នកគាំទ្ររយៈពេលវែងនៃឧស្សាហកម្មកាត់ដេរដែលនាំមុខដោយការនាំចេញរបស់ប្រទេសកម្ពុជា ហើយនឹងបន្តគាំទ្ររយៈពេលជាច្រើនឆ្នាំខាងមុខទៀត ដរាបណាកម្ពុជាអាចរក្សា និងបង្កើនសមត្ថភាពរបស់ខ្លួនបាន។
លោកថ្លែងថា៖ «ក្នុងនាមក្រុមហ៊ុនផលិតមានកិច្ចសន្យាយីហោ ប្រទេសកម្ពុជាបានផ្ដល់ប្រភពទិសដៅប្រកបដោយសុវត្ថិភាពសម្រាប់ហាងលក់ទូទាំងពិភពលោកទាក់ទងនឹងអនុលោមភាពការងារ»។
លោកបន្តថា៖ «ការបើកហាងលក់នៅប្រទេសកម្ពុជា វានឹងផ្ដល់សញ្ញាកំណើនសេដ្ឋកិច្ចដ៏រឹងមាំជាមួយនឹងការប្រើប្រាស់ក្នុងស្រុកកើនឡើង។ វាក៏នឹងជួយកែលម្អលក្ខណៈម៉ូដទាន់សម័យនៅកម្ពុជា ជាពិសេសសម្រាប់យុវវ័យជំនាន់ថ្មី»។
ចាប់ពីថ្ងៃទី ១ ខែមីនា ដល់ថ្ងៃទី ៣១ ខែឧសភា ឆ្នាំ ២០២១ ការលក់របស់ក្រុមហ៊ុន H&M បានកើនឡើង ៧៥ ភាគរយជារូបិយប័ណ្ណក្នុងស្រុក (Krona របស់ស៊ុយអែត) ធៀបរយៈពេលដូចគ្នាកាលពីឆ្នាំមុន។
ការលក់ក្នុងអំឡុងពេលចាប់ពីថ្ងៃទី ១ ដល់ ១៣ ខែមិថុនា ឆ្នាំ ២០២១ បានកើន ៣៥ ភាគរយ ធៀបនឹងរយៈពេលដូចគ្នាឆ្នាំ ២០២០ និង ២ ភាគរយធៀបរយៈពេលដូចគ្នាឆ្នាំ ២០១៩។ ទីផ្សារភាគច្រើនរបស់ H&M កំពុងស្ថិតនៅក្រោមការរឹតបន្តឹង ហើយកាលពីថ្ងៃទី ១៣ ខែមុនហាងលក់ប្រហែល ១៨០ ត្រូវបានបិទដំណើរការជាបណ្ដោះអាសន្ន។ ហាងលក់ទាំង ៥០ នៅប្រទេសម៉ាឡេស៊ីបានបិទដំណើរការកាលពីដើមខែនេះ។ នេះបើតាមរបាយការណ៍ហិរញ្ញវត្ថុរបស់ H&M៕ LA
