.jpg)
សាច់បង្កក។ រូបថត AFP
ភ្នំពេញៈ កម្ពុជាបានរកឃើញសាច់ក្របីបង្កកចំនួន ៣ កុងតឺន័រនាំចូលពីប្រទេសឥណ្ឌា មានវិជ្ជមានវីរុសកូវីដ ១៩ នឹងត្រូវដុតកម្ទេចចោលឆាប់ៗ។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា។
លិខិតចុះហត្ថលេខាដោយលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា នាថ្ងៃទី ២១ ខែកក្កដា ឱ្យដឹងថាសាច់ក្របីបង្កកដែលនាំចូលពីប្រទេសឥណ្ឌាហើយកំពុងស្ថិតនៅក្នុងទីលានផែស្ងួតត្រីកូដ ដ្រាយផត មាន វិជ្ជមានវីរុស SARS-CoV-2។
អនុលោមតាមប្រការ ២ នៃប្រកាសលេខ ៣០៤ សហវ.ប្រក គណៈកម្មការចំពោះកិច្ចមានភារកិច្ចចាត់វិធានការកម្ទេចចោលសាច់បង្កក និងមុខទំនិញបង្កកផ្សេងទៀតដែលបានរកឃើញមានវីរុសកូវីដ ១៩។
លិខិតនេះបញ្ជាក់ថា៖ «ក្នុងន័យនេះ ដើម្បីចូលរួមទប់ស្កាត់ការឆ្លងរាលដាលនៃជំងឺកូវីដ ១៩ និងក្នុងនាមគណៈកម្មការចំពោះកិច្ច ខ្ញុំស្នើលោកប្រធានក្រុមហ៊ុនចូលរួមជាមួយក្រុមការងារចម្រុះ ដើម្បីចាត់វិធានការកម្ទេចចោលសាច់ក្របីបង្កកផ្ទុកក្នុងកុងតឺន័រដែលបានរកឃើញវីរុសកូវីដ ១៩ តាមនីតិវិធីជាធរមាននាពេលដ៏ខ្លីខាងមុខនេះ»។
ការសម្រេចដុតកម្ទេចសាច់ក្របីបង្កកនេះត្រូវធ្វើឡើងតាមលិខិតរបស់ក្រសួងសុខាភិបាលកាលពីថ្ងៃទី ១៩ ខែកក្កដា ដែលបានរកឃើញថា សាច់ក្របីបង្កកចំនួន ៣ កុងតឺន័រក្នុងចំណោម ៥ កុងតឺន័រនាំចូលពីប្រទេសឥណ្ឌា ដោយក្រុមហ៊ុន បូវីនី ហ្វូដ ឯក និងក្រុមហ៊ុន អើស្ពារី អ៊ិនវេសម៉ិន & ខនស្ត្រាក់សិន ឯក មានវិជ្ជមានវីរុសកូវីដ ១៩ (SARS-CoV-2)។
ជាមួយគ្នានេះស្ថានទូតឥណ្ឌាប្រចាំទីក្រុងភ្នំពេញ កាលពីថ្ងៃទី ២៧ ខែកក្កដា បានចេញលិខិតមួយដោយបានស្នើសុំឱ្យរដ្ឋាភិបាលកម្ពុជាធ្វើតេស្ដឡើងវិញទៅលើសំណាកសាច់ក្របីស្រស់ដែលបញ្ជាក់វិជ្ជមានវីរុស SARS-CoV-2។
សេចក្ដីប្រកាសព័ត៌មានបានឱ្យដឹងថា ក្រុមហ៊ុននាំចេញ ២ របស់ប្រទេសឥណ្ឌា ទទួលបានសំណាកដែលរក្សាទុកបានធ្វើតេស្ដនៅមន្ទីរពិសោធន៍ដែលទទួលស្គាល់ដោយ ISO 17025 នៅប្រទេសឥណ្ឌា ហើយសាច់ទាំងអស់ត្រូវបានរកឃើញអវិជ្ជមានវីរុស SARS-COV-2។
សេចក្ដីប្រកាសព័ត៌មានបន្តថា៖ «តាមទស្សនៈដែលហាក់យល់ខុសគ្នារវាងឥណ្ឌា និងកម្ពុជា ដោយសារតែក្រុមហ៊ុននាំចេញរបស់ប្រទេសឥណ្ឌា តាមរយៈស្ថានទូតឥណ្ឌាប្រចាំទីក្រុងភ្នំពេញ និងក្រុមហ៊ុននាំចូលរបស់ពួកគេនៅក្នុងប្រទេសកម្ពុជា បានស្នើក្រសួងសុខាភិបាល និងគណៈកម្មការចំពោះកិច្ចទប់ស្កាត់ការរីករាលដាលនៃជំងឺឆ្លងកូវីដ ១៩ ធ្វើតេស្ដជាថ្មីនៃសំណាកស្រស់ពីកុងតឺន័រដដែល ដើម្បីបញ្ជាក់ជាថ្មីពីលទ្ធផលនៃការធ្វើតេស្ដ ប្រសិនបើអាចធ្វើបាននៅមន្ទីរពិសោធន៍ទំនើបនៅប្រទេសសិង្ហបុរី»។
«ការរកឃើញហ្សែន ប្រសិនបើមាន មិនមែនជាការចង្អុលបង្ហាញនៃការឆ្លងសកម្មនោះទេចាប់តាំងពីកុងតឺន័រទាំងនេះបានចាកចេញពីប្រទេសឥណ្ឌាកាលពីខែមេសា ឆ្នាំ ២០២១ ហើយបានមកដល់កម្ពុជាកាលពីខែកក្កដា ឆ្នាំ ២០២១»។ នេះបើតាមសេចក្ដីប្រកាសព័ត៌មាន។
សេចក្តីប្រកាសព័ត៌មានបានបញ្ជាក់ទៀតថា មិនមានភ័ស្ដុតាងវិទ្យាសាស្ដ្រណាបង្ហាញថា វីរុសជំងឺកូវីដ ១៩ អាចរស់នៅលើអាហារ និងសម្ភារវេចខ្ចប់អាហារក្នុងរយៈពេលជិត ៣ ខែនោះទេ។ កូវីដ ១៩ គឺជាជំងឺផ្លូវដង្ហើមឆ្លងតាមរយៈការប៉ះពាល់រវាងមនុស្ស-មនុស្ស។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស កាលពីថ្ងៃទី ២៤ ខែកក្កដា បានណែនាំទៅដល់សាធារណជនទាំងអស់សូមឱ្យរៀបចំ និងទុកដាក់ចំណីអាហារក្នុងបរិបទជំងឺកូវីដដើម្បីឱ្យបុគ្គលមានសុខភាពល្អ ចៀសផុតពីបញ្ហាសុខភាព បណ្តាលមកពីការឆ្លងជំងឺផ្សេងៗ ពិសេសជំងឺកូវីដ ១៩ ការពុលអាហារ និងការពុលស្រា។
លោកស្រីបន្តលើកឡើងថា បញ្ហាសុខភាពបណ្តាលមកពីចំណីអាហារ បង្កឡើងតាមរយៈការប៉ះពាល់ ការទទួលទានចំណីអាហារ ឬទឹកកខ្វក់ ដែលមានមេរោគបាក់តេរី វីរុស ប៉ារ៉ាស៊ីត ឬសារធាតុគីមីក្នុងនោះក៏អាចមានវីរុសកូវីដ ១៩ ផងដែរ។
លោកលើកឡើងថា៖ «មានការសិក្សាខ្លះបានបង្ហាញថា មានវីរុសកូវីដ ១៩ អាចនៅរស់នៅលើអាហារកកៗដែរ បើទោះបីវីរុសកូវីដ ១៩ មិនអាចបង្កើតកូនចៅក្នុងចំណីអាហារបានក៏ដោយ។ ក្នុងន័យនេះ ក្រសួងសុខាភិបាលសូមជម្រាបជូនថា បុគ្គលអាចមិនឆ្លងវីរុសកូវីដ ១៩ ពីចំណីអាហារ ឬពីអាហារវេចខ្ចប់ ប្រសិនបើបានអនុវត្តវិធានការអនាម័យចំណីអាហារឱ្យបានជាប់ជានិច្ច»។
ប្រទេសកម្ពុជាកាលពីថ្ងៃទី ១ ខែឧសភា ឆ្នាំនេះបានដាក់ការហាមឃាត់មិនកំណត់ពេលលើការនាំចូលសាច់បង្កក និងទំនិញបង្កកផ្សេងទៀត ដែលចាត់ទុកថាមាន «ហានិភ័យខ្ពស់» ដែលមានប្រភពពីប្រទេសឥណ្ឌា ដើម្បីទប់ស្កាត់ការរីករាលដាលជំងឺកូវីដ ១៩ ដោយសាររលកលើកទី២ ដ៏គ្រោះថ្នាក់នាពេលកន្លងមកនៅក្នុងប្រទេស ១ នេះ។
ឥណ្ឌា គឺជាទីផ្សារដ៏ធំមួយនៃការផ្គត់ផ្គង់សាច់ក្របី និងអាហារនានា ហើយប្រទេសកម្ពុជាបាននាំចូលសាច់ក្របីពីឥណ្ឌា ក្នុងតម្លៃ ១៧,៧ លានដុល្លារ កាលពីឆ្នាំមុន កើនពី ៦,៤ លានដុល្លារធៀបឆ្នាំ ២០១៩។ នេះបើតាមសេចក្ដីប្រកាសព័ត៌មានរបស់ស្ថានទូតឥណ្ឌាប្រចាំទីក្រុងភ្នំពេញ៕ LA
