ភ្នំពេញៈ កិច្ចប្រជុំភាពជាដៃគូពិភាក្សានៃក្រុមការងារបច្ចេកទេសទី១ «គយ-ឧស្សាហកម្មបម្រើការនាំចេញវិស័យកាត់ដេរ» នៃយន្តការភាពជាដៃគូគយ-ផ្នែកឯកជន ត្រូវបានរៀបចំឡើងកាលពីថ្ងៃទី ២៩ ខែកក្កដា ឆ្នាំ ២០២១ តាមប្រព័ន្ធអនឡាញ។
កិច្ចប្រជុំនេះមានការចូលរួមពី លោក ផា អេងវ៉េង អគ្គនាយករងនៃអគ្គនាយកដ្ឋានគយ និងរដ្ឋាករកម្ពុជា និងជាសហប្រធានក្រុមការងារបច្ចេកទេសទី ១ តំណាងផ្នែករដ្ឋាភិបាល និងលោក ស៊ិន ចន្ធី សហប្រធានក្រុមការងារបច្ចេកទេសទី១ តំណាងផ្នែកឯកជនព្រមទាំងមានការចូលរួមពីលោក លី ឃុនថៃ អនុប្រធានសភាពាណិជ្ជកម្មកម្ពុជា និង ជាប្រធានសមាគមរោងចក្រស្បែកជើងកម្ពុជា លោក ងួន ម៉េងតិច អគ្គនាយកសភាពាណិជ្ជកម្មកម្ពុជា ព្រមទាំងមន្ត្រី ពាក់ព័ន្ធសំខាន់ៗនៃអគ្គនាយកដ្ឋានគយ និងរដ្ឋាករកម្ពុជា សមាជិក សភាពាណិជ្ជកម្មកម្ពុជា តំណាងសមាគមរោងចក្រកាត់ដេរកម្ពុជា តំណាងក្រុមហ៊ុនអ្នកនាំចេញជើងសារគយ និងសមាជិក សមាជិកានៃក្រុមការងារបច្ចេកទេសទី ១ ជាច្រើនទៀត។
គោលបំណងនៃកិច្ចប្រជុំនេះ គឺដើម្បីពិគ្រោះពិភាក្សារកដំណោះស្រាយ បំភ្លឺបញ្ជាក់ទៅលើបញ្ហាប្រឈម កង្វល់ និងសំណូមពរមួយចំនួន ដែលលើកឡើងដោយផ្នែកឯកជន ដាក់ជូនសំណាក់ដៃគូអគ្គនាយកដ្ឋានគយ និងរដ្ឋាករកម្ពុជាផ្ទាល់ដែលពាក់ព័ន្ធនឹងការចេញបម្រើឱ្យ វិស័យកាត់ដេរដែលមានការប៉ះពាល់ ជាពិសេស បញ្ហាដែលកើតមានឡើងនៅក្នុងបរិបទនៃជំងឺកូវីដ ១៩ ដែលកំពុងតែឆ្លងរាលដាលនៅប្រទេស កម្ពុជា។
ទិន្នន័យពីអគ្គនាយកដ្ឋានគយនិងរដ្ឋាករកម្ពុជា បានបង្ហាញថា ការនាំចេញផលិតផលកាត់ដេរ ពី កម្ពុជាក្នុងឆមាសទី ១ ឆ្នាំនេះ មានទឹកប្រាក់ ៤ ៧២១,៤ លានដុល្លារ កើនប្រមាណ ៤០,១ លានដុល្លារ ស្មើនឹង ០,៩ ភាគរយ បើធៀបនឹងរយៈពេលដូចគ្នាឆ្នាំមុន៕