ភ្នំពេញៈ ក្រុមហ៊ុន លីហួរ ផេប្រ៉ូ ភីអីលស៊ី ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន លីហួរ គ្រុប នឹងតភ្ជាប់ប្រព័ន្ធទូទាត់ឌីជីថលជាមួយនឹងផ្សារខេមបូឌាត្រេដ (Cambodia Trade) របស់ក្រសួងពាណិជ្ជកម្មក្នុងគោលបំណងដើម្បីសម្រួលដល់អាជីវកម្មតាមប្រព័ន្ធអេឡិចត្រូនិករបស់សហគ្រាសធុនតូច និងមធ្យមនៅកម្ពុជា។
លោក សំហេង បូរ៉ា អនុរដ្ឋលេខាធិការក្រសួងពាណិជ្ជកម្មបានពិភាក្សាក្នុងប្រជុំទ្វេភាគីជាមួយលោក យុន ផន នាយកប្រតិបត្តិក្រុមហ៊ុន លីហួរ ផេប្រ៉ូ ស្តីពីការតភ្ជាប់ប្រព័ន្ធទូទាត់តាមបែបឌីជីថលរបស់ក្រុមហ៊ុនលីហួរ តាមរយៈប្រព័ន្ធហ្សូម កាលពីថ្ងៃទី ២៧ ខែកក្កដា ឆ្នាំ ២០២១ ។
លោក សំហេង បូរ៉ា បានឱ្យដឹងថា ការពិភាក្សាគ្នានេះ ដើម្បីស្វែងរកលទ្ធភាពរៀបចំកិច្ចសហប្រតិបត្តិការនៃការតភ្ជាប់ប្រព័ន្ធទូទាត់តាមបែបឌីជីថលរបស់ក្រុមហ៊ុន លីហួរ ផេប្រ៉ូ និងផ្សារអនឡាញ CambodiaTrade។
លោកថ្លែងទៀតថា៖ «ការតភ្ជាប់នេះនឹងជួយបង្កើនភាពងាយស្រួល និងកាត់បន្ថយពេលវេលាជូនអតិថិជន និងសហគ្រាសធុនតូច និងមធ្យមក្នុងការធ្វើពាណិជ្ជកម្មតាមប្រព័ន្ធអេឡិចត្រូនិកនៅប្រទេសកម្ពុជា»។
លោកលើកឡើងថា ក្រសួងមានជំហរយ៉ាងមុតមាំក្នុងការធ្វើសហប្រតិបត្តិការជាមួយក្រុមហ៊ុន លីហួរ ផេប្រ៉ូ និងស្នើឱ្យក្រុមការងារបច្ចេកទេសទាំងពីរសហការគ្នាឱ្យបានល្អ ដើម្បីធានាឱ្យបាននូវការតភា្ជប់ប្រព័ន្ធទូទាត់តាមបែបឌីជីថលរបស់ក្រុមហ៊ុន និងផ្សារខេមបូឌាត្រេដឱ្យទទួលជោគជ័យ។
លោកនិយាយថា៖ «[ខ្ញុំ] សូមថ្លែងអំណរគុណដល់ក្រុមហ៊ុន លីហួរ ផេប្រ៉ូ ដែលមានបំណងធ្វើកិច្ចសហប្រតិបត្តិការជាមួយក្រសួងពាណិជ្ជកម្មតាមរយៈការតភ្ជាប់ប្រព័ន្ធទូទាត់តាមបែបឌីជីថលរបស់ខ្លួនជាមួយផ្សារខេមបូឌាត្រេដរបស់ក្រសួងពាណិជ្ជកម្ម»។
ក្រសួងពាណិជ្ជកម្មបានដាក់ឱ្យដំណើរការ CambodiaTrade កាលពីខែមិថុនា ឆ្នាំនេះ។ CambodiaTrade ជាផ្សារពាណិជ្ជកម្មតាមប្រព័ន្ធអេឡិចត្រូនិក ដើម្បីជួយដល់សហគ្រាសធុនតូច និងមធ្យមអាចដាក់លក់ផលិតផលរបស់ខ្លួនលើផ្សារនេះ។ ផ្សារពាណិជ្ជកម្មតាមប្រព័ន្ធអេឡិចត្រូនិកត្រូវបានប្រតិបត្តិការតាមរយៈគេហទំព័រ CambodiaTrade.com ដែលគ្រប់គ្រងដោយក្រសួងពាណិជ្ជកម្ម៕LA