ភ្នំពេញៈ កម្ពុជាបាននាំចេញម្ទេសសរុបជាង ៦៧,៥ ពាន់តោន ក្នុងរយៈពេល ៧ ខែ ដើមឆ្នាំ ២០២១ កើនឡើងជិត ៥០ ភាគរយបើធៀបនឹងរយៈពេលដូចគ្នាឆ្នាំ ២០២០។ នេះបើតាមទិន្នន័យពីក្រសួងកសិកម្ម រុក្ខាប្រមាញ់ និងនេសាទ។
ទិន្នន័យដែលផ្អែកលើប្រព័ន្ធទិន្នន័យគ្រឹះភូតគាមអនាម័យជាតិ (National Phytosanitary Database) របស់អគ្គនាយកដ្ឋានកសិកម្មឱ្យដឹងថា ចាប់ពីខែមករា ដល់ខែកក្កដា ឆ្នាំ ២០២១ កម្ពុជាបាននាំចេញម្ទេសក្នុងបរិមាណសរុប ៦៧ ៥៤៧,៣៤ តោន។
ក្នុងនោះម្ទេសស្រស់ ៦៦ ២២៧,១២ តោនកើន ៤៦ ភាគរយដោយនាំទៅប្រទេសថៃ ៦៦ ២២៧,១២ តោន និងប្រទេសអារ៉ាប់រួម ០,០០២ តោន។ ចំណែកឯការនាំចេញម្ទេសក្រៀមមានចំនួន ១ ៣២០,២២ តោនកើនឡើង ១០,០២ ភាគរយ ដោយនាំទៅប្រទេសថៃ ១ ៣២០ តោន, បែលហ្ស៊ិក ០,២១ តោន និងកាណាដា ០,០១ តោន។
ប្រធានមន្ទីរពាណិជ្ជកម្ម ខេត្តបាត់ដំបង លោក គឹម ហួត បានប្រាប់ ភ្នំពេញ ប៉ុស្តិ៍ថា តម្លៃម្ទេសស្រស់តែងប្រែប្រួលទៅតាមតម្រូវការទីផ្សារ ដោយនៅពេលនេះក្នុងខេត្តបាត់ដំបងមានតម្លៃជាមធ្យម ៥ ០០០ រៀលក្នុង ១ គីឡូក្រាម កើនឡើងតិចតួចបើធៀបនឹងរយៈពេលដូចគ្នាឆ្នាំមុន។ លោកបន្តថា ឆ្នាំនេះដោយសារផ្ទៃដីដាំដុះក្នុងខេត្តកើនឡើង ហេតុនេះផលម្ទេសអាចនឹងកើនលើសឆ្នាំមុនចន្លោះពី ១០-២០ ភាគរយ។
លោកប្រាប់ទៀតថា សម្រាប់ទិន្នផលម្ទេសដែលប្រមូលបានក្នុងខេត្តបាត់ដំបង គឺមិនច្រើនទេ ប៉ុន្តែបើនិយាយពីបរិមាណនាំចេញទៅប្រទេសថៃ តាមខេត្តបាត់ដំបង គឺមានច្រើន ព្រោះឈ្មួញបានប្រមូលទិញពីបណ្តាខេត្តនានាយកមកនាំចេញតាមច្រកនានារបស់ខេត្តបាត់ដំបង។
លោកថ្លែងថា៖ «ទោះបីខេត្តបាត់ដំបងមិនមែនជាកន្លែងដាំម្ទេសច្រើន ប៉ុន្តែបើផ្អែកតាមរបាយការណ៍ស្នើសុំវិញ្ញាបនបត្រនាំចេញ (CO) ម្ទេសស្រស់ទៅប្រទេសថៃឆ្លងកាត់តាមខេត្តបាត់ដំបង ចាប់ពីដើមឆ្នាំរហូតមកដល់ពេលនេះ គឺមានជិត ៤ ម៉ឺនតោន»។
លោកលើកឡើងថា ម្ទេសមានទីផ្សារនាំចេញល្អ ហើយការដាំដុះពេលនេះក៏កំពុងមានសញ្ញាវិជ្ជមានផងដែរ។ លោកអះអាងថា៖ «ថ្នាក់ដឹកនាំ និងមន្ត្រីនៃមន្ទីរពាណិជ្ជកម្មខេត្តតែងខិតខំជួយសម្រួលដល់ការនាំចេញគ្រប់ផលិតផល ព្រោះវាមិនត្រឹមតែជាការលើកកម្ពស់ការផលិត និងដាំដុះប៉ុណ្ណោះទេ ប៉ុន្តែថែមទាំងអាចនាំចំណូលចូលជាតិទៀតផង»។
យោងតាមមន្ត្រីនៃមន្ទីរកសិកម្មខេត្តបាត់ដំបង លោក ហេង សិទ្ធិ សម្រាប់ខេត្តបាត់ដំបង គឺគេពិបាកកំណត់ឱ្យបានច្បាស់លាស់ពីទំហំផ្ទៃដីដាំដុះណាស់ ព្រោះម្ទេសត្រូវបានគេដាំលាយជាមួយបន្លែផ្សេងទៀត។ ប៉ុន្តែអ្វីដែលលោកអាចនិយាយថា គឺផ្ទៃដីដាំដុះបន្លែ ពិតជាកើនឡើងចាប់តាំងពីក្រសួងកសិកម្មដាក់ចេញនូវយុទ្ធសាស្ត្រក្នុងការបង្កើន និងជំរុញការដាំដុះលើកសិផលគ្រប់មុខ។
លោកប្រាប់ទៀតថា ម្ទេសភាគច្រើនត្រូវបានគេដាំច្រើននៅតំបន់ជិតមាត់ទឹកក្នុងរដូវប្រាំង ដោយវាឱ្យផលបន្ទាប់ពីចាប់ផ្តើមដាំពី ២ ខែកន្លះឡើងទៅ។ លោកនិយាយថា៖ «ការដាំម្ទេសក្នុងខេត្តបាត់ដំបង គឺសម្រាប់ឆ្លើយតបនឹងតម្រូវការបរិភោគក្នុងខេត្ត និងអាចសល់នាំចេញបន្តិចបន្តួច»។
លោកបន្ថែមថា ដោយសារខេត្តបាត់ដំបងមានច្រកព្រំដែនជាប់ប្រទេសថៃ ហេតុនេះការដឹកជញ្ជូនម្ទេសទៅប្រទេសថៃដោយឆ្លងកាត់ខេត្តបាត់ដំបង គឺមានច្រើនចាប់ពីដើមឆ្នាំមកបើធៀបនឹងឆ្នាំ ២០២០។
លោក សាយ សុផាត ប្រធានមន្ទីរកសិកម្មខេត្តប៉ៃលិន បានប្រាប់ថា ទោះមិនមានតួលេខពិតប្រាកដ ប៉ុន្តែលោកសង្កេតឃើញថា ការដាំម្ទេសរបស់ប្រជាកសិករនៅកម្ពុជាចាប់ផ្តើមមានកំណើនសន្សឹមៗ។ កំណើននេះអាចបណ្តាលមកពីកត្តា ២ គឺកំណើនតម្រូវការក្នុងស្រុក និងតម្លៃទីផ្សារនាំចេញបានកើនឡើងគួរឱ្យកត់សម្គាល់ផងដែរ។ លោកបន្ថែមថា ប្រទេសថៃ គឺជាទីផ្សារធំសម្រាប់ដំណាំម្ទេសពីកម្ពុជា ដូច្នេះតម្លៃម្ទេសក៏ប្រែប្រួលទៅតាមតម្រូវការរបស់ប្រទេសថៃផងដែរ។
កាលពីឆ្នាំ ២០២០ កម្ពុជាបាននាំចេញម្ទេសស្រស់ចំនួន ៧០ ៥៤៦ តោន កើន ២៧,០៨ ភាគរយពី ៥៥ ៥១៣ តោនក្នុងឆ្នាំ ២០១៩។ នេះបើតាមទិន្នន័យក្រសួងកសិកម្ម រុក្ខាប្រមាញ់ និងនេសាទ៕ LA