ភ្នំពេញៈ ក្រុមហ៊ុនអភិវឌ្ឍន៍អចលនទ្រព្យ JS Land Plc ទទួលការយល់ព្រមជាគោលការណ៍ពីក្រុមហ៊ុនផ្សារមូលបត្រកម្ពុជា (CSX) ដើម្បីចុះបញ្ជីលើទីផ្សារកំណើនរបស់ទីផ្សារមួយនេះ។ ក្រុមហ៊ុននេះនឹងក្លាយជាសហគ្រាសធុនតូច និងមធ្យម ទី ២ ដែលចុះបញ្ជីនៅលើទីផ្សារកំណើន បន្ទាប់ពីក្រុមហ៊ុនវិស្វកម្ម DBB ដែលបច្ចុប្បន្នកំពុងបោះលក់មូលបត្រកម្មសិទ្ធិលើកដំបូងជាសាធារណៈ (IPO)។
បើយោងតាមសេចក្ដីប្រកាសព័ត៌មានបានពី CSX កាលពីថ្ងៃទី ៣ ខែសីហា គឺ CSX បានផ្ដល់ការយល់ព្រមជាគោលការណ៍លើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្រកម្មសិទ្ធិដល់ JS Land Plc កាលពីថ្ងៃទី ២២ ខែកក្កដា ឆ្នាំ ២០២១។
សេចក្ដីប្រកាសព័ត៌មានបន្តថា៖ «ដើម្បីអាចចុះបញ្ជី និងជួញដូរជាផ្លូវការនៅ CSX ក្រុមហ៊ុន JS land Plc ត្រូវតែទទួលបានការអនុញ្ញាតឱ្យបោះផ្សាយលក់មូលបត្រកម្មសិទ្ធិជាសាធារណៈពីនិយតករមូលបត្រកម្ពុជា (SERC) និងត្រូវបំពេញនូវលក្ខខណ្ឌផ្សេងៗមួយចំនួនទៀតពាក់ព័ន្ធនឹងការចុះបញ្ជីនៅ CSX»។
CSX ឱ្យដឹងទៀតថា៖ «JS Land Plc ជាក្រុមហ៊ុនទី ២ ដែលទទួលបានការឯកភាពជាគោលការណ៍លើពាក្យស្នើសុំពិនិត្យលទ្ធភាពអាចចុះបញ្ជីមូលបត្រនៅទីផ្សារកំណើន CSX។ គួរកត់សម្គាល់ដែរថា JS Land Plc ជាក្រុមហ៊ុនសក្ដានុពលមួយ ដែលមានសកម្មភាពអាជីវកម្មចម្បង គឺអភិវឌ្ឍន៍គម្រោងខុនដូ ហើយក្រុមហ៊ុនកំពុងតែដំណើរការកសាងគម្រោងទី ២ ដែលនៅខណ្ឌសែនសុខ ជាតំបន់សក្ដានុពល និងកំពុងអភិវឌ្ឍមួយក្នុងរាជធានីភ្នំពេញ»។
លោកស្រី គឹម សុផានីតា ប្រធាននាយកដ្ឋានប្រតិបត្តិការទីផ្សាររបស់ CSX បានប្រាប់ភ្នំពេញប៉ុស្ដិ៍នាថ្ងៃទី ៤ ខែសីហាថា បន្ទាប់ពីកិច្ចខិតខំប្រឹងប្រែងជាច្រើនក្នុងការបង្កើនការយល់ដឹងអំពីការចុះបញ្ជីនៅទីផ្សារកំណើនក្នុងចំណោមម្ចាស់ SME ជាច្រើនពេលនេះ CSX ទទួលបានផ្លែផ្កាហើយ។
លោកស្រីបញ្ជាក់ថា JS Land ជាក្រុមហ៊ុនមួយក្នុងចំណោម SMEs ក្នុងស្រុកជាច្រើនដែលមានសក្ដានុពលដែលកំពុងស្វែងរកកំណើន និងការពង្រីក។ យើងរីករាយដែលក្រុមហ៊ុននេះឆ្លងផុតការពិនិត្យលទ្ធភាពអាចចុះបញ្ជីមូលបត្ររបស់ផ្សារហ៊ុននេះ។
យើងកំពុងរង់ចាំស្វាគមន៍ JS Land ជាក្រុមហ៊ុនចុះបញ្ជីទី ២ នៅលើទីផ្សារកំណើន បន្ទាប់ពីក្រុមហ៊ុននេះឆ្លងកាត់ដោយជោគជ័យនៃដំណើរការដែលនៅសល់ និងទទួលបានការឯកភាពជាផ្លូវការពី SERC។
លោកស្រីបន្តថា ទោះយ៉ាងណា លោកស្រីបដិសេធផ្ដល់ការអត្ថាធិប្បាយបន្ថែមទាក់ទងនឹងការចេញ និងព័ត៌មានចុះបញ្ជីនេះ ដោយរង់ចាំរហូតដល់ SERC ផ្ដល់ការឯកភាពលើការបោះផ្សាយលក់មូលបត្រកម្មសិទ្ធិលើកដំបូងជាសាធារណៈរបស់ក្រុមហ៊ុននេះ។
ក្រុមហ៊ុន JS LAND Plc ត្រូវបានបង្កើតឡើងដោយក្រុមសហគ្រិន ៥ រូបមកពីប្រទេសកម្ពុជា ម៉ាឡេស៊ី និងហុងកុង។ ក្រុមហ៊ុន JS Land ត្រូវបានដាក់បញ្ចូលកាលពីថ្ងៃទី ១២ ខែធ្នូ ឆ្នាំ ២០១៤ ជាក្រុមហ៊ុនមានកម្រិតឯកជនស្ថិតក្រោមច្បាប់ស្ដីពីសហគ្រាសពាណិជ្ជកម្មកម្ពុជា៕ LA