ភ្នំពេញៈ ឥណទាននៅក្នុងវិស័យហិរញ្ញវត្ថុនៅត្រីមាសទី ២ ឆ្នាំនេះបន្តធា្លក់ចុះដោយសារតែការបារម្ភការរីករាលដាលជំងឺកូវីដ ១៩ ឆ្លងក្នុងសហគមន៍ ដែលកំពុងប៉ះពាល់ដល់សកម្មភាពសេដ្ឋកិច្ច។
យោងតាមរបាយការណ៍ពីការិយាល័យ ឥណទានកម្ពុជា (CBC) នៅត្រីមាសទី ២ ឆ្នាំ ២០២១ ចំនួនអ្នកប្រើប្រាស់ដែលព្យាយាមទទួលបានឥណទានក្នុងទម្រង់ ៣ ផ្សេងគ្នាគឺពាក្យស្នើសុំឥណទានលក្ខណៈបុគ្គល បណ្ណឥណទាន ឬកម្ចីអចលនទ្រព្យបានធ្លាក់ចុះជារួម -៣៤ ភាគរយ។ ចំនួននៃពាក្យស្នើសុំកម្ចីសម្រាប់ប្រើប្រាស់ផ្ទាល់ខ្លួនធ្លាក់ចុះ ច្រើនជាងគេគឺ -៣៤ ភាគរយជាមួយការធ្លាក់ចុះខ្លាំង-៣៧ ភាគរយ នៅតំបន់ទំនាប។ ការដាក់ពាក្យស្នើសុំកម្ចីអចលនទ្រព្យបានធ្លាក់ចុះ -៣២ ភាគរយ ចំណែកការដាក់ពាក្យស្នើសុំបណ្ណឥណទានបានធ្លាក់ចុះ -២៥ ភាគរយបើធៀបនឹងត្រីមាសមុន។
ទន្ទឹមនឹងនេះ ចំនួនគណនីឥណទាន លក្ខណៈបុគ្គលសរុបមានការធ្លាក់ចុះចំនួន -០,៤០ ភាគរយដែលនាំឱ្យចំនួនគណនីសរុបមានចំនួន ១,៣០ លាន។ សមតុល្យសរុបកើនឡើង +៣,៤២ ភាគរយឈានដល់ ១០,៣៧៥ ពាន់លានដុល្លារនៅចុងត្រីមាសនេះ។
លោក អឿ សុធារ័ត្ន ប្រធាននាយកប្រតិបត្តិនៃក្រុមហ៊ុនក្រេឌីត ប្យួរ៉ូ ខេមបូឌា ខូ អិលធីឌី បានទទួលស្គាល់ថា ទីផ្សារឥណទានបន្តធ្លាក់ចុះដោយសារការរីករាលដាលជំងឺកូវីដ ១៩។
លោក អឿ សុធារ័ត្ន បានថ្លែងថា៖ «ដូចគ្នានឹងឆ្នាំមុនៗដែរ ទីផ្សារឥណទានបុគ្គលនៅក្នុងត្រីមាសទី ២ តែងមានការថមថយចុះ។ យ៉ាងណាមិញ ទំហំនៃការធ្លាក់ចុះនៃកំណើនការស្នើសុំឥណទានទាំងចំនួន និងទំហំទឹកប្រាក់មានកម្រិតទាបជាងកាលពីត្រីមាសដូចគ្នាក្នុងឆ្នាំ ២០២០ ដែលជាឆ្នាំចាប់ផ្តើមទទួលរងឥទ្ធិពលនៃការរាតត្បាតជំងឺកូវីដ ១៩ លើពិភពលោក»។
លោកបន្ថែម៖ «អនុបាតនៃគណនីប្រាក់កម្ចីជាមួយនឹងការសងយឺត ៣០ ថ្ងៃហួសកាលបរិច្ឆេទកំណត់បានកើនឡើងដល់ ២,៥៧ ភាគរយដែលបង្ហាញពីការធ្លាក់ចុះបន្តិចនៃគុណភាពឥណទានធៀបនឹងត្រីមាសមុន»។
លោក សាយ សូនី នាយកប្រតិបត្តិជាន់ខ្ពស់បានប្រាប់ភ្នំពេញប៉ុស្តិ៍កាលពីថ្ងៃទី ៤ ខែសីហាថា វិស័យហិរញ្ញវត្ថុបានរងផលប៉ះពាល់ដោយសារសកម្មភាពអាជីវកម្មភាគច្រើនធ្លាក់ចុះ ឬពន្យារពេលការពង្រីកអាជីវកម្មរបស់ពួកគេ។
លោកថ្លែងថា៖ «ពិតប្រាកដណាស់ ឥណទានលក្ខណៈបុគ្គលបានធ្លាក់ចុះ ដោយសារតែការផ្ទុះការរីករាលដាលជំងឺកូវីដ ១៩ នៅក្នុងព្រឹត្តិការណ៍សហគមន៍ទាំង ២ ទោះយ៉ាងណាសម្រាប់ប្រាសាក់ យើងនៅតែអាចគ្រប់គ្រងបាន ហើយអាជីវកម្មរបស់យើងល្អប្រសើរ នៅក្នុងពេលវេលាដ៏ពិបាកនេះ បន្ទាប់ពីរដ្ឋាភិបាល និងធនាគារជាតិនៃកម្ពុជាផ្ដល់ការណែនាំជាពិសេសដល់ពួកយើងត្រូវបន្តផ្ដល់កម្ចីអនុវត្តឱ្យបានល្អបំផុតដើម្បីជួយអតិថិជនរបស់យើង»។
ទោះយ៉ាងណា លោក សូនី ក៏បារម្ភថា ដោយសារតែប្រទេសកម្ពុជាមិនបានបញ្ចប់ព្រឹត្តិការណ៍ ២០ កុម្ភៈ ហើយនៅពេលនេះការរីករាលដាលនៃជំងឺកូវីដ ១៩ បំប្លែងថ្មី Delta កំពុងរីករាលដាលនៅកម្ពុជាដែលនឹងអាចបន្តប៉ះពាល់ដល់សេដ្ឋកិច្ចផងដែរ។
លោកលើកឡើងថា៖ «ការរីករាលដាលនោះនឹងប៉ះពាល់ដោយផ្ទាល់ដល់កម្រិតម៉ាក្រូ ដែលអ្នកអាចមើលឃើញការព្យាករកំណើនសេដ្ឋកិច្ចថ្មីប្រហែល ២ ភាគរយ។ ទោះយ៉ាងណា យើងអាចមើលឃើញរដ្ឋាភិបាល តាមរយៈអាជ្ញាធរពាក់ព័ន្ធកំពុងខិតខំយ៉ាងខ្លាំង ដើម្បីបញ្ចប់ព្រឹត្តិការណ៍នេះ និងបញ្ឈប់ការរីករាលដាលវីរុស Delta និងយុទ្ធនាការចាក់វ៉ាក់សាំងដោយជោគជ័យ ដូច្នេះយើងសង្ឃឹមថា ស្ថានការណ៍នឹងវិវឌ្ឍកាន់តែប្រសើរ។ នៅក្នុងករណីប្រាសាក់ យើងប្ដេជ្ញាចិត្ត និងបន្តរីកចម្រើនជាមួយនឹងអតិថិជនរបស់យើង»។
យោងតាម CBC ការផ្លាស់ប្តូរជាភាគរយនៃចំនួនប្រាក់កម្ចីដែលបានស្វែងរកតាមរយៈការស្នើសុំឥណទានក៏បានធ្លាក់ចុះ -៣៥ ភាគរយដែលខ្ពស់ជាងត្រីមាសមុន (ត្រីមាសទី ១ ឆ្នាំ ២០២១ ធ្លាក់ចុះ -៦ ភាគរយ) ដែលជាកម្រិតទាប បើធៀបត្រីមាសដូចគ្នាកាលពីឆ្នាំមុន (ត្រីមាសទី ២ ឆ្នាំ ២០២០ ធ្លាក់ចុះ -៤៧ ភាគរយ)។ ការធ្លាក់ចុះនេះ ដោយសារតែការធ្លាក់ចុះចំនួននៃការដាក់ពាក្យនៅគ្រប់ប្រភេទផលិតផលទាំងអស់ ដូចជាឥណទានបុគ្គលធ្លាក់ចុះ -៣៩ ភាគរយ ប័ណ្ណឥណទានធ្លាក់ចុះ -២៧ ភាគរយ និងកម្ចីអចលនទ្រព្យធ្លាក់ចុះ -១៧ ភាគរយ៕ LA