.jpg)
អង្គការសហប្រជាជាតិដើម្បីអភិវឌ្ឍន៍ឧស្សាហកម្ម និងរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ បានប្រកាសដាក់ឱ្យដំណើរការជាផ្លូវការកម្មវិធីគាំទ្រសហគ្រាសជលផលខ្នាតមីក្រូ តូច និងមធ្យម កាលពីថ្ងៃទី ៣ សីហា។ រូបថត UNIDO
ភ្នំពេញៈ អង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO) និងរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ បានប្រកាសដាក់ឱ្យដំណើរការជាផ្លូវការកម្មវិធីគាំទ្រសហគ្រាសជលផលខ្នាតមីក្រូ តូច និងមធ្យម (VCIS) ដើម្បីជួយគាំទ្រដល់សហគ្រាសកែច្នៃផលិតផលជលផលក្រោយប្រមូលផលនៅកម្ពុជា។
VCIS គាំទ្រដល់សហគ្រិនកម្ពុជាពិសេសសហគ្រាសគ្រប់គ្រងដោយស្ត្រី និងយុវជន ដើម្បីលើកកម្ពស់ដល់ប្រតិបត្តិការអាជីវកម្មឱ្យឆ្លើយតបនឹងតម្រូវការស្តង់ដាសុវត្ថិភាពចំណីអាហារ និងតម្រូវការទីផ្សារ ព្រមទាំងបង្កើនការប្រកួតប្រជែងផលិតផល ក៏ដូចជាការចូលទៅទីផ្សារជាតិ និងអន្តរជាតិឱ្យបានកាន់តែប្រសើរ។
កម្មវិធី VCIS នៃ CAPFISH-Capture គម្រោងអភិវឌ្ឍន៍ជលផលក្រោយប្រមូលផលត្រូវបានសហការអនុវត្តរួមគ្នារវាងអង្គការ UNIDO និងរដ្ឋបាលជលផល ក្រោមការគាំទ្រថវិកាពីសហភាពអឺរ៉ុប។
លោក សុខ ណារិន តំណាងប្រចាំប្រទេសរបស់ UNIDO បាននិយាយក្នុងពេលដាក់ឱ្យដំណើរការកម្មវិធី VCIS កាលពីថ្ងៃទី ៣ ខែសីហាថា កម្មវិធីនេះនឹងផ្តល់ផលប្រយោជន៍ផ្ទាល់ និងប្រយោលដល់សហគ្រាសខ្នាតមីក្រូ តូច និងមធ្យម (MSMEs) ប្រមាណ ៥០០ រួមទាំងក្រុមអ្នកផលិត សហគមន៍អ្នកផលិតនៅក្នុងខ្សែចង្វាក់តម្លៃផលិតផលជលផល។
លោកលើកឡើងថា៖ «ដូចអ្នកដឹងហើយថា ខ្សែចង្វាក់តម្លៃផលិតផលជលផលនៅកម្ពុជាមានភាពស្មុគស្មាញ និងមានមុខងារច្រើន។ តួអង្គពាក់ព័ន្ធភាគច្រើនជាអាជីវកម្មក្រៅប្រព័ន្ធ និងភាគច្រើនលើសលប់ជាអ្នកកែច្នៃតូចៗ ដែលជាទូទៅកំពុងដំណើរការអាជីវកម្មដោយមិនទាន់បានចុះបញ្ជី ហើយភាគច្រើនគ្រប់គ្រងដោយស្ត្រី»។
លោកបន្តថា VCIS នឹងផ្តល់ការគាំទ្រផ្នែកបរិក្ខារ និងបច្ចេកទេសដល់អាជីវកម្មសហគ្រាស MSMEs ដើម្បីកែលម្អប្រតិបត្តិការអាជីវកម្មរបស់ពួកគេ និងអនុវត្តតាមស្តង់ដាសុវត្ថិភាពចំណីអាហារឆ្លើយតបទៅនឹងតម្រូវការទីផ្សារ និងបង្កើនភាពប្រកួតប្រជែង។
រដ្ឋមន្ត្រីកសិកម្ម រុក្ខាប្រមាញ់ និងនេសាទ លោក វេង សាខុន កាលពីខែមិថុនាបាននិយាយថា ក្រោមហិរញ្ញប្បទានពីសហភាពអឺរ៉ុបការអនុវត្តកម្មវិធីជំរុញកំណើនវិស័យជលផលប្រកបដោយចីរភាព និងបរិយាប័ន្នផ្នែកនេសាទ និងផ្នែកវារីវប្បកម្មនៅកម្ពុជា (CAPFISH Programme) បានសម្រេចតាមផែនការ និងកំពុងពិនិត្យលទ្ធភាពបន្តសកម្មភាព និងវិធានការថ្មីៗទៀតដើម្បីជំរុញវិស័យនេះឱ្យរីកចម្រើន។
លោកថ្លែងថា៖ «ខ្ញុំសូមកោតសរសើរចំពោះកិច្ចសហការ និងគាំទ្រពីសហភាពអឺរ៉ុបស្ថាប័នពាក់ព័ន្ធដើម្បីចូលរួមជំរុញផលិតភាពផលិតកម្មវារីវប្បកម្ម និងធ្វើឱ្យវិស័យនេះរីកចម្រើន»៕ LA
