ភ្នំពេញៈ សាជីវកម្មខ្សែចង្វាក់អាហារនៅក្នុងស្រុក United Food Group (UFG) បាននាំយកយីហោ Pizza Hut ដែលជាខ្សែចង្វាក់អាហាររហ័សមានមូលដ្ឋាននៅអាមេរិកមកកម្ពុជា ដោយគ្រោងនឹងចាប់ផ្ដើមដំណើរការនៅក្នុងខែសីហានេះ។
ការមកដល់របស់ Pizza Hut បានឆ្លុះបញ្ចាំងពីការពង្រីកវត្តមានអាជីវកម្មរបស់អាមេរិកមកកាន់កម្ពុជា។
យោងតាមសេចក្ដីប្រកាសព័ត៌មានកាលពីថ្ងៃទី ៥ ខែ សីហា ឆ្នាំ ២០២១ Pizza Hut ត្រូវបានគ្រប់គ្រងដោយ Yum Brands Inc ដែលជាក្រុមហ៊ុនភោជនីយដ្ឋានអាមេរិកដ៏ល្បីល្បាញមួយ។ បច្ចុប្បន្ន Pizza Hut មានហាងចំនួន ១៨ ៧០៣ កន្លែង នៅប្រទេសជាង ១០០ ទូទាំងពិភពលោក។
លោក ហេង ស៊ាងលី ប្រធានផ្នែកប្រតិបត្តិការរបស់ក្រុមហ៊ុន UFG បានឱ្យដឹងថា ហាងលក់ដំបូងរបស់ Pizza Hut នឹងបើកដំណើរការនៅទីប្រជុំជនដែលសម្បូរទៅដោយជនជាតិបរទេស និងមជ្ឈមណ្ឌលពាណិជ្ជកម្មនៅជិតផ្សារទួលទំពូង នាពាក់កណ្ដាលខែសីហានេះ ហើយហាងលក់ចំនួន ២ ផ្សេងទៀតនឹងបើកដំណើរការនៅត្រីមាសទី៣ ឆ្នាំនេះ។ UFG ក៏គ្រោងនឹងបើកដំណើរការហាងលក់ចំនួន ៣០ កន្លែងទៀតនៅក្នុងរយៈពេលពី ២ ទៅ ៣ ឆ្នាំខាងមុខ។
លោកថ្លែងថា៖ «ចំនួនប្រជាជនវ័យក្មេងកម្ពុជា រួមចំណែកយ៉ាងសកម្មនៃការបង្កើតប្រាក់ចំណូលដែលកំពុងកើនឡើងយ៉ាងរហ័ស ហើយពួកគេចង់បានផលិតផលមានយីហោល្បីៗដើម្បីឆ្លើយតបនឹងជីវិតបែបស៊ីវីល័យរបស់ពួកគេ។ យើងជឿថា Pizza Hut នឹងក្លាយជាជម្រើសយីហោភីហ្សាក្នុងចំណោមយុវវ័យខ្មែរ ហើយយើងមានគោលបំណងលើកកម្ពស់វប្បធម៌ញ៉ាំភីហ្សាដ៏ទំនើបដល់ប្រទេសកម្ពុជា តាមរយៈការផ្ដល់យីហោភីហ្សាថ្នាក់ពិភពលោកដល់អតិថិជននៅក្នុងតម្លៃស្រដៀងគ្នាជាមួយនឹងយីហោដែលមានស្រាប់»។
កាលពីខែតុលា ឆ្នាំមុន ហាងបឺហ្គ័ររបស់អាមេរិក The Habit Burger Grill ដែលមានមូលដ្ឋាននៅក្នុងរដ្ឋកាលីហ្វ័រនីញ៉ាបានបើកដំណើរការហាងលក់ដំបូងរបស់ខ្លួននៅប្រទេសកម្ពុជា ក្នុងភាពជាដៃគូជាមួយស្ថានីយប្រេងឥន្ធនៈ Kampuchea Tela។
យោងតាមការព្យាករដោយ UFG ទីផ្សារ Pizza នៅកម្ពុជាបានបង្កើតប្រាក់ចំណូលយ៉ាងហោច ១០០ លានដុល្លារកាលពីឆ្នាំ ២០១៩។ ទីផ្សារនេះត្រូវបានប៉ាន់ប្រមាណថា នឹងកើនឡើងពី ១៥ ទៅ ២០ ភាគរយប្រចាំឆ្នាំ ខណៈកម្រិតការប្រើប្រាស់របស់ប្រជាជនកម្ពុជាកើនឡើងប្រចាំឆ្នាំស្របគ្នានឹងកំណើនសេដ្ឋកិច្ច និងលំហូរចូលការវិនិយោគផ្ទាល់បរទេសមានចំនួនកាន់តែច្រើន។
United Food Group (UFG) ក៏ជាម្ចាស់ភោជនីយដ្ឋាន Park Cafe ដែលកំពុងប្រតិបត្តិការហាង ២០ នៅក្នុងប្រទេសកម្ពុជាផងដែរ។
ក្នុងអំឡុងពេលតាំងពិព័រណ៍ Cambodia Franchise Expo កាលពីថ្ងៃទី ៥ ខែឧសភា ដែលរៀបចំដោយស្ថានទូតអាមេរិកប្រចាំទីក្រុងភ្នំពេញ ក្រុមហ៊ុនពាណិជ្ជសញ្ញាអាមេរិកល្បីៗចំនួន ៩ កំពុងស្វែងរកឱកាសអាជីវកម្ម និងការពង្រីកចូលមកប្រទេសកម្ពុជា ដើម្បីបង្កើតទីតាំងឈរជើងជាមូលដ្ឋានដ៏រឹងមាំនៅក្នុងតំបន់។
លោក Anthony Galliano ប្រធាន AmCham បានប្រាប់ភ្នំពេញ-ប៉ុស្ដិ៍កាលពីខែឧសភាថា មានការយល់ដឹងកើនឡើងអំពីយីហោ និងស្ដង់ដាអាមេរិក និងការគាំទ្រការលក់ផលិតផល និងសេវាកម្មអាមេរិកនៅកម្ពុជា។
ក្រុមហ៊ុនយីហោល្បីៗទាំងនោះរួមមាន ក្រុមហ៊ុន Starbucks ក្រុមហ៊ុន Burger King ក្រុមហ៊ុន KFC ក្រុមហ៊ុន 7-Eleven ក្រុមហ៊ុន Domino''s ក្រុមហ៊ុន Century 21 ក្រុមហ៊ុន Papa John''s ក្រុមហ៊ុន Marriott ក្រុមហ៊ុន Hyatt និងក្រុមហ៊ុន KFC ជាឧទាហរណ៍នៃសិទ្ធិធ្វើអាជីវកម្ម «ប្រកបដោយជោគជ័យខ្លាំងបំផុត» នៅក្នុងប្រទេសកម្ពុជា។
ទិន្នន័យចុងក្រោយពីការិយាល័យពាណិជ្ជកម្មអាមេរិកបង្ហាញថា កម្ពុជានាំចេញទៅប្រទេសដែលមានសេដ្ឋកិច្ចឈានមុខគេរបស់ពិភពលោកមួយនេះកើនឡើងខ្ពស់បំផុតកាលពីឆ្នាំមុន គឺកើនឡើង ៤០ ភាគរយដល់ ៥,៣៦ ពាន់លានដុល្លារ។
ប្រទេសកម្ពុជា គឺជាដៃគូពាណិជ្ជកម្មទំនិញឈានមុខគេទី៦៦ របស់អាមេរិកកាលពីឆ្នាំ ២០១៨ សម្រេចបានពាណិជ្ជកម្មទ្វេភាគីចំនួន ៤,៣ ពាន់លានដុល្លារ៕ LA