.jpg)
កសិករកំពុងដើរប្រមូលផលម្រេចក្នុងចម្ការម្រេចមួយកន្លែង ក្នុងខេត្តរតនគិរី។ ហុង មិនា
ភ្នំពេញៈ កម្ពុជាបាននាំចេញម្រេចចំនួនជាង ២ ម៉ឺនតោនក្នុងរយៈពេល ៧ ខែ ដើមឆ្នាំ ២០២១ កើនជាង ៥៥០ ភាគរយធៀបនឹងរយៈពេលដូចគ្នាកាលពីឆ្នាំមុន ខណៈវៀតណាមជាទីផ្សារឈានមុខគេ។
បើយោងតាមទិន្នន័យរបស់ក្រសួងកសិកម្ម រុក្ខាប្រមាញ់ និងនេសាទចាប់ពីខែមករា ដល់ខែកក្កដា កម្ពុជានាំចេញម្រេចមិនមែន GI និងម្រេចកំពត (GI) សរុបចំនួន ២២ ៥៨០,៦៨ តោន កើន ៥៥៨,១៩ ភាគរយធៀបរយៈពេលដូចគ្នាកាលពីឆ្នាំ ២០២០។
ផលិតផលម្រេចកម្ពុជាបាននាំចេញទៅ ១៩ ប្រទេសលើពិភពលោកក្នុងនោះវៀតណាម គឺជាទីផ្សារធំជាងគេ ដោយមានបរិមាណ ២២ ២១៧ តោនតាមពីក្រោយដោយអាល្លឺម៉ង់ ២៤៤,៥៧ តោន បារាំង ២០,១៤ តោន និងបែលហ្ស៊ិក ចំនួន ១៥,៩៨ តោន។
លោក ម៉ាក នី ប្រធានសហព័ន្ធម្រេច និងគ្រឿងទេសកម្ពុជា (CPSF) បានឱ្យដឹងថា ម្រេចមិនមែន GI របស់កម្ពុជាបានពឹងផ្អែកទីផ្សារវៀតណាមស្ទើរទាំងស្រុង។ លោកអះអាងថា៖ «យើងដឹងហើយថា រាល់ថ្ងៃនេះទីផ្សាររបស់យើងពឹងផ្អែកលើប្រទេសវៀតណាមពី ៧០ ទៅ ៩០ ភាគរយ ព្រោះក្រុមហ៊ុនក្នុងស្រុកយើងរកដៃគូទិញអត់បាន អ៊ីចឹងយើងពឹងផ្អែកលើក្រុមហ៊ុនធំដែលគេបោះទីតាំងគោលនៅប្រទេសវៀតណាម ខណៈក្រុមហ៊ុនទិញពីយើង គេយកទៅកែច្នៃនៅទីនោះបន្ត»។
លោកថ្លែងថា៖ «ក្នុងនាមជាសហព័ន្ធយើងចង់ឱ្យមានការនាំចេញដោយផ្ទាល់ពីស្រុកខ្មែរ ប៉ុន្តែពាក់ព័ន្ធនឹងតម្លៃដឹកជញ្ជូនគឺថ្លៃជាងនៅវៀតណាម ហេតុនេះក្រុមហ៊ុនខ្លះគេមិនចង់មករកស៊ីនៅស្រុកយើងទេ»។
លោកបន្ថែមថា សម្រាប់ម្រេចកំពត GI ភាគច្រើនត្រូវបាននាំទៅទីផ្សារអឺរ៉ុប ខណៈទីផ្សារម្រេចធម្មតាក្រៅពីវៀតណាម គឺទីផ្សារ ១ ផ្នែកទៅកាន់តំបន់មជ្ឈិមបូព៌ា។ លោកនិយាយថា៖ «យើងសង្ឃឹមថា នឹងទទួលបានទីផ្សារប្រទេសចិនសម្រាប់ម្រេចមិនមែន GI ប៉ុន្តែចិនមិនទាន់បើកភ្លើងបៃតងទេ»។
លោក ងួន ឡាយ ប្រធានសមាគមលើកកម្ពស់ម្រេចកំពត GI បានលើកឡើងថា ទីផ្សារម្រេច GI នាពេលនេះមានសម្ទុះឡើងគួរឱ្យកត់សម្គាល់ដោយបាននាំចេញប្រមាណ ៦០ តោន ក្នុងរយៈពេល ៧ ខែដើមឆ្នាំ ២០២១ នេះ។ លោកប្រាប់ថា៖ «ការបញ្ជាទិញរបស់អតិថិជនពីបណ្តាក្រុមហ៊ុននាំចេញមានការកើនឡើង»។
តម្លៃម្រេចកំពត GI មិនមានការប្រែប្រួលទេ ដោយម្រេចខ្មៅមានតម្លៃ ១៥ ដុល្លារ ម្រេចក្រហម ២៥ ដុល្លារ និងម្រេចស ២៨ ដុល្លារ ក្នុង ១ គីឡូក្រាម។ កាលពីឆ្នាំ ២០២០ ម្រេចកំពត ៧០ តោនត្រូវបានទិញដោយក្រុមហ៊ុននាំចេញ។ សព្វថ្ងៃនេះម្រេចកំពតត្រូវបាននាំទៅកាន់បណ្តាប្រទេសជាង ៥០ ភាគច្រើនស្ថិតនៅទ្វីបអឺរ៉ុប។ នេះបើតាមលោក ងួន ឡាយ។
ផ្អែកលើប្រព័ន្ធទិន្នន័យគ្រឹះភូតគាមអនាម័យជាតិនៃអគ្គនាយកដ្ឋានកសិកម្ម ក្នុងរយៈពេល ៧ ខែ ឆ្នាំ ២០២១ កម្ពុជាបាននាំចេញកសិផលទៅក្រៅប្រទេសសរុប ៥ ០៣២ ៩៦៨,៦០ តោនទៅកាន់ទិសដៅ ៦៤ ប្រទេស កើន ២ ៣៤២ ៩៨១,៣៩ តោន ស្មើនឹង ៨៧,១០ ភាគរយ បើធៀបនឹងរយៈពេលដូចគ្នាឆ្នាំមុន។
ផលិតផលសំខាន់ៗមានដូចជា អង្ករ ស្រូវ ចេកស្រស់ ម្រេច ដំឡូងមី គ្រាប់ស្វាយចន្ទី គ្រាប់ពោត សណ្តែកសៀង សណ្តែកបាយ ប្រេងដូង ថ្នាំជក់ ម្ទេស ជាដើម៕ LA
