ភ្នំពេញៈ ការសិក្សាស្រាវជ្រាវមួយរបស់អគ្គនាយកដ្ឋានគ្រប់គ្រងឧស្សាហកម្មទេសចរណ៍នៃក្រសួងទេសចរណ៍បានបង្ហាញថា «ទេសចរណ៍បាតសមុទ្រ» គឺជាផលិតផលទេសចរណ៍ថ្មីដ៏មានសក្តានុពលនៅតំបន់ឆ្នេរសមុទ្ររបស់ប្រទេសកម្ពុជា ដែលចាំបាច់ត្រូវការជំរុញលើកកម្ពស់បន្ថែម។
លោក គន្ធា ភិរម្យ ប្រធានការិយាល័យជំរុញទេសចរណ៍ក្នុងស្រុកនៃក្រសួងទេសចរណ៍ ដែលជាអ្នកធ្វើការស្រាវជ្រាវបានពន្យល់ថា ទេសចរណ៍បាតសមុទ្រសំដៅទៅដល់សកម្មភាពរបស់មនុស្សដែលធ្វើដំណើរចេញពីកន្លែងរស់នៅប្រចាំថ្ងៃ ហើយទៅស្នាក់នៅយ៉ាងតិច ១ យប់នៅគោលដៅទេសចរណ៍ណាមួយ ដើម្បីចូលរួមក្នុងសកម្មភាពជ្រមុជទឹកមើលធនធានបាតសមុទ្រតាមរយៈឧបករណ៍ និងបច្ចេកទេស SCUBA។
ភាពទាក់ទាញទេសចរណ៍សំខាន់ៗនៅក្នុងវិស័យទេសចរណ៍បាតសមុទ្រ គឺជីវចម្រុះនៅបាតសមុទ្រ រួមមាន ផ្កាថ្មស្អាតៗប្រភេទត្រីតូច ធំចម្រុះពណ៌ និងសត្វសមុទ្រនានាដទៃទៀត។ លោកបន្តថា ទេសចរណ៍ប្រភេទនេះត្រូវពឹងផ្អែកខ្លាំងលើសម្ភារឧបករណ៍សម្រាប់ចុះមុជទឹកជ្រៅ ដែលតម្រូវឱ្យមានការធានានូវសុវត្ថិភាពខ្ពស់។ ទេសចរណ៍បាតសមុទ្រត្រូវពឹងផ្អែកមួយផ្នែកពីបច្ចេកវិទ្យាដែលអាចអនុញ្ញាតឱ្យពួកគេដកដង្ហើមបានក្នុងទឹកដោយបំពង់អុកស៊ីហ្ស៊ែន និងសម្ភារជំនួយដទៃទៀត។
លោកលើកឡើងថា៖ «ភ្ញៀវទេសចរដែលចង់ចូលរួមក្នុងសកម្មភាពមុជទឹកនេះតម្រូវឱ្យមានវិញ្ញាបនបត្រចូលរួមវគ្គបណ្តុះបណ្តាលពីរបៀបជ្រមុជទឹក និងត្រូវទទួលស្គាល់ដោយមជ្ឈមណ្ឌលបណ្តុះបណ្តាលផ្លូវការណាមួយ»។
អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានប្រាប់ ភ្នំពេញ ប៉ុស្តិ៍ថា បណ្តាកោះនានានៅកម្ពុជាសុទ្ធតែមានសក្តានុពលសម្រាប់ទេសចរណ៍បាតសមុទ្រ ព្រោះសម្បូរដោយធនធានជីវចម្រុះក្រោមបាតសមុទ្រ ដែលជាទីទាក់ទាញចំណាប់អារម្មណ៍ភ្ញៀវទេសចរ។
អ្នកស្រីឱ្យដឹងថា៖ «បើយើងមានការជំរុញទេសចរណ៍បាតសមុទ្រថែមទៀត វានឹងក្លាយជាផលិតផលថ្មីមួយកាន់តែមានភាពទាក់ទាញ ព្រោះយើងមានតំបន់ឆ្នេរសមុទ្រស្រស់ស្អាតជាច្រើនរួចទៅហើយ។ យើងស្វាគមន៍ចំពោះការវិនិយោគលើទេសចរណ៍បាតសមុទ្រនៅប្រទេសកម្ពុជា»។
លោក ភិរម្យ បានឱ្យដឹងទៀតថា ប្រធានបទដែលកម្ពុជាគួរសិក្សាបន្តក្នុងវិស័យទេសចរណ៍បាតសមុទ្ររួមមាន ការស្វែងរកចំណែកទីផ្សារទេសចរណ៍ (ទីផ្សារទេសចរជាតិ និងអន្តរជាតិ) សម្រាប់សកម្មភាពទេសចរណ៍បាតសមុទ្រកម្ពុជា។ ការជំរុញលើកទឹកចិត្តសម្រាប់ប្រតិបត្តិករទេសចរណ៍លើសេវាកម្មទេសចរណ៍បាតសមុទ្រ ឱកាសការងារ និងប្រាក់ចំណូលពីអាជីវកម្មទេសចរណ៍បាតសមុទ្រ។
លោកអះអាងថា៖ «មកដល់ពេលនេះ គេមិនទាន់ឃើញមានការស្រាវជ្រាវណាដែលផ្តោតលើទេសចរណ៍បាតសមុទ្រក្នុងរូបភាព និងលក្ខណៈទូលំទូលាយនៅប្រទេសកម្ពុជានោះទេ។ វិស័យទេសចរណ៍ប្រភេទនេះគួរត្រូវបានជំរុញផ្សព្វផ្សាយឱ្យបានត្រឹមត្រូវ ព្រោះជាផលិតផលទេសចរណ៍ថ្មីមានសក្តានុពលបន្ថែមលើផលិតផលទេសចរណ៍ដែលមានស្រាប់»។
ប្រទេសកម្ពុជាមានឆ្នេរសមុទ្រលាតសន្ធឹងប្រវែង ៤៤០ គីឡូម៉ែត្រ ដោយរាប់បញ្ចូលខេត្តព្រះសីហនុ កោះកុង កំពត និងកែប។ ធនធានសមុទ្រយ៉ាងច្រើនអនេកមាននៅតាមតំបន់មាត់សមុទ្រ និងកោះនានា ពិសេសក្នុងខេត្តព្រះសីហនុ៕ LA
វីដេអូ៖