ភ្នំពេញ: ក្រសួងពាណិជ្ជកម្មកម្ពុជាបានអំពាវនាវចំពោះធុរជននៅកម្ពុជាឱ្យចូលរួមក្នុងកម្មវិធីតាំងពិព័រណ៍ពាណិជ្ជកម្ម និងវិនិយោគចិនអន្តរជាតិលើកទី២១ នៅប្រទេសចិន នៅខែកញ្ញាខាងមុខ។
លិខិតជូនដំណឹងក្រសួងពាណិជ្ជកម្ម ដែលផ្សព្វផ្សាយកាលពីថ្ងៃទី ៥ ខែសីហា ឱ្យដឹងថា គណៈកម្មការរៀបចំពិព័រណ៍ពាណិជ្ជកម្ម និងវិនិយោគិនអន្តរជាតិនៃទីក្រុង Xiamen ប្រទេសចិន នឹងបន្តរៀបចំពិព័រណ៍ពាណិជ្ជកម្ម និងវិនិយោគចិនអន្តរជាតិលើកទី២១ ដែលនឹងប្រព្រឹត្តទៅចាប់ពីថ្ងៃទី ៨-១១ ខែ កញ្ញា ឆ្នាំ ២០២១ នៅទីក្រុង Xiamen ខេត្ត Fujian សាធារណរដ្ឋប្រជាមានិតចិន។
សេចក្តីជូនដំណឹងបន្តថា គណៈកម្មការរៀបចំពិព័រណ៍ខាងលើសូមប្រកាសបើកទូលាយចំពោះបណ្តាធុរជន សហគ្រិន វិនិយោគិន និងអ្នកផ្តល់សេវាទាំងអស់ដែលមានចំណាប់អារម្មណ៍ចង់ចូលរួមក្នុងព្រឹត្តិការណ៍ពាណិជ្ជកម្ម និងវិនិយោគខាងលើ សូមអញ្ជើញចុះឈ្មោះចូលរួមតាមរយៈអាសយដ្ឋានវេបសាយ www.chinafair.org.cn។
ក្រសួងពាណិជ្ជកម្ម ក្នុងនាមអ្នកសម្របសម្រួលជាមួយគណៈកម្មការរៀបចំពិព័រណ៍នៃទីក្រុង Xiamen សូមអញ្ជើញបណ្ដាធុរជន សហគ្រិន វិនិយោគិន អ្នកផ្តល់សេវា និងសាធារណជនទូទៅដែលមានចំណាប់អារម្មណ៍ចង់ចូលរួមផ្សព្វផ្សាយផលិតផល សេវាកម្ម គម្រោងវិនិយោគ ឬស្វែងរកដៃគូពាណិជ្ជកម្មជាមួយភាគីចិនសូមអញ្ជើញចុះឈ្មោះចូលរួមតាមរយៈអាសយដ្ឋានវេបសាយខាងលើ ឬទំនាក់ទំនងដោយផ្ទាល់មកនាយកដ្ឋានកិច្ចការពិព័រណ៍ អគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម។
នៅក្នុងរយៈពេល ៥ ខែដំបូងដើមឆ្នាំ ២០២១ ការផ្លាស់ប្តូរពាណិជ្ជកម្មរវាងកម្ពុជា និងចិន មានតម្លៃសរុប ៣,៩ពាន់លានដុល្លារ កើនឡើង ២៥ ភាគរយ បើធៀបទៅនឹងរយៈពេលដូចគ្នាកាលពីឆ្នាំមុន។ នេះបើតាមសារព័ត៌មាន Global Times៕