ភ្នំពេញៈ សេចក្តីព្រាងច្បាប់ពាណិជ្ជកម្មសំខាន់ៗចំនួន ៣ ត្រូវរំពឹងថានឹងចូលជាធរមាននៅមុនដំណាច់ឆ្នាំនេះ បន្ទាប់ពីទទួលបានការគាំទ្រពីថ្នាក់ដឹកនាំរដ្ឋសភា ព្រឹទ្ធសភា និងគណៈកម្មការជំនាញនៃស្ថាប័នទាំង ២។ នេះបើយោងតាមអ្នកនាំពាក្យក្រសួងពាណិជ្ជកម្ម។
សេចក្តីព្រាងច្បាប់ទាំង ៣ រួមមាន សេចក្តីព្រាងច្បាប់ «ការអនុម័តយល់ព្រមលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (អាសិប)», សេចក្តីព្រាង «ការអនុម័តយល់ព្រមលើកិច្ចព្រមព្រៀងពាណិជ្ជកម្មសេរីរវាងរាជរដ្ឋាភិបាលកម្ពុជា-រដ្ឋាភិបាលសាធារណរដ្ឋប្រជាមានិតចិន», សេចក្តីព្រាងច្បាប់ «ការប្រកួតប្រជែង»។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកាលពីថ្ងៃទី ៣ ខែសីហា បានដឹកនាំក្រុមការងារអន្តរក្រសួងដើម្បីការពារសេចក្តីព្រាងច្បាប់នេះទៅកាន់ថ្នាក់ដឹកនាំរដ្ឋសភា ព្រឹទ្ធសភា និងថ្នាក់ដឹកនាំគណៈកម្មការជំនាញទាំង ១០ របស់រដ្ឋសភា ព្រឹទ្ធសភាតាមរយៈប្រព័ន្ធវីដេអូ។ ក្នុងឱកាសនោះ លោកលើកឡើងថា សេចក្តីព្រាងច្បាប់ទាំងអស់នេះដើរស្របនឹងយុទ្ធសាស្ត្រចតុកោណដំណាក់កាលទី ៤។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍ នាថ្ងៃទី ៥ ខែសីហា ថា បន្ទាប់ពីទទួលការឯកភាពទាំងស្រុងពីថ្នាក់ដឹកនាំរដ្ឋសភា ព្រឹទ្ធសភា និងគណៈកម្មការជំនាញទាំង ១០ របស់រដ្ឋសភា ព្រឹទ្ធសភា ក្រសួងពាណិជ្ជកម្មសង្ឃឹមថា ច្បាប់ទាំង ៣ នឹងត្រូវអនុម័តឱ្យប្រើប្រាស់ជាផ្លូវការនៅមុនដំណាច់ឆ្នាំនេះ។ លោកបន្តថា ច្បាប់នេះនឹងចូលរួមក្នុងការលើកកម្ពស់កំណើនសេដ្ឋកិច្ចកម្ពុជា ក៏ដូចជាការធ្វើសមាហរណកម្មសេដ្ឋកិច្ចកម្ពុជាទៅក្នុងតំបន់ និងពិភពលោក។
លោកអះអាងថា៖ «ក្រសួងសង្ឃឹមថា សេចក្តីព្រាងច្បាប់ទាំងនេះនឹងចូលជាធរមាននៅមុនដំណាច់ឆ្នាំនេះ»។
យោងតាមសេចក្តីប្រកាសព័ត៌មានពីក្រសួងពាណិជ្ជកម្ម កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (អាសិប) ដែលមានការចូលរួមពីប្រទេសសមាជិកអាស៊ានទាំង ១០ និងប្រទេសជាដៃគូពាណិជ្ជកម្មសំខាន់ៗផ្សេងទៀតដូចជា ចិន ជប៉ុន កូរ៉េ នូវែលសេឡង់ និងអូស្ត្រាលី គ្របដណ្តប់លើប្រជាជនប្រមាណ ២,២ ពាន់លាននាក់ ឬ ៣០ ភាគរយនៃចំនួនប្រជាជនពិភពលោក ដែលមានផលិតផលក្នុងស្រុកសរុបរួម ២៦,២ ពាន់ពាន់លានដុល្លារ ឬ ៣០ ភាគរយនៃផលិតផលក្នុងស្រុកសរុបរបស់ពិភពលោក និងមានចំនួនប្រមាណ ២៨ ភាគរយនៃទំហំពាណិជ្ជកម្មពិភពលោក (ទិន្នន័យឆ្នាំ ២០១៩)។ កម្ពុជាអាចនឹងមានកំណើនប្រចាំឆ្នាំពីការនាំចេញចំនួន ៧,៣ ភាគរយ វិនិយោគ ២៣,៤ ភាគរយ និងផលិតផលក្នុងស្រុកសរុបប្រមាណ ២ ភាគរយលើផលិតផលក្នុងស្រុកសរុបដែលមានបច្ចុប្បន្ន។
ចំណែកកិច្ចព្រមព្រៀងពាណិជ្ជកម្មសេរីកម្ពុជា-ចិន នឹងជួយកម្ពុជាទទួលបានទីផ្សារធំជាងមុន ពិសេសមុខទំនិញកសិផល បន្លែផ្លែឈើ ផលិតផលកែច្នៃ សិប្បកម្ម និងផលិតផលជាច្រើនទៀត តាមរយៈការសម្រួលផ្នែកពន្ធគយ និងវិធានដើមកំណើតទំនិញ ជាដើម។ រីឯច្បាប់ស្តីពីការប្រកួតប្រជែងនឹងជួយការពារ និងលើកទឹកចិត្តដល់ពាណិជ្ជករឱ្យធ្វើការប្រកួតប្រជែងដោយស្មើភាព និងស្មោះត្រង់ បង្កើនប្រសិទ្ធភាពសេដ្ឋកិច្ច និងទាក់ទាញការវិនិយោគ។
អនុប្រធានសភាពាណិជ្ជកម្មកម្ពុជាលោក លឹម ហេង បាននិយាយថា ការចូលជាធរមាននៃកិច្ចព្រមព្រៀងពាណិជ្ជកម្មសេរី ទោះបីលក្ខណៈតំបន់ ឬទ្វេភាគី គឺសុទ្ធតែផ្តល់ភាពវិជ្ជមានដល់សេដ្ឋកិច្ចជាតិ ព្រោះតាមរយៈនេះកម្ពុជាមិនត្រឹមតែទទួលបានទីផ្សារនាំចេញកាន់តែធំប៉ុណ្ណោះទេ ប៉ុន្តែថែមទាំងអាចជួយឱ្យសមត្ថភាពនៃការធ្វើពាណិជ្ជកម្មអន្តរជាតិរបស់កម្ពុជាកាន់តែខ្លាំង។ លោកបន្តថា ចំណែកច្បាប់ការប្រកួតប្រជែងក៏នឹងដើរតួនាទីក្នុងការរក្សានិរន្តរភាព និងទំនុកចិត្តសម្រាប់វិនិយោគិនផងដែរ។
លោកប្រាប់ថា៖ «នៅពេលច្បាប់ទាំងនេះចូលជាធរមាន កម្ពុជារំពឹងនឹងអាចទាក់ទាញវិនិយោគិនឱ្យចូលមកបណ្តាក់ទុនបានកាន់តែច្រើន»៕ LA