ភ្នំពេញ៖ ទោះបីការឆ្លងរាលដាលជំងឺកូវីដ ១៩ នៃព្រឹត្តិការណ៍សហគមន៍ ២០ កុម្ភៈ កំពុងបង្កផលប៉ះពាល់យ៉ាងច្រើនដល់ប្រតិបត្តិការអាជីវកម្មស្ទើរគ្រប់ផ្នែក ក៏ធនាគារអេស៊ីលីដា ភីអិលស៊ី ដែលជាគ្រឹះស្ថានហិរញ្ញវត្ថុទី១ ចុះបញ្ជីនៅផ្សារមូលបត្រកម្ពុជា (CSX) នៅតែរក្សាបាននូវកំណើនប្រាក់ចំណេញប្រមាណជិត ៣០ ភាគរយក្នុងឆមាសទី១ ឆ្នាំនេះ ធៀបនឹងរយៈពេលដូចគ្នាឆ្នាំ ២០២០។
របាយការណ៍ផ្ញើទៅ CXS កាលពីថ្ងៃទី ៦ ខែសីហា បង្ហាញថា ក្នុងឆមាសទី១ ឆ្នាំ ២០២១ ធនាគារអេស៊ីលីដា រកចំណូលបាន ២០៩,៧៦៥ លានដុល្លារ កើនឡើង ១១,៩ ភាគរយ ពីចំនួន ១៨៧,៤៥៦ កាលពីឆមាសទី១ ឆ្នាំ ២០២០។ ដោយឡែកប្រាក់ចំណេញ មានចំនួនជាង ៨១,១៩៧ លានដុល្លារ កើនឡើង ២៧,៣៨ ភាគរយ ពីចំនួន ៦៣,៧៤៤ លានដុល្លារ។
កាលពីឆ្នាំ ២០២០ អេស៊ីលីដា រកចំណូលបានជាង ៣៨៧ លានដុល្លារ កើនជាង ១០ ភាគរយ បើធៀបនឹងឆ្នាំ ២០១៩ ដែលមានចំនួនជាង ៣៥១ លានដុល្លារ និងទទួលបានប្រាក់ចំណេញជាង ១៤១ លានដុល្លារ។
ជាមួយនឹងបទពិសោធន៍ជាង ២៧ ឆ្នាំ ធនាគារអេស៊ីលីដា ភីអិលស៊ី បានចាប់ផ្តើមក្នុងនាមជាអង្គការមិនមែនរដ្ឋាភិបាលមួយកាលពីឆ្នាំ ១៩៩៣ ជាមួយដើមទុនវិនិយោគ ៦០០ ០០០ ដុល្លារ។ បច្ចុប្បន្នដើមទុនរបស់ធនាគារមួយនេះ បានកើនឡើង ៧០០ ដង ខណៈទ្រព្យសកម្មសរុបមានចំនួនប្រហែល ៦ ពាន់លានដុល្លារ កើនឡើងជាង ៩ ០០០ ដង និងប្រាក់ចំណេញសុទ្ធបានកើនឡើងជិត ២ ០០០ ដង។ នេះបើយោងតាមលោក អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា៕