.jpg)
លោកស្រី ចម និម្មល (ខាងលើស្តាំ) ចូលរួមក្នុងពិធីបើកវគ្គបណ្តុះបណ្តាល «មជ្ឈត្តការពាណិជ្ជកម្មនៅកម្ពុជា»។ ក្រសួងពាណិជ្ជកម្ម
ភ្នំពេញៈ បច្ចុប្បន្នមានពាក្យបណ្តឹងចំនួន ២៧ ត្រូវបានវិនិយោគិនដាក់មកកាន់មជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្មកម្ពុជា ដើម្បីឱ្យជួយដោះស្រាយទាក់ទងនឹងវិវាទការធ្វើពាណិជ្ជកម្ម។ នេះបើយោងតាមមន្ត្រីជាន់ខ្ពស់ក្រសួងពាណិជ្ជកម្ម។
ក្នុងឱកាសចូលរួមជាគណៈអធិបតីនៃពិធីបើកវគ្គបណ្តុះបណ្តាលស្តីពី «មជ្ឈត្តការពាណិជ្ជកម្មនៅកម្ពុជា» ដែលរៀបចំដោយវិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវ សហការជាមួយមជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្មតាមប្រព័ន្ធវីដេអូ Zoom កាលពីថ្ងៃទី ៥ ខែសីហា លោកស្រី ចម និម្មល រដ្ឋលេខាធិការក្រសួងពាណិជ្ជកម្ម បានលើកឡើងថា ស្ថិរភាពនយោបាយ និងលក្ខណៈអំណោយផលនៃបរិយាកាសវិនិយោគបានធ្វើឱ្យសកម្មភាពពាណិជ្ជកម្ម និងការបណ្តាក់ទុននៅកម្ពុជាកើនឡើងជាបន្តបន្ទាប់។ ទន្ទឹមនឹងភាពវិជ្ជមានទាំងនេះ បញ្ហាជម្លោះផ្នែកពាណិជ្ជកម្មក៏បានកើនឡើងផងដែរ ដោយរហូតមកដល់ពេលនេះមជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្មបានទទួលរឿងក្តីប្រមាណជិត ៣០ ករណី។
លោកស្រីថ្លែងថា៖ «កត្តាសន្តិភាព ស្ថិរភាពនយោបាយនៅក្នុងប្រទេស បរិយាកាសវិនិយោគមានភាពទាក់ទាញ និងលក្ខខណ្ឌអំណោយផលពីកត្តាខាងក្នុងនិងក្រៅបានធ្វើឱ្យសកម្មភាពពាណិជ្ជកម្ម និងការវិនិយោគកើនឡើងគួរឱ្យកត់សម្គាល់ ចំណែកវិវាទពាណិជ្ជកម្មក៏កើនឡើងដែរ រហូតមកដល់ពេលបច្ចុប្បន្នមជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្មទទួលបានរឿងក្តីចំនួន ២៧ ករណី»។
កាលពីថ្ងៃទី ២១ មករា ឆ្នាំ ២០២១ រដ្ឋមន្ដ្រីក្រសួងយុត្តិធម៌បានចុះហត្ថលេខាលើការបង្កើតគណៈកម្មាធិការរៀបចំតុលាការពាណិជ្ជកម្ម និងនៅថ្ងៃទី ២៤ ខែមិថុនា ភាគីពាក់ព័ន្ធ និងសភាពាណិជ្ជកម្មកម្ពុជាបានរៀបចំការពិគ្រោះយោបល់ ដើម្បីបង្កើនល្បឿនការបង្កើតតុលាការពាណិជ្ជកម្មនេះ។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ភ្នំពេញ-ប៉ុស្តិ៍កាលពីខែមិថុនាថា ក្រសួងយុត្តិធម៌កំពុងរៀបចំបង្កើតតុលាការពាណិជ្ជកម្មនៅ ៣ ទីតាំង ដែលនឹងត្រូវបង្កើតឡើងដំបូងនៅទីក្រុងភ្នំពេញ សៀមរាប និងខេត្តព្រះសីហនុ។
លោកថ្លែងថា៖ «យើងរំពឹងថាតុលាការពាណិជ្ជកម្មនឹងត្រូវបង្កើតឡើងត្រឹមចុងឆ្នាំនេះ ឬដើមឆ្នាំក្រោយ។ តុលាការនេះនឹងដើរតួនាទីដ៏សំខាន់ក្នុងការបង្កើនភាពជឿជាក់ និងទំនុកចិត្តក្នុងចំណោមពាណិជ្ជករ និងវិនិយោគិននៅពេលយើងមានតុលាការនេះក្នុងស្រុក»។
ជាមួយគ្នានេះលោកស្រី ចម និម្មល ក៏បានរំឭកដែរថា ឆ្នាំ ២០០៤ គឺជាព្រឹត្តិការណ៍ប្រវត្តិសាស្ត្រមួយដែលកម្ពុជាបានក្លាយជាសមាជិកអង្គការពាណិជ្ជកម្មពិភពលោក បន្ទាប់ពីការចរចាដែលចំណាយពេលជិត ១ ទសវត្សរ៍។ ការក្លាយជាសមាជិកពេញសិទ្ធិ WTO ជួយឱ្យកម្ពុជាទទួលបានសិទ្ធិ និងឱកាសជាច្រើនក្នុងការទាក់ទាញវិនិយោគិនបរទេសឱ្យចូលមកបណ្តាក់ទុន។ ប៉ុន្តែទន្ទឹមនឹងកំណើនពាណិជ្ជកម្មអន្តរជាតិ ឬលំហូរវិនិយោគនេះវិវាទផ្នែកពាណិជ្ជកម្មក៏មានកាន់តែច្រើនផងដែរ។
លោកស្រីលើកឡើងថា បើសិនធៀបទិន្នន័យនៃការបង្កើតក្រុមហ៊ុនថ្មីនៅឆ្នាំ ២០០៧ មានត្រឹមតែ ២ ៥៣៥ ក្រុមហ៊ុនប៉ុណ្ណោះ ប៉ុន្តែក្នុងឆ្នាំ ២០១៩ ការចុះបញ្ជីក្រុមហ៊ុនថ្មីមានរហូត ១៦ ២០៨ ក្រុមហ៊ុន។ ការកើនឡើងក្រុមហ៊ុនចុះបញ្ជីថ្មីនេះបង្ហាញពីភាពរីកចម្រើននៃសេដ្ឋកិច្ចកម្ពុជា៕ LA
