ភ្នំពេញៈ ការនាំផលិតផលសរីរាង្គពីកម្ពុជាទៅទីផ្សារអូស្ត្រាលីនឹងអាចមានសម្ទុះកាន់តែខ្លាំង បន្ទាប់ពីអគ្គនាយកដ្ឋានកសិកម្មកម្ពុជាបានចុះអនុស្សរណៈនៃការយោគយល់ (MoU) ជាមួយក្រុមហ៊ុនមកពីប្រទេសអូស្ត្រាលី Lexmin Pty Ltd Cambodia។ នេះបើយោងតាមលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
អគ្គនាយកដ្ឋានកសិកម្មនៃក្រសួងកសិកម្ម កាលពីថ្ងៃទី ៦ ខែសីហា បានចុះ MoU ជាមួយក្រុមហ៊ុន Lexmin Pty Ltd Cambodia ស្តីពី «ការជំរុញផលិតកម្មដំណាំតាមស្តង់ដាសរីរាង្គ និងការពង្រឹងសមត្ថភាពកសិករ ដើម្បីទទួលបានឱកាសការងារតាមកសិដ្ឋាននៅប្រទេសអូស្ត្រាលី»។
ក្នុងពេលធ្វើជាសាក្សីនៃការចុះ MoU ខាងលើលោក វេង សាខុន បានលើកឡើងថា នេះជាសមិទ្ធផលថ្មីមួយទៀតដែលក្រសួងកសិកម្ម តែងខិតខំធ្វើដើម្បីជួយជំរុញ និងលើកកម្ពស់ផលិតភាពដំណាំស្តង់ដាសរីរាង្គ ខណៈផលិតផលនេះកំពុងមាននិន្នាការកើនឡើងជាបន្តបន្ទាប់ទាំងបរិមាណ និងគុណភាពសម្រាប់ទីផ្សារក្នុងស្រុក និងអន្តរជាតិ។ លោកបន្តថា MoU នេះនឹងជួយឱ្យការអភិវឌ្ឍវិស័យកសិកម្មសរីរាង្គកម្ពុជាកាន់តែមានភាពរឹងមាំ និងរីកចម្រើន។
លោកថ្លែងថា៖ «ប្រាកដណាស់ MoU នេះនឹងជួយបំពេញនូវអត្ថប្រយោជន៍ឱ្យគ្នាទៅវិញទៅមកក្នុងការកសាងភាពជាដៃគូអភិវឌ្ឍន៍ខ្សែចង្វាក់តម្លៃផលិតកម្មដំណាំ ការកែច្នៃ ប្រកបដោយចីរភាព និរន្តរភាព បរិយាប័ន្ន ការប្រកួតប្រជែង ការប្រែប្រួលអាកាសធាតុ និងនវានុវត្តន៍ ជាពិសេសការអនុវត្ត MOU នេះពិតជានឹងរួមចំណែកអនុវត្តផែនការយុទ្ធសាស្ត្ររបស់ក្រសួងក្នុងការជំរុញផលិតភាព និងពិពិធកម្មដំណាំសរីរាង្គឱ្យកាន់តែល្អប្រសើរឡើង»។
លោកបន្ថែមថា MOU នេះនឹងចូលរួមលើកកម្ពស់ខ្សែចង្វាក់ផលិតកម្មកសិកម្ម ការកែច្នៃ តម្លៃបន្ថែម និងទីផ្សារក្នុង និងក្រៅប្រទេស បង្កើតឱកាសការងារ បង្កើនសមត្ថភាពបច្ចេកទេសដល់កសិករ បង្កើនប្រាក់ចំណូល និងស្របតាមអភិក្រម «រដ្ឋ-ឯកជន-ដៃគូអភិវឌ្ឍន៍-សហគមន៍កសិកម្ម» ផងដែរ។
ជាមួយគ្នានេះ លោកក៏លើកឡើងដែរថា ដើម្បីឱ្យ MOU កាន់តែមានប្រសិទ្ធភាព ក្រុមហ៊ុនគួរតែស្វែងរកជំនួយហិរញ្ញវត្ថុបន្ថែមពីរដ្ឋាភិបាលអូស្ត្រាលី សម្រាប់យកមកពង្រីកវិសាលភាពនៃផលិតកម្មរបស់ខ្លួនឱ្យអស់លទ្ធភាព ដើម្បីជំរុញ និងលើកកម្ពស់ផលិតកម្មដំណាំសរីរាង្គនៅកម្ពុជា និងធ្វើការនាំចេញ។
សម្រាប់ផែនការនាំកសិករខ្មែរទៅធ្វើការនៅប្រទេសអូស្ត្រាលី លោក សាខុន បាននិយាយថា សូមក្រុមហ៊ុនខិតខំឱ្យអស់ពីលទ្ធភាពក្នុងការពុះពារនាំយកពលករខ្មែរទៅបម្រើការងារក្នុងវិស័យកសិកម្មក្នុងប្រទេសអូស្ត្រាលីត្រឹមត្រូវ ស្របច្បាប់ ដើម្បីទទួលបានមេរៀន និងបទពិសោធល្អយកមកអភិវឌ្ឍកម្ពុជាឱ្យមានភាពរីកចម្រើន ហើយក្នុងករណីនេះក្រសួងនឹងរង់ចាំផ្តល់កិច្ចសហការគ្រប់បែបយ៉ាង។
កម្ពុជាបាននាំចេញកសិផលសរុបជាង ១៣ លានតោនកាលពីឆ្នាំ ២០២០ ឬស្មើនឹងជាង ៣,៤ ពាន់លានដុល្លារ។ នេះបើតាមក្រសួងកសិកម្ម៕ LA