.jpg)
វិស័យឯកជនស្នើឱ្យរដ្ឋពិនិត្យលក្ខខណ្ឌសម្រាប់ការធ្វើចត្តាឡីស័ក ដើម្បីរក្សាបាននិរន្តរភាពនៃអាជីវកម្មរបស់ពួកគេ។ ហេង ជីវ័ន
ភ្នំពេញៈ លក្ខខណ្ឌនៃការតម្រូវឱ្យធ្វើចតា្តឡីស័កសម្រាប់និវាសនជន ម្ចាស់អាជីវកម្ម និយោជិក និងវិនិយោគិន គឺជាបញ្ហាដ៏សំខាន់ដែលវិស័យឯកជន ស្នើឱ្យរដ្ឋាភិបាលជួយដោះស្រាយក្នុងអំឡុងពេលវេលាដ៏ពិបាកនៃវិបត្តិសុខភាព ដើម្បីរក្សាបាននិរន្តរភាពនៃអាជីវកម្មរបស់ពួកគេ។
កាលពីថ្ងៃទី ៣ ខែសីហា ឆ្នាំ ២០២១ លោក អូន ព័ន្ធមុនីរ័ត្ន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ ដែលជាសហប្រធានក្រុមការងារ «ឃ» តំណាងផ្នែករដ្ឋាភិបាល លោក គិត ម៉េង ប្រធានសភាពាណិជ្ជកម្មកម្ពុជា និងលោក Arnaud DARC សហប្រធានក្រុមការងារ «ឃ» តំណាងផ្នែកឯកជន និងជាសមាជិកគណៈកម្មាធិការប្រតិបត្តិរបស់សភាពាណិជ្ជកម្មអន្តរជាតិប្រចាំនៅកម្ពុជា (IBC) បានជួបប្រជុំគ្នាតាមប្រព័ន្ធអនឡាញ។
កិច្ចប្រជុំនេះបានផ្ដោតការយកចិត្តទុកដាក់លើលក្ខខណ្ឌតម្រូវធ្វើចត្តាឡីស័កសម្រាប់និវាសនជន ម្ចាស់អាជីវកម្ម និយោជិក និងវិនិយោគិន ដោយវិស័យឯកជន ចង់បានការកែតម្រូវដំណោះស្រាយនាពេលនេះ។ ទោះបីយ៉ាងណា រដ្ឋាភិបាលបានជូនដំណឹងថា នាពេលបច្ចុប្បន្ន គឺមិនមានការផ្លាស់ប្តូរណាមួយចំពោះគោលនយោបាយនោះទេ ប៉ុន្តែរដ្ឋាភិបាលនឹងធ្វើការតាមដាន និងពិនិត្យឡើងវិញលើបញ្ហាដែលស្នើនេះក្នុងពេលឆាប់ៗ ជាពិសេសបន្ទាប់ពីកម្មវិធីចាក់វ៉ាក់សាំងត្រូវបានបញ្ចប់។
«ភាគីទាំង ២ បានបង្ហាញការពេញចិត្តរបស់ពួកគេសម្រាប់ការបើកចំហការសន្ទនា និងព្យាយាមស្វែងរកដំណោះស្រាយពីក្តីបារម្ភរបស់វិស័យឯកជន»។ នេះបើយោងតាមសេចក្ដីប្រកាសព័ត៌មានពី AmCham។
លោក Anthony Galliano ប្រធាន AmCham ដែលបានចូលរួមក្នុងកិច្ចប្រជុំនេះបានលើកឡើងថា វាជាការលើកទឹកចិត្តយ៉ាងខ្លាំងដែលវិស័យឯកជន និងវិស័យសាធារណៈ ជួបគ្នាដើម្បីដោះស្រាយបញ្ហាទីផ្សារសំខាន់បំផុតដែលប៉ះពាល់ដល់កម្ពុជា ដូចជា ការចាក់វ៉ាក់សាំង ការធ្វើចត្តាឡីស័ក សេដ្ឋកិច្ច ទេសចរណ៍ បដិសណ្ឋារកិច្ច សុខភាព និងសុវត្ថិភាព និងការបើកដំណើរការជាថ្មី។
ទាក់ទងការបារម្ភទាំងនេះលោក អូន ព័ន្ធមុនីរ័ត្ន បានជំរុញឱ្យភាគីពាក់ព័ន្ធទាំងអស់របស់រាជរដ្ឋាភិបាល អនុគណៈកម្មាធិការគ្រប់គ្រងច្រកចេញ-ចូលប្រទេស និងការធ្វើចតា្តឡីស័ក បន្តខិតខំសហការឱ្យកាន់តែជិតស្និទ្ធជាមួយផ្នែកឯកជន ដោយយកចិត្តទុកដាក់តាមដានរាល់បញ្ហារបស់ផ្នែកឯកជនឱ្យបានជាប់ជាប្រចាំ និងដោះស្រាយតាមករណីជាក់ស្តែង ពិសេសពាក់ព័ន្ធនឹងរយៈពេលការធ្វើចត្តាឡីស័ក ការកំណត់សណ្ឋាគារសម្រាប់ស្នាក់នៅក្នុងអំឡុងពេលធ្វើចត្តាឡីស័ក ដើម្បីបង្កលក្ខណៈងាយស្រួលដល់អ្នកវិនិយោគ ប៉ុន្តែជាមួយគ្នានេះត្រូវតែរក្សាឱ្យបានការទប់ស្កាត់ការនាំជំងឺកូវីដ ១៩ ចូលក្នុងសហគមន៍។
លោករដ្ឋមន្ដ្រីត្រូវបានដកស្រង់សម្ដីថា៖ «កិច្ចការទាំងនេះ គឺជាអាទិភាពដែលរួមចំណែកធានាបានបរិយាកាសល្អប្រសើរសម្រាប់វិស័យឯកជន នៅក្នុងការស្ដារសេដ្ឋកិច្ចជាតិឡើងវិញ ក្រោយវិបត្តិកូវីដ ១៩»។
កម្ពុជាបានទម្លាក់ចំណាត់ថ្នាក់ការព្យាករសេដ្ឋកិច្ចខ្លួនសម្រាប់ឆ្នាំ ២០២១ មកនៅត្រឹម ២,៥ ភាគរយពីការព្យាករលើកមុន ៤,១ ភាគរយ (ប្រកាសកាលពីដើមឆ្នាំនេះ) ដោយសារស្ថានការណ៍ជំងឺកូវីដ ១៩ កាន់តែធ្ងន់ធ្ងរ។ នេះបើយោងតាមលោកនាយករដ្ឋមន្ដ្រី ហ៊ុន សែន ដែលបានឱ្យដឹងកាលពីថ្ងៃទី ១ ខែសីហា។
លោកឱ្យដឹងថា ការទម្លាក់ចំណាត់ថ្នាក់នេះ ឆ្លុះបញ្ចាំងផលប៉ះពាល់ដោយសារតែការរីករាលដាលជំងឺនេះ លើវិស័យសេដ្ឋកិច្ចសំខាន់ៗរបស់ដៃគូពាណិជ្ជកម្មរបស់កម្ពុជា និងការរំខានខ្សែចង្វាក់ផលិតកម្មជាបន្ត។
ក្រសួងសុខាភិបាលបានប្រកាសថា ចំនួនអ្នកស្លាប់របស់អ្នកជំងឺវីរុសវ៉ារ្យ៉ង់ Delta ចំនួន ៥៨ នាក់ ត្រូវបានបញ្ជាក់ដោយវិទ្យាស្ថានប៉ាស្ទ័រកម្ពុជា កាលពីថ្ងៃទី ៧ ខែសីហា ដែលធ្វើឱ្យអ្នកស្លាប់សរុបកើនឡើងដល់ចំនួន ៣៨៥ នាក់៕ LA
