.jpg)
តំបន់សេដ្ឋកិច្ចពិសេសក្រុងព្រះសីហនុ។ រូបថត សហការី
ភ្នំពេញៈ ទោះបីជំងឺកូវីដ ១៩ នៅតែបន្តការរីករាលដាលនៅកម្ពុជា ក៏បរិមាណនាំចេញ និងនាំចូលទំនិញរបស់តំបន់សេដ្ឋកិច្ចពិសេសក្រុងព្រះសីហនុ (SSEZ) ក្នុងរយៈពេល ៧ ខែដើមឆ្នាំ ២០២១ នេះនៅតែបន្តកើនប្រមាណជិត ៤៥ ភាគរយបើធៀបនឹងរយៈពេលដូចគ្នា ឆ្នាំ ២០២០។
ទិន្នន័យរបស់ SSEZ ឱ្យដឹងថា យោងតាមស្ថិតិចុងក្រោយគិតចាប់ពីខែមករា ដល់ខែកក្កដា ឆ្នាំ ២០២១ សហគ្រាសនៅតំបន់សេដ្ឋកិច្ចពិសេសព្រះសីហនុទទួលបានបរិមាណនាំចូល និងនាំចេញសរុប ១ ១៨៥ លានដុល្លារកើនឡើង ៤៤,៥១ ភាគរយបើធៀបនឹងរយៈពេលដូចគ្នានាឆ្នាំមុន។
ប្រធានសមាគមភ័ស្តុភារកម្មកម្ពុជា (CLA) លោក ស៊ិន ចន្ធី ប្រាប់ ភ្នំពេញ ប៉ុស្តិ៍ថា សកម្មភាពដឹកជញ្ជូននៅកម្ពុជានៅតែបន្តរងផលប៉ះពាល់យ៉ាងខ្លាំងចាប់តាំងពីមានការរីករាលដាលជំងឺកូវីដ ១៩ ប៉ុន្តែសកម្មភាពដឹកជញ្ជូនទំនិញផ្នែកខ្លះមានការរីកចម្រើន ដូចជានៅតំបន់សេដ្ឋកិច្ចពិសេសមួយចំនួនមានការកើនឡើងខ្ពស់ហួសពីការរំពឹងទុក ហើយកន្លែងខ្លះក៏ធ្លាក់ចុះទៅដល់បាតក្រោម។
លោកប្រាប់ថា៖ «ខ្ញុំឯកភាពនៅតំបន់សេដ្ឋកិច្ចមួយចំនួនសកម្មភាពនាំចេញ និងនាំចូលទំនិញរបស់ពួកគេពិតជាហក់ឡើងខ្ពស់ ដោយសារតែមានតម្រូវការទីផ្សារ ដូចជា ទំនិញកសិកម្មក្រៅពីអង្ករមានការនាំចេញហក់ឡើង និងគ្រឿងបង្គុំអគ្គិសនី អេឡិចត្រូនិក កង់ ក៏មានការកើនឡើងផងដែរ»។
អនុប្រធានសភាពាណិជ្ជកម្ម កម្ពុជា លោក លឹម ហេង បានឱ្យដឹងកាលពីពេលថ្មីៗនេះថា ការនាំចេញរបស់កម្ពុជារហូតមកដល់ពេលនេះមិនមានការថមថយនោះទេ បើទោះបីជាពិភពលោកកំពុងជួបវិបត្តិកូវីដ-១៩ ក៏ដោយ។ លោកបន្តទៀតថា ជាមួយគ្នានេះកម្ពុជាក៏បាននិងកំពុងធ្វើពិពិធកម្មទំនិញនាំចេញរបស់ខ្លួនឱ្យកាន់តែមានភាពសម្បូរបែបទៅទីផ្សារអន្តរជាតិផងដែរ។
លោកអះអាងថា៖ «នៅពេលដែលមានកំណើននាំចេញ ការនាំចូលផលិតផលវត្ថុធាតុដើមសម្រាប់កែច្នៃក៏នឹងកើនឡើងទៅតាមនេះដែរ។ នេះជាមូលហេតុនាំឱ្យមានកំណើននេះ»។
SSEZ ត្រូវបានវិនិយោគរួមគ្នាដោយវិនិយោគិនខែ្មរ និងវិនិយោគិនចិន ដោយប្តេជ្ញាបង្កើតវេទិកាវិនិយោគពហុជាតិសាសន៍សម្រាប់ក្រុមហ៊ុននៅជុំវិញពិភពលោក។
នៅដំណាក់កាលដំបូងតំបន់សេដ្ឋកិច្ចពិសេស SSEZ នឹងផ្តោតលើវិស័យវាយនភណ្ឌកាត់ដេរ កាបូប ផលិតផលស្បែកជើង ផលិតផលពីឈើ ជាដើមដែលជាឧស្សាហកម្មចម្បងសម្រាប់ការអភិវឌ្ឍ។ ចំណែកនៅដំណាក់កាលទី២ SSEZ នឹងផ្តោតលើការទាញយកប្រយោជន៍ពីកំពង់ផែ និងផ្តោតលើការណែនាំអំពីគ្រឿងម៉ាស៊ីន សម្ភារសំណង់ គ្រឿងសង្ហារិមគេហដ្ឋាន គ្រឿងបន្លាស់រថយន្ត និងសម្បកកង់។
គិតត្រឹមខែវិច្ឆិកា ឆ្នាំ ២០២០ តំបន់សេដ្ឋកិច្ចពិសេសក្រុងព្រះសីហនុមានក្រុមហ៊ុនកំពុងវិនិយោគនៅទីនោះសរុប ១៦៥ ដោយបង្កើតការងារបានចំនួន ៣០ ០០០ កន្លែង៕ LA
