.jpg)
កម្ពុជាសង្ឃឹមនឹងបានទទួលជោគជ័យពីការដាក់លក់ផលិតផលនៅលើ amazon.com។ រូបថត AFP
ភ្នំពេញៈ កម្ពុជារំពឹងថា ផលិតផលរបស់សហគ្រាសធុនតូច និងមធ្យមដែលមានស្តង់ដាគ្រប់គ្រាន់នឹងអាចដាក់តាំងលក់នៅលើផ្លេតហ្វម amazon.com ដែលជាម៉ាកយីហោល្បីល្បាញរបស់អាមេរិក។ ការបង្ហាញក្តីសង្ឃឹមនេះត្រូវបានធ្វើឡើងក្នុងសិក្ខាសាលាស្តីពីការនាំផលិតផលទៅលក់នៅសហរដ្ឋអាមេរិកតាមរយៈ amazon.com រវាងសហគ្រិនកម្ពុជាជាមួយនឹងតំណាងក្រុមហ៊ុន amazon.com ធ្វើឡើងតាមរយៈប្រព័ន្ធវីដេអូកាលពីថ្ងៃទី ១០ ខែសីហា ឆ្នាំនេះ។
លោក ងួន ម៉េងតិច អគ្គនាយកសភាពាណិជ្ជកម្មកម្ពុជាបានថ្លែងថា ក្នុងសិក្ខាសាលានេះភាគីទាំង ២ បានពិភាក្សាអំពីយន្តការនានានៃការនាំចេញផលិតផលកម្ពុជាទៅកាន់ទីផ្សារសហរដ្ឋអាមេរិកតាមរយៈ amazon.com និងការត្រៀមលក្ខណៈទាំងគុណភាព និងបទដ្ឋានតម្រូវនានា។ ភាគីទាំង ២ ក៏បានស្វែងយល់អំពីសារៈប្រយោជន៍លេខបារ៍កូដដែលតម្រូវឱ្យមានជាចាំបាច់សម្រាប់លក់ផលិតផលនៅ amazon.com។
លោកប្រាប់ភ្នំពេញប៉ុស្តិ៍ថា៖ «ខ្ញុំបានណែនាំឱ្យសហគ្រិនកម្ពុជាយើងដែលជាអ្នកផលិតទាំងអស់ឱ្យទាក់ទងទៅក្រុមហ៊ុន amazon.com ផ្ទាល់ដើម្បីទទួលបានអត្ថប្រយោជន៍ និងរៀបចំស្តង់ដាទៅតាមតម្រូវការរបស់ amazon.com។ យើងអាចដាក់លក់ផលិតផលដែលយើងផលិតបាននៅលើផ្លេតហ្វម amazon.com ដែលជាប្រព័ន្ធអនឡាញធំលើពិភពលោក»។
អ្នកស្រី កែ មុំ ប្រធានក្រុមប្រឹក្សាអភិបាលក្រុមហ៊ុនលីលី ហ្វូដ អ៊ិនដាសទ្រី ខូអិលធីឌី ដែលជាក្រុមហ៊ុនផលិតនំស្រួយ និងបន្លែផ្លែឈើក្រៀម បានឱ្យដឹងថា បើកម្ពុជាអាចនាំយកផលិតផលទៅលក់លើ amazon.com នឹងជំរុញផលិតផលខ្មែរកាន់តែល្បីល្បាញនៅលើឆាកអន្តរជាតិ។ អ្នកស្រីបញ្ជាក់ថា៖ «ចំពោះទស្សនៈខ្ញុំផ្ទាល់គឺជារឿងល្អ សម្រាប់ផលិតផលខ្មែរដែលនឹងមានកេរ្តិ៍ឈ្មោះលើឆាកអន្តរជាតិ និងមានការតាំងលក់យ៉ាងទូលំទូលាយ ផងដែរ»។
ទិន្នន័យពីការិយាល័យពាណិជ្ជកម្មអាមេរិកឱ្យដឹងថា ក្នុងឆមាសទី ១ ឆ្នាំ ២០២១ ទំហំពាណិជ្ជកម្មទ្វេភាគីរវាងប្រទេសទាំង ២ មានតម្លៃ ៣ ៨៤០,២ លានដុល្លារ កើន ៣២,៨ ភាគរយធៀបនឹងឆមាសទី ១ ឆ្នាំ ២០២០៕ LA
