.jpg)
ច្រកផ្លូវចូលនៃទីស្តីការក្រសួងទេសចរណ៍។ រូបថត សហការី
ភ្នំពេញៈ ក្រសួងទេសចរណ៍បានអំពាវនាវដល់ម្ចាស់អាជីវកម្មសណ្ឋាគារទាំងអស់ឱ្យមកដាក់ពាក្យសុំវិញ្ញាបនបត្រ និងស្លាកសញ្ញាស្តង់ដាសណ្ឋាគារបៃតងអាស៊ានលើកទី ៨ (8th ASEAN Green Hotel Award) សម្រាប់ឆ្នាំ ២០២២-២០២៤ ចាប់ថ្ងៃជូនដំណឹងនេះតទៅ។
សេចក្តីជូនដំណឹងពីក្រសួងទេសចរណ៍ចេញផ្សាយកាលពីថ្ងៃទី ១០ ខែសីហា ឱ្យដឹងថា ម្ចាស់អាជីវកម្មសណ្ឋាគារអាចដាក់ពាក្យស្នើសុំវិញ្ញាបនបត្រ និងស្លាកសញ្ញាស្តង់ដាសណ្ឋាគារបៃតងអាស៊ានលើកទី ៨ សម្រាប់ឆ្នាំ ២០២២-២០២៤ នៅក្រសួងទេសចរណ៍ ឬតាមមន្ទីរទេសចរណ៍រាជធានី-ខេត្ត។
សេចក្តីជូនដំណឹងបន្តថា ម្ចាស់អាជីវកម្មត្រូវភ្ជាប់មកជាមួយនូវពាក្យស្នើសុំវិញ្ញាបនបត្រ និងស្លាកសញ្ញាស្តង់ដាសណ្ឋាគារបៃតងអាស៊ានលើកទី៨ និងអាជ្ញាប័ណ្ណទេសចរណ៍នៅមានសុពលភាពចេញដោយក្រសួងទេសចរណ៍ព្រមទាំងវិញ្ញាបនបត្រចំណាត់ថ្នាក់សណ្ឋាគារចេញដោយក្រសួងទេសចរណ៍ (យ៉ាងតិចផ្កាយ ៣)។
នីតិវិធីនៃការជ្រើសរើសជយលាភីសណ្ឋាគារបៃតងអាស៊ានលើកទី៨ សម្រាប់ឆ្នាំ ២០២២-២០២៤ ត្រូវអនុវត្តទៅតាមដំណាក់កាលដូចជា ការដាក់ពាក្យស្នើសុំចាប់ពីថ្ងៃជូនដំណឹងរហូតដល់ថ្ងៃទី ១៥ ខែសីហា ឆ្នាំ ២០២១។
ការពិនិត្យលើពាក្យស្នើសុំចាប់ពីថ្ងៃទី ១៦ ដល់ថ្ងៃទី ២០ ខែ សីហា ឆ្នាំ ២០២១ និងការចុះពិនិត្យទីតាំងសណ្ឋាគារចាប់ពីថ្ងៃទី ២៣ ខែសីហា ដល់ថ្ងៃទី ១៥ ខែ តុលា ឆ្នាំ ២០២១ ហើយការប្រកាសជយលាភីនៅខែមករា ឆ្នាំ ២០២២។
អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានប្រាប់ ភ្នំពេញ ប៉ុស្តិ៍ថា កម្មវិធីនេះនឹងរួមចំណែកក្នុងការពង្រឹងស្តង់ដាវិស័យសេវាកម្ម និងបដិសណ្ឋារកិច្ចនៅកម្ពុជាឱ្យស្របនឹងបណ្តាប្រទេសជាសមាជិកអាស៊ាន។
អ្នកស្រីថ្លែងថា៖ «កម្មវិធីនេះក៏នឹងធ្វើឱ្យវេទិកាទេសចរណ៍អាស៊ាននៅឆ្នាំ ២០២២ កាន់តែអធិកអធម ព្រោះមានការផ្តល់រង្វាន់ដល់អ្នកក្នុងវិស័យទេសចរណ៍។ ម្យ៉ាងទៀតវានឹងជួយលើកទឹកចិត្តឱ្យម្ចាស់អាជីវកម្មសណ្ឋាគារពង្រឹងនូវគុណភាពតាមស្តង់ដាបៃតង និងជំរុញឱ្យផលិតផលទាំងអស់កាន់តែចូលស្តង់ដាអាស៊ាន»។
អ្នកស្រីបន្តថា៖ «វាគឺជាពេលវេលាមួយដ៏ស័ក្តិសមសម្រាប់ផ្សព្វផ្សាយវិស័យទេសចរណ៍របស់កម្ពុជាដល់អ្នកចូលរួមដែលជាប្រតិបត្តិករទេសចរណ៍បរទេស និងអ្នកសារព័ត៌មានអន្តរជាតិ ដើម្បីបង្ហាញពួកគាត់នូវការកែទម្រង់ស្តង់ដាសេវាកម្ម និងបដិសណ្ឋារកិច្ច ដើម្បីបង្ហាញនៅឆាកអន្តរជាតិ»។
ជយលាភីនៅក្នុងកម្មវិធីនេះគ្រោងនឹងប្រកាសក្នុងឱកាសវេទិកាទេសចរណ៍អាស៊ានឆ្នាំ ២០២២ (ATF2022) ដែលនឹងប្រព្រឹត្តទៅពីថ្ងៃទី ១៦-២២ ខែ មករា ឆ្នាំ ២០២២ នៅក្រុងព្រះសីហនុ ហើយរំពឹងថា នឹងមានអ្នកចូលរួម ២ ០០០ នាក់មកពីជាង ២៥ ប្រទេស៕LA
