ភ្នំពេញៈ កំពង់ផែស្វយ័តភ្នំពេញ (PPAP) ដែលជាក្រុមហ៊ុនចុះបញ្ជីនៅផ្សារមូលបត្រកម្ពុជា (CSX) បានបង្ហាញពីការស្ទុះងើបឡើងវិញនៃប្រតិបត្តិការអាជីវកម្មរបស់ខ្លួនក្នុងរយៈពេល ៧ ខែដំបូងឆ្នាំនេះ ដោយសារមានការចាប់ផ្ដើមយ៉ាងរហ័សនៃការចាក់វ៉ាក់សាំងប្រឆាំងនឹងជំងឺកូវីដ ១៩ នៅក្នុងបណ្ដាប្រទេសនៃគោលដៅនាំចេញទាំងអស់របស់កម្ពុជា។
នៅក្នុងឯកសារផ្ញើទៅក្រុមហ៊ុនផ្សារមូលបត្រកម្ពុជា (CSX) កាលពីថ្ងៃទី ៩ ខែសីហា PPAP ឱ្យដឹងថា ក្នុងរយៈពេល ៧ ខែឆ្នាំនេះ ប្រតិបត្តិករកំពង់ផែដែលគ្រប់គ្រងដោយរដ្ឋមួយនេះបានរាយការណ៍ពីចំនួនកុងតឺន័រឆ្លងកាត់ ដែលកើនឡើងប្រមាណ ១១,៧៧ ភាគរយធៀបនឹងរយៈពេលដូចគ្នាឆ្នាំមុន ខណៈបរិមាណទំនិញ និងប្រេងឥន្ធនៈ និងឧស្ម័ន ដែលដឹកជញ្ជូនតាមកំពង់ផែក៏បានកើនឡើង ៦,៦៧ ភាគរយផងដែរ។ ជាមួយគ្នានេះ ចំនួននាវាដឹកទំនិញដែលចូលចតនៅកំពង់ផែបានកើនឡើង ០,២២ ភាគរយ ខណៈចំនួនអ្នកដំណើរ និងកាណូតដឹកអ្នកដំណើរធ្លាក់ចុះ ១០០ ភាគរយ។
លោកស្រី គីម សុផានីតា ប្រធាននាយកដ្ឋានប្រតិបត្តិការទីផ្សារ CSX បានប្រាប់ភ្នំពេញប៉ុស្តិ៍ថា កំណើននេះបង្ហាញពីភាពខ្លាំងនៃប្រតិបត្តិការអាជីវកម្ម និងហិរញ្ញវត្ថុរបស់ PPAP។ វាជាមូលដ្ឋានដ៏ល្អមួយក្នុងការទាក់ទាញចំណាប់អារម្មណ៍ក្រុមវិនិយោគិនក្នុងស្រុក និងបរទេស។
លោកស្រីបានថ្លែងថា៖ «ខ្ញុំគិតថា ឧស្សាហកម្មដឹកជញ្ជូនទំនិញនៅតែរឹងមាំដោយមិនគិតពីការមកដល់នៃវីរុសវ៉ារ្យ៉ង់ថ្មីនោះទេ។ មូលហេតុចម្បងគឺបណ្ដាប្រទេសភាគច្រើនបានបើកដំណើរការព្រំដែនរបស់ពួកគេសម្រាប់ការនាំចូល និងនាំចេញផលិតផល ព្រមទាំងពាណិជ្ជកម្ម ហើយប្រជាជនកាន់តែច្រើនឡើងៗបាននាំគ្នាចាក់វ៉ាក់សាំងគ្រប់ដូស និងមួយចំនួនកំពុងទទួលបានការចាក់ដូសជំរុញ ដើម្បីការពារប្រឆាំងនឹងការរីករាលដាលវីរុសប្រភេទថ្មីនេះ»។
លោកស្រីបន្ថែមថា៖ «វាស្រដៀងគ្នានឹងប្រទេសកម្ពុជាដែរ ដោយបច្ចុប្បន្នស្ថានការណ៍ជំងឺកូវីដ ១៩ របស់យើងគឺល្អប្រសើរបើធៀបនឹងប្រទេសជិតខាង។ ខ្ញុំគិតថា អាជីវកម្មរបស់ PPAP នឹងនៅតែមានភាពវិជ្ជមាន»។
កាលពីឆ្នាំ ២០២០ ប្រាក់ចំណូលសរុបរបស់ PPAP មាន ២៩,៤៨ លានដុល្លារ ធ្លាក់ចុះ ៥,៨ ភាគរយធៀបនឹងតួលេខដែលធ្វើសវនកម្មហើយកាលពីឆ្នាំ ២០១៩៕ LA