ភ្នំពេញៈ ក្រសួងប្រៃសណីយ៍ និងទូរគមនាគមន៍បានព្រមានចាត់វិធានការលើប្រតិបត្តិករផ្តល់សេវាទូរស័ព្ទចល័តចំនួន ២ ដែលកំពុងលក់ និងចែកចាយស៊ីមកាតដោយមិនយកឯកសារសម្គាល់អត្តសញ្ញាណរបស់អ្នកប្រើប្រាស់មករក្សាទុក។
សេចក្តីប្រកាសព័ត៌មានរបស់ក្រសួងចុះផ្សាយកាលពីថ្ងៃទី ១១ ខែសីហា ឱ្យដឹងថា ថ្មីៗនេះក្រសួងប្រៃសណីយ៍ និងទូរគមនាគមន៍បានរកឃើញជាក់ស្តែងជាបន្តបន្ទាប់ថា ក្រុមហ៊ុន វៀតធេល (ខេមបូឌា) និងក្រុមហ៊ុន ស្មាត អាស្យាតា ខូ អិលធីឌី បានធ្វើសកម្មភាពលក់ និងចែកចាយស៊ីមកាតនៅតាមទីតាំងមួយចំនួនដោយពុំតម្រូវឱ្យមានឯកសារសម្គាល់អត្តសញ្ញាណរបស់អ្នកប្រើប្រាស់។ សកម្មភាពនេះ បង្ហាញឱ្យឃើញនូវការបន្តអនុវត្តផ្ទុយនឹងសារាចរអន្តរក្រសួងលេខ ០០១ សរ.ផម-បទ ចុះថ្ងៃទី ២៨ ខែ កុម្ភៈ ឆ្នាំ ២០១២ និងសេចក្តីណែនាំរបស់ក្រសួងប្រៃសណីយ៍ និងទូរគមនាគមន៍ និងនិយតករទូរគមនាគមន៍កម្ពុជា។
សេចក្តីប្រកាសព័ត៌មានបានបន្តថា៖ «ដើម្បីពង្រឹងសណ្តាប់ធ្នាប់វិស័យទូរគមនាគមន៍ និងសន្តិសុខជាតិតាមរយៈការទប់ស្កាត់ការប្រើប្រាស់ស៊ីមកាតដែលមិនមានឯកសារសម្គាល់អត្តសញ្ញាណត្រឹមត្រូវ ក្រសួងនឹងចាត់វិធានការលើប្រតិបត្តិករផ្ដល់សេវាទូរស័ព្ទចល័តទាំង ២ ដោយតម្រូវឱ្យបញ្ឈប់ជាបន្ទាន់នូវការលក់ និងចែកចាយស៊ីមកាតដោយមិនយកឯកសារសម្គាល់អត្តសញ្ញាណរបស់អ្នកប្រើប្រាស់តាមគ្រប់រូបភាព ឬមធ្យោបាយចាប់ពីថ្ងៃជូនដំណឹងនេះតទៅ»។
នៅក្នុងករណីជនទុច្ចរិតទិញស៊ីមកាតមិនមានឯកសារសម្គាល់អត្តសញ្ញាណពីក្រុមហ៊ុន ដើម្បីប្រព្រឹត្តអំពើខុសច្បាប់ ទោះបីជាក្រុមហ៊ុនមិនបានប្រព្រឹត្តក៏ដោយ នោះមានន័យថា ក្រុមហ៊ុនបានចូលរួមចំណែកប្រព្រឹត្តអំពើខុសច្បាប់ ឬឃុបឃិតជាមួយជនទុច្ចរិតដោយប្រយោល។ នេះបើតាមសេចក្តីប្រកាសព័ត៌មាន។
ប្រសិនបើប្រតិបត្តិករផ្ដល់សេវាទូរស័ព្ទចល័តនៅតែមិនព្រមអនុវត្តតាមចំណាត់ការខាងលើ ក្រសួងនឹងចាត់វិធានការចំនួន ៤ រួមមាន ព្យូរ ឬលុបអាជ្ញាប័ណ្ណប្រតិបត្តិការផ្តល់សេវាទូរស័ព្ទចល័ត, បង្កករាល់ការស្នើសុំនានារបស់ប្រតិបត្តិករ, ចាត់វិធានការផ្សេងទៀតស្របតាមមាត្រា ៧៨ នៃច្បាប់ស្តីពីទូរគមនាគមន៍ និងរាល់បុគ្គលពាក់ព័ន្ធនឹងករណីខាងលើនេះនឹងត្រូវប្រឈមចំពោះមុខច្បាប់ព្រហ្មទណ្ឌ។
ក្រសួងប្រៃសណីយ៍ និងទូរគមនាគមន៍នឹងបន្តតាមដាន និងចាត់វិធានការយ៉ាងតឹងរ៉ឹងបំផុត ស្របតាមច្បាប់ និងលិខិតបទដ្ឋានគតិយុត្តដែលមានជាធរមាន ចំពោះប្រតិបត្តិករផ្ដល់សេវាទូរស័ព្ទចល័តណាដែលបានប្រព្រឹត្តខុសច្បាប់៕ LA