ភ្នំពេញៈ អ្នកនៅក្នុងវិស័យទេសចរណ៍កម្ពុជាលើកឡើងថា លទ្ធផលនៃការស្ទង់មតិរបស់ Expat Insider ដែលចេញផ្សាយកាលពីពេលថ្មីៗនេះនឹងក្លាយទៅជាកម្លាំងចលករមួយបន្ថែមទៀតក្នុងការជួយលើកកម្ពស់សក្តានុពលវិស័យទេសចរណ៍កម្ពុជាឱ្យមានភាពរីកចម្រើនឡើងវិញ បន្ទាប់ពីធ្លាក់ចុះយ៉ាងគំហុកនារយៈពេលជាង ១ ឆ្នាំមកនេះដែលបណ្តាលពីវិបត្តិនៃការឆ្លងរាលដាលជំងឺផ្តាសាយសកលកូវីដ ១៩។
យោងតាមការស្ទង់មតិរបស់ Expat Insider ដែលផ្សាយលើគេហទំព័រ InterNations ប្រទេសកម្ពុជាឈរនៅចំណាត់ថ្នាក់ទី ៤ ក្នុងចំណោមប្រទេសដែលមានភាពរាក់ទាក់ជាងគេទាំង ១០ លើពិភពលោកក្នុងការស្វាគមន៍ភ្ញៀវបរទេស។
Expat Insider រកឃើញថា ជនបរទេសប្រមាណ ៩៦ ភាគរយបានវាយតម្លៃពីភាពស្និទ្ធស្នាល និងភាពរាក់ទាក់ គឺមានលក្ខណៈវិជ្ជមាន ខណៈមធ្យមភាគសកលគឺមានត្រឹម ៧០ ភាគរយប៉ុណ្ណោះ។ ជាមួយគ្នានេះជនបរទេសហាក់មានបញ្ហាតិចតួចបំផុតពេលស្នាក់នៅក្នុងប្រទេសកម្ពុជា។ ឧទាហរណ៍ ជនជាតិអូស្ត្រាលីម្នាក់បានបង្ហាញពីការពេញចិត្តរបស់គេជាមួយ «ការបង្កើតទំនាក់ទំនងជាមួយប្រជាជនក្នុងស្រុក»។
Expat Insider ឱ្យដឹងទៀតថា អ្នកឆ្លើយតប ៨ នាក់ក្នុងចំណោម ១០ នាក់ បានចាត់ទុកប្រជាជនក្នុងស្រុកថា មានការទទួលស្វាគមន៍ ៨៥ ភាគរយ និងចំនួន ៨៣ ភាគរយបានយល់ថា ការតាំងលំនៅក្នុងប្រទេសកម្ពុជាមានភាពងាយស្រួល។ ជនបរទេស ៣៩ ភាគរយ និយាយថា ពួកគេមានអារម្មណ៍ដូចនៅប្រទេសកំណើតខ្លួន។
យោងតាមលទ្ធផលការស្ទង់មតិ ប្រទេសព័រទុយហ្គាល់ ឈរនៅលេខ ១ តាមពីក្រោយដោយ កោះតៃវ៉ាន់ និងប្រទេសម៉ិកស៊ិក នៅលេខរៀងទី ៣។ ចំណែកប្រទេសតាមពីក្រោយកម្ពុជា មានដូចជា បារ៉ែន កូស្តារីកា អូម៉ង់ កូឡុំប៊ី វៀតណាម និងកាណាដា។
លោក តុប សុភ័ក អ្នកនាំពាក្យក្រសួងទេសចរណ៍បានប្រាប់ភ្នំពេញប៉ុស្តិ៍ក្នុងថ្ងៃទី ១២ ខែសីហាថា កម្ពុជាតែងទទួលការវាយតម្លៃពីស្ថាប័នទេសចរណ៍ និងបណ្តាញសារព័ត៌មានអន្តរជាតិធំៗថា ជាទិសដៅទេសចរណ៍ដ៏ល្អ និងជាប្រទេសមានប្រជាជនរួសរាយ រាក់ទាក់បំផុតលើពិភពលោក។ ការដាក់ចំណាត់ថ្នាក់របស់ Expat Insider នឹងចូលរួមចំណែកក្នុងការផ្សព្វផ្សាយពីសក្តានុពលវិស័យទេសចរណ៍កម្ពុជាទៅកាន់ប្រជាជននានាលើពិភពលោកឱ្យងាកមកចាប់អារម្មណ៍ធ្វើដំណើរមកកម្ពុជា បន្ទាប់ពីវិបត្តិកូវីដ ១៩។
លោកបានថ្លែងថា៖ «ទោះខ្ញុំមិនដឹងច្បាស់ថា ស្ថាប័នវាយតម្លៃខាងលើមានភាពល្បីល្បាញកម្រិតណា ប៉ុន្តែអ្វីដែលសំខាន់ គឺការវាយតម្លៃរបស់គេមានឈ្មោះប្រទេសកម្ពុជា។ ការដាក់ឈ្មោះប្រទេសកម្ពុជានៅចំណាត់ថ្នាក់កំពូលនឹងរួមចំណែកទាក់ទាញភ្ញៀវទេសចរ ក៏ដូចជាអ្នកវិនិយោគឱ្យធ្វើដំណើរមកប្រទេសកម្ពុជាកាន់តែច្រើន»។
ជាមួយគ្នានេះដែរ ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានលើកឡើងថា ទោះបីជាលោកមិនមានព័ត៌មានអំពីលក្ខខណ្ឌនៃសូចនាករគោល ដែល Expat Insider យកមកធ្វើជាមូលដ្ឋានសម្រាប់វាយតម្លៃ និងផ្តល់ចំណាត់ថ្នាក់ ប៉ុន្តែការផ្តល់ចំណាត់ថ្នាក់នេះវានឹងផ្តល់ផលវិជ្ជមានសម្រាប់កម្ពុជា ដែលកំពុងត្រៀមខ្លួនទទួលភ្ញៀវទេសចរបរទេសចាក់វ៉ាក់សាំងរួចរាល់ចាប់ផ្តើមពីត្រីមាសទី ៤ ខាងមុខ។ លោកបន្តថា ជាទូទៅប្រជាជនខ្មែរត្រូវបានគេទទួលស្គាល់ថា មានភាពរួសរាយចំពោះភ្ញៀវទេសចរ ហើយប្រទេសនេះក៏សម្បូរទៅដោយតំបន់ទេសចរណ៍ចម្រុះជាច្រើនប្រភេទផងដែរ។
លោកលើកឡើងថា៖ «គ្រប់ការផ្តល់ចំណាត់ថ្នាក់កំពូល ឬការលើកសរសើរនឹងមានឥទ្ធិពលសម្រាប់ការលើកកម្ពស់វិស័យទេសចរណ៍កម្ពុជាឱ្យដំណើរឡើងវិញជាបណ្តើរៗ បន្ទាប់ពីបានជាប់គាំងស្ទើរទាំងស្រុងចាប់តាំងពីការផ្ទុះឡើងនៃវិបត្តិកូវីដ ១៩ កាលពីឆ្នាំមុន»។
កាលពីថ្ងៃទី ២៤ ខែមិថុនា គេហទំព័រ Tripadvisor ក៏បានប្រកាសពីការស្ទាបស្ទង់របស់ខ្លួនផងដែរ ដោយរកឃើញថា តំបន់ប្រាសាទអង្គរវត្ត ទឹកធ្លាក់ ភូមិបណ្តែតទឹក និងប្រាសាទបន្ទាយស្រី ក្នុងខេត្តសៀមរាបបានជាប់លេខ ១ ក្នុងពិភពលោកជាកន្លែងទេសចរណ៍ប្រណីតសម្រាប់ដំណើរកម្សាន្តក្នុងរយៈពេល ៣ ថ្ងៃ។
វិបត្តិជំងឺកូវីដ ១៩ បានធ្វើឱ្យប្រាក់ចំណូលពីទេសចរណ៍អន្តរជាតិរបស់ប្រទេសកម្ពុជា កាលពីក្នុងឆ្នាំ ២០២០ មានត្រឹម ១,០២៣ ពាន់លានដុល្លារធ្លាក់ចុះ ៧៩,២ ភាគរយបើធៀបនឹងឆ្នាំ ២០១៩ ដែលមាន ៤,៩១៩ ពាន់លានដុល្លារ។ ការធ្លាក់ចុះដ៏គំហុកនេះបានធ្វើឱ្យចំនួនទឹកប្រាក់ដែលវិស័យទេសចរណ៍នៅកម្ពុជាចូលរួមចំណែកក្នុងផលិតផលក្នុងស្រុកសរុប (GDP) ក្នុងឆ្នាំ ២០២០ មានត្រឹម ៣ ភាគរយប៉ុណ្ណោះ ខណៈកាលពីឆ្នាំ ២០១៩ មានប្រមាណ ១២,១ ភាគរយ។
កម្ពុជាទទួលបានភ្ញៀវទេសចរអន្តរជាតិសរុប ១,៣១ លាននាក់ក្នុងឆ្នាំ ២០២០ ថយចុះ ៨០,២ ភាគរយធៀបនឹងឆ្នាំ ២០១៩ ដែលមាន ៦,៦១ លាននាក់។ សម្រាប់ឆមាសទី ១ ឆ្នាំ ២០២១ កម្ពុជាទទួលភ្ញៀវទេសចរអន្តរជាតិ ១០២ ៥៦០ នាក់ ធ្លាក់ចុះ ៩១,៣ ភាគរយបើធៀបនឹងរយៈពេលដូចគ្នាឆ្នាំ ២០២០។ នេះបើតាមទិន្នន័យពីក្រសួងទេសចរណ៍៕ LA
វីដេអូ៖