.jpg)
ក្រសួងកសិកម្ម រុក្ខាប្រមាញ់ និងនេសាទបានអំពាវនាវដល់អ្នកនាំចេញផ្លែមៀនប៉ៃលិនឱ្យបង្វែរពីប្រទេសថៃទៅកាន់ប្រទេសវៀតណាម ដើម្បីដោះស្រាយទីផ្សារមៀនក្នុងរដូវប្រមូលផលដែលជាប់គាំង។ សហការី
ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទបានអំពាវនាវដល់អ្នកនាំចេញផ្លែមៀនប៉ៃលិនឱ្យបង្វែរពីប្រទេសថៃទៅកាន់ប្រទេសវៀតណាម ដើម្បីដោះស្រាយទីផ្សារមៀនក្នុងរដូវប្រមូលផលដែលជាប់គាំង ដោយសារការបិទព្រំដែនរវាងកម្ពុជា-ថៃក្នុងយុទ្ធនាការទប់ស្កាត់ការរីករាលដាលជំងឺកូវីដ ១៩។ នេះបើតាមសេចក្តីប្រកាសព័ត៌មាន។
សេចក្តីប្រកាសព័ត៌មានរបស់ក្រសួងនេះបានផ្សាយកាលពីថ្ងៃទី ១២ ខែសីហា បានឱ្យដឹងថា ដើម្បីចូលរួមចំណែកដោះស្រាយបញ្ហាទីផ្សារផលិតផលមៀនប៉ៃលិនដែលកំពុងប្រឈមនឹងរបាំងភូតគាមអនាម័យ និងបញ្ហាប្រឈមនានាបង្កឡើង ដោយការឆ្លងរាតត្បាតនៃជំងឺកូវីដ ១៩ ក្រសួងកសិកម្មសូមធ្វើការអំពាវនាវដល់អ្នកនាំចេញគួរបង្វែរទៅរកទីផ្សារប្រទេសវៀតណាម ព្រោះភាគីទាំង ២ បានឯកភាពគ្នាលើលក្ខខណ្ឌតម្រូវភូតគាមអនាម័យរួចហើយ។
សេចក្តីប្រកាសព័ត៌មានបញ្ជាក់ថា៖ «បងប្អូនប្រជាពលរដ្ឋគួររួមគ្នាគាំទ្រផលិតផលខ្មែរ ដោយជួយទិញផ្លែមៀនរបស់យើង ក្រោមរូបភាពខ្មែរ ជួយខ្មែរ ដោយជួយទិញផ្លែមៀនរបស់ប្រជាកសិករយើង ពិសេសសហគមន៍កសិកម្មមៀនប៉ៃលិនក្នុងកាលៈទេសៈដ៏លំបាកនេះ ហើយសូមឱ្យម្ចាស់ទីតាំងផ្សារទំនើប ក្រុមហ៊ុន ឬសិប្បកម្មកែច្នៃកសិផលក្នុងស្រុកគួរនាំគ្នាជួយប្រមូលទិញផ្លែមៀនប៉ៃលិនមកលក់ចែកចាយ ឬធ្វើការកែច្នៃសម្រាប់បម្រើដល់ការហូបចុកក្នុងស្រុកជំនួសឱ្យការនាំចូលនូវផ្លែមៀនកំប៉ុងពីក្រៅប្រទេសវិញ»។
ក្រសួងកសិកម្ម រុក្ខាប្រមាញ់ និងនេសាទ សង្ឃឹមយ៉ាងមុតមាំថា សាធារណជននឹងចូលរួមចំណែកក្នុងស្មារតី ជួយលើកកម្ពស់ផលិតភាព និងមោទនភាពផលិតផលកសិកម្មជាតិជាក់ជាមិនខាន។
បច្ចុប្បន្នកម្ពុជាបាននិងកំពុងចរចាបើកទីផ្សារសម្រាប់ផែ្លមៀនប៉ៃលិនជាមួយប្រទេសចិន ប៉ុន្តែមិនទាន់ទទួលបានការឆ្លើយតបពីភាគីចិននៅឡើយទេរហូតមកដល់ពេលនេះ៕
វីដេអូ៖
