ភ្នំពេញៈ ប្រាក់ចំណូលសរុបរបស់កំពង់ផែស្វយ័តក្រុងព្រះសីហនុ (PAS) ជាក្រុមហ៊ុនចុះបញ្ជីនៅផ្សារមូលបត្រកម្ពុជា (CSX) ទទួលបានចំនួន ៨៥ ៨៥៧ ៥៥៤ ០០០ រៀលនៅក្នុងត្រីមាសទី ២ ឆ្នាំ ២០២១ កើនឡើង ១៣,៥៣ ភាគរយ បើធៀបនឹងត្រីមាសទី ២ ឆ្នាំ ២០២០។ នេះបើតាមរបាយការណ៍ប្រចាំត្រីមាសទី ២ ឆ្នាំ ២០២១ នៃ កសស។
របាយការណ៍នេះបង្ហាញទៀតថា កសស ទទួលបានប្រាក់ចំណេញសុទ្ធក្រោយបង់ពន្ធចំនួន ១៤ ០៧៥ ៩៦៧ ០០០ រៀល កើន ៦៨,៧៧ ភាគរយ ធៀបនឹងរយៈពេលដូចគ្នាកាលពីឆ្នាំមុន។
លទ្ធផលនេះដោយសារបរិមាណកុងតឺន័រ និងទំនិញឆ្លងកាត់ PAS ហក់ឡើង ហើយការចំណាយប្រតិបត្តិការ និងការខាតបង់ប្រាក់យ៉េន (មិនទាន់សម្រេច) មានការថយចុះធៀបនឹងត្រីមាសទី ២ ឆ្នាំ ២០២០ ធ្វើឱ្យចំណេញសុទ្ធក្រោយបង់ពន្ធមានកំណើន ជាលទ្ធផលចំណេញឯកតាមូលបត្រកម្មសិទ្ធិមានចំនួន ១៦៤,១១ លានរៀល សម្រាប់ត្រីមាសទី ២ ឆ្នាំ ២០២១។
ដោយឡែក ក្នុងត្រីមាសទី ២ ឆ្នាំនេះ កុងតឺន័រដែលឆ្លងកាត់ កសស មានចំនួន ១៨១ ៩៤១ TEUs កើន ចំនួន ៣១ ៦៣៩ ស្មើនឹង ២១,៥ ភាគរយ បើធៀបនឹងត្រីមាសទី ២ ឆ្នាំមុន។
លោក លូ គឹម ឈន់ ប្រធានអគ្គនាយក PPAP បានឱ្យដឹងក្នុងរបាយការណ៍នេះថា PPAP នឹងបន្តខិតខំប្រឹងប្រែង ដើម្បីបំពេញសេវាកម្មអាជីវកម្មឱ្យកាន់តែប្រសើរ និងសម្រេចបានលទ្ធផលខ្ពស់ជាប្រយោជន៍ដល់ភាគហ៊ុនិករបស់ខ្លួន។
លោកបន្តថា PPAP បានពង្រឹងប្រសិទ្ធភាពការងារ និងការកសាងហេដ្ឋារចនាសម្ព័ន្ធបន្ថែមទៀត ដើម្បីឆ្លើយតបនឹងកំណើនតម្រូវការសេវាកម្មរបស់អតិថិជន និងការរីកចម្រើនសេដ្ឋកិច្ចជាតិ។
លោកថ្លែងថា៖ «ចំណែក ពហុបំណងរបស់ PPAP មានគោលដៅចូលរួមលើកកម្ពស់វិស័យកសិកម្ម កសិឧស្សាហកម្ម ឧស្សាហកម្ម ពាណិជ្ជកម្ម និងពិសេស ដើម្បីគាំទ្រដល់ការនាំចេញផលិតផលកសិកម្មរបស់កម្ពុជា ដូចជា អង្ករ ចំណិតដំឡូងមីស្ងួត និងទំនិញរាយ ដែលជាការឆ្លើយតបចំពោះយុទ្ធសាស្ត្រពង្រីកទីផ្សារនាំអង្ករចេញរបស់រាជរដ្ឋាភិបាលកម្ពុជា ក៏ដូចជា ការផ្តល់សេវាកម្មភ័ស្តុភារដល់ការរុករកប្រេងក្នុងដែនសមុទ្រកម្ពុជា»។
លោកបន្ថែមថា៖ «ក្រៅពីនេះ ចំណតផែពហុបំណងក៏មានគោលដៅការនាំចេញធ្យូងថ្មសម្រាប់ប្រើប្រាស់ក្នុងការផលិតថាមពលអគ្គិសនី និងស៊ីម៉ងត៍ ផងដែរ»។
សព្វថ្ងៃ PPAP បាននិងកំពុងអនុវត្តគម្រោងចំណតផែកុងតឺន័រថ្មី ដែលស្ថិតក្នុងដំណាក់កាលសិក្សាគំរូប្លង់លម្អិតដែលចំណតផែកុងតឺន័រនេះនឹងអាចអនុញ្ញាតឱ្យនាវាចំណុះផ្ទុកប្រមាណ ៦០ ០០០ តោន ឬនាវាដឹកកុងតឺន័រចំណុះផ្ទុកប្រមាណ ៥ ០០០ TEUs ជាប្រភេទ Post Panamax ចូលចតបាន៕
វីដេអូ៖