.jpg)
ភ្ញៀវទេសចរទៅលេងកម្សាន្តនៅលើភ្នំដោះក្រមុំក្នុងខេត្តមណ្ឌលគិរី។ ហុង មិនា
ភ្នំពេញៈ ផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី ២០២១-២០៣៥ ដែលទើបត្រូវបានរដ្ឋាភិបាលអនុម័តឱ្យប្រើកាលពីសប្តាហ៍មុន នឹងក្លាយជាត្រីវិស័យដ៏សំខាន់សម្រាប់អាជ្ញាធរ ក៏ដូចជាផ្នែកពាក់ព័ន្ធក្នុងការប្រែក្លាយទីនោះទៅជាកន្លែងដ៏មានសក្តានុពលទាក់ទាញភ្ញៀវទេសចរជាតិ និងអន្តរជាតិឱ្យបានកាន់តែច្រើន។
លិខិតរបស់ទីស្តីការគណៈរដ្ឋមន្ត្រីកាលពីថ្ងៃទី ១២ ខែសីហា ដែលចុះហត្ថលេខាដោយរដ្ឋលេខាធិការប្រចាំការ លោក ហ៊ីង ថូរ៉ាក់ស៊ី ឱ្យដឹងថា អាស្រ័យលើស្ថានភាពនៃវិបត្តិជំងឺកូវីដ ១៩ ដែលមិនទាន់ស្រាកស្រាន្ត រដ្ឋាភិបាលកម្ពុជាបានឯកភាពដាក់ឱ្យប្រើប្រាស់ផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី ដូចដែលបានអនុវត្តកន្លងមកចំពោះផែនការមេអភិវឌ្ឍន៍វិស័យទេសចរណ៍ខេត្តសៀមរាប (២០២១-២០៣៥) និងផែនទីចង្អុលផ្លូវក្នុងការស្តារ និងលើកស្ទួយវិស័យទេសចរណ៍ក្នុង និងក្រោយវិបត្តិជំងឺកូវីដ ១៩។
ផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី ត្រូវបានសិក្សារៀបចំដោយគណៈកម្មការអន្តរក្រសួង ដែលដឹកនាំដោយលោក ថោង ខុន រដ្ឋមន្ត្រីក្រសួងទេសចរណ៍។ ផែនការនេះបានចាប់ផ្តើមដំណើរការរៀបចំកាលពីខែសីហា ឆ្នាំ ២០២០ និងបានបញ្ចប់ក្នុងខែសីហា ឆ្នាំ ២០២១។
លោកនាយករដ្ឋមន្ត្រី ហ៊ុន សែន នៅក្នុងលិខិតមួយកាលពីថ្ងៃទី ៩ ខែសីហា បានលើកឡើងថា វិស័យទេសចរណ៍ខេត្តមណ្ឌលគិរី កំពុងស្ថិតក្នុងដំណាក់កាលនៃភាពរីកចម្រើនដែលពោរពេញដោយសក្តានុពលសម្រាប់ការអភិវឌ្ឍ ហើយវានឹងរួមចំណែកយ៉ាងច្រើនសម្រាប់ការអភិវឌ្ឍសេដ្ឋកិច្ចខេត្ត ក៏ដូចជាសេដ្ឋកិច្ចកម្ពុជាទាំងមូល។
លោកបន្តថា ក្នុងន័យនេះរដ្ឋាភិបាលនឹងតម្រង់ទិសការអភិវឌ្ឍក្នុងក្របខ័ណ្ឌយុទ្ធសាស្ត្ររបស់ខេត្ត ដោយឈរលើស្ថានភាពជាក់ស្តែង និងប្រភពធនធានសក្តានុពលសម្រាប់ការវិនិយោគ និងអភិវឌ្ឍន៍វិស័យទេសចរណ៍ និងអន្តរវិស័យក្នុងក្តីសង្ឃឹមប្រកបដោយសុទិដ្ឋិនិយមថា ការអភិវឌ្ឍប្រកបដោយនិរន្តរភាព និងការទទួលខុសត្រូវនៃវិស័យនេះនឹងបង្កើតបានជាផលប្រយោជន៍សេដ្ឋកិច្ចសង្គមសម្រាប់ប្រជាពលរដ្ឋមូលដ្ឋាន និងរួមចំណែកដល់ការថែរក្សាការពារ និងអភិរក្សធនធានធម្មជាតិ បេតិកភណ្ឌវប្បធម៌ និងរក្សាបាននូវអត្តសញ្ញាណដើមរបស់ខេត្ត។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជាបាននិយាយថា ផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី នឹងមិនត្រឹមតែរួមចំណែកលើកកម្ពស់ និងតម្រង់ទិសការអភិវឌ្ឍវិស័យទេសចរណ៍ក្នុងខេត្តប៉ុណ្ណោះទេ ប៉ុន្តែថែមទាំងអាចជួយការពារ និងអភិរក្សតំបន់ព្រៃធម្មជាតិដែលកំពុងទទួលរងការរុករានទន្ទ្រានពីសំណាក់មនុស្សមួយចំនួនផងដែរ។ ផែនការមេអភិវឌ្ឍន៍នេះនឹងផ្តល់នូវភាពវិជ្ជមានច្រើនសម្រាប់អ្នកនៅក្នុងវិស័យទេសចរណ៍ ក៏ដូចជាអ្នកពាក់ព័ន្ធផ្ទាល់ និងប្រយោល។
លោកបញ្ជាក់ថា៖ «ការអនុម័តផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី គឺពិតជាមានសារៈសំខាន់ក្នុងការតម្រង់ទិសចំពោះអ្វីដែលកំពុងអនុវត្តនៅពេលនេះ ដើម្បីធ្វើឱ្យខេត្តនេះមាននិរន្តរភាពសម្រាប់ការអភិវឌ្ឍវិស័យទេសចរណ៍យូរអង្វែង»។
ទោះយ៉ាងណា ដោយសារធនធានមនុស្សនៅក្នុងវិស័យទេសចរណ៍ និងវិស័យពាក់ព័ន្ធនៅខេត្តមណ្ឌលគិរីនៅមានចំនួនតិចតួចនោះ លោកលើកឡើងថា ការបណ្តុះបណ្តាលធនធានមនុស្សក្នុងវិស័យបដិសណ្ឋារកិច្ច និងការផ្សព្វផ្សាយឱ្យប្រជាជនក្នុងតំបន់បានយល់ដឹងពីសារៈសំខាន់វិស័យទេសចរណ៍សម្រាប់កំណើនសេដ្ឋកិច្ច គឺជាផ្នែកសំខាន់ដែលរដ្ឋាភិបាលត្រូវយកចិត្តទុកដាក់។
លោក ងិន សុវិមាន ប្រធានមន្ទីរទេសចរណ៍ខេត្តមណ្ឌលគិរីនិយាយថា ផែនការមេអភិវឌ្ឍន៍វិស័យទេសចរណ៍នឹងក្លាយជាផែនទីបង្ហាញក៏ដូចជាការកែតម្រូវបញ្ហាមួយចំនួនដែលកំពុងកើតមាន ដើម្បីធ្វើឱ្យខេត្តកាន់តែមានសក្តានុពលទាក់ទាញអ្នកវិនិយោគ និងភ្ញៀវទេសចរ។
លោកបន្តថា តាមរយៈនេះលោកសង្ឃឹមថា ការអភិវឌ្ឍហេដ្ឋារចនាសម្ព័ន្ធថ្មីៗ រួមទាំងគម្រោងសាងសង់ព្រលានយន្តហោះខ្នាតតំបន់ក្នុងខេត្ត ក៏នឹងឆាប់ចេញជារូបរាងដែរ។ លោកប្រាប់ទៀតថា៖ «តាមរយៈការអនុម័តផែនការមេនេះ ខ្ញុំរំពឹងថា ខេត្តមណ្ឌលគិរីនឹងអាចស្រូបទាញបានភ្ញៀវទេសចរកាន់តែច្រើនបន្ទាប់ពីជំងឺកូវីដ ១៩ អាចគ្រប់គ្រងបានទាំងស្រុង»។
បើតាមលោក សុវិមាន បច្ចុប្បន្នក្នុងខេត្តមណ្ឌលគិរីមានសណ្ឋាគារ និងផ្ទះសំណាក់ប្រមាណ ១ ២០០ បន្ទប់។
រដ្ឋាភិបាលកម្ពុជាកន្លងមកបានប្រកាសពីផែនការកសាងព្រលានយន្តហោះខ្នាតតំបន់នៅលើផ្ទៃដីប្រហែល ៣០០ ហិកតា ក្នុងស្រុកអូររាំង ខេត្តមណ្ឌលគិរី ដោយតាមការប៉ាន់ស្មានអាចនឹងមានតម្លៃ ៨០ លានដុល្លារ។
អ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល លោក ស៊ិន ចាន់សេរីវុត្ថា ធ្លាប់និយាយថា កាលបរិច្ឆេទកសាងគម្រោងនេះអាចនឹងចាប់ផ្តើមនៅឆ្នាំ ២០២២៕ LA
វីដេអូ៖
