ភ្នំពេញៈ សមាជិកសហព័ន្ធស្រូវអង្ករកម្ពុជា (CRF) ដែលជាម្ចាស់រោងម៉ាស៊ីនកិនស្រូវ និងក្រុមហ៊ុនមួយចំនួនបានទទួលកម្ចីប្រមាណ ៥០ លានដុល្លារហើយ សម្រាប់ធ្វើជាទុនបង្វិលក្នុងការទិញស្រូវពីប្រជាកសិករនៅរដូវប្រមូលស្រូវប្រាំងឆ្នាំនេះ ដែលគេរំពឹងថា ទិន្នផលស្រូវប្រមូលបាននឹងមានចំនួនជិត ៣ លានតោន។ នេះបើយោងតាមថ្នាក់ដឹកនាំរបស់ CRF។
លោក យន់ យ៉េង អគ្គលេខាធិការសហព័ន្ធស្រូវអង្ករកម្ពុជា (CRF) បានឱ្យដឹងថា ប្រាក់ប្រមាណ ៥០ លានដុល្លាររួចហើយដែលសមាជិកសហព័ន្ធជាម្ចាស់រោងម៉ាស៊ីនកិនស្រូវ និងក្រុមហ៊ុននាំចេញខ្ចីពីធនាគារអភិវឌ្ឍន៍ជនបទ និងកសិកម្ម (ARDB) សម្រាប់ជាទុនបង្វិលក្នុងការទិញស្រូវពីកសិករ។
លោកនិយាយថា៖ «អ្វីដែលយើងដឹងគឺចាប់ដើមខែនេះមក ពួកគាត់បានខ្ចីប្រាក់ពី ARDB ជិត ៥០ លានដុល្លាររួចហើយ។ ប៉ុន្តែដើម្បីដឹងចំនួនជាក់លាក់ទាល់តែធនាគារ ARDB ទើបអាចបញ្ជាក់បានច្បាស់ ព្រោះជាអតិថិជនរបស់គាត់ ហើយរហូតមកពេលនេះប្រហែលជាអាចលើសនេះទៀតផង»។
លោក ចាន់ ពេជ្រ ប្រធានគ្រប់គ្រងទូទៅក្រុមហ៊ុន Signature of Asia ដែលជាក្រុមហ៊ុននាំចេញអង្ករទៅកាន់ទីផ្សារអន្តរជាតិ បានប្រាប់ភ្នំពេញ-ប៉ុស្តិ៍ថា កាលពីខែមុនក្រុមហ៊ុនរបស់លោកបានទទួលបានកម្ចីមួយចំនួនរួចហើយពី ARDB សម្រាប់ជាទុនបង្វិលសម្រាប់ទិញស្រូវពីកសិករ។ ក្រុមហ៊ុនលោកមានផែនការទិញស្រូវ ១០ ០០០ តោនក្នុងឆ្នាំនេះ។
លោកប្រាប់ថា៖ «ក្រុមហ៊ុនបានត្រៀមខ្លួនដើម្បីខ្ចីបន្ថែមទៀតសម្រាប់ប្រមូលទិញស្រូវនៅក្នុងរដូវប្រមូលផលក្នុងខែ ១០-១១ ខាងមុខ»។
ចាប់តាំងពីឆ្នាំ ២០១៦ រហូតមកដល់បច្ចុប្បន្ន ARDB បានទទួលកញ្ចប់ថវិកាក្រោមកម្មវិធីពិសេសពីរដ្ឋាភិបាល ៨០ លានដុល្លារដោយមិនទាន់រាប់បញ្ចូលមូលនិធិទ្រទ្រង់ និងអភិវឌ្ឍន៍វិស័យកសិកម្មដែល ARDB ទើបទទួលបានសម្រាប់បង្កើនដើមទុនក្នុងការជំរុញការទិញស្រូវពីកសិករសំដៅធ្វើឱ្យតម្លៃស្រូវមានស្ថិរភាព និងបង្កើនសន្និធិស្រូវសម្រាប់ផ្គត់ផ្គង់ដល់ការកែច្នៃអង្ករផ្គត់ផ្គង់តម្រូវការក្នុងប្រទេស និងនាំចេញ។
ARDB ឱ្យដឹងថា៖ «ក្រោមការយកចិត្តទុកដាក់ខ្ពស់ពីរដ្ឋាភិបាល និងក្រសួងសេដ្ឋកិច្ច និងហិរញ្ញវត្ថុ យើងបាននិងកំពុងផ្តល់ឥណទានជាទុនបង្វិលគាំទ្រដល់បណ្តារោងម៉ាស៊ីនកិនស្រូវ ក្រុមហ៊ុនកិនកែច្នៃ និងក្រុមហ៊ុននាំចេញអង្ករ ដើម្បីប្រមូលទិញស្រូវពីប្រជាកសិករនៅគ្រប់រដូវប្រមូលផលដោយទទួលយកសន្និធិស្រូវអង្ករ ជាវត្ថុធានាបំណុល ស្របតាមគោលនយោបាយរដ្ឋាភិបាល»។
CRF ឱ្យដឹងទៀតថា បច្ចុប្បន្នកម្ពុជាកំពុងប្រមូលផលស្រូវប្រាំងជុំទី ២ ចន្លោះពីខែកក្កដា ដល់ខែកញ្ញា ឆ្នាំ ២០២១ លើផ្ទៃដី ៥៦៣ ៣៩៤ ហិកតា ដោយរំពឹងទទួលបានទិន្នផលប្រមាណ ២,៨២ លានតោន។
ទិន្នន័យពី CRF បង្ហាញថា កម្ពុជាបាននាំចេញអង្ករសរុប ៣០៩ ៨៦៥ តោននៅក្នុងរយៈពេល ៧ ខែឆ្នាំ ២០២១ គិតជាប្រាក់ ២២៣,៨៥ លានដុល្លារ ចំណែកការនាំចេញស្រូវបានចំនួន ២ ០០៨ ២៤១ តោន គិតជាប្រាក់ជាង ៥០៣,០៩ លានដុល្លារ៕ LA