ភ្នំពេញៈ កម្ពុជាកំពុងពិនិត្យលទ្ធភាពជ្រើសរើសធនាគារអភិវឌ្ឍន៍កសិកម្ម និងជនបទ (ARDB) ជាយន្តការហិរញ្ញប្បទានបៃតងក្នុងគោលបំណង ដើម្បីទាក់ទាញការវិនិយោគបៃតងនៅកម្ពុជា។
ផែនការនេះត្រូវបានបង្ហើបនៅក្នុងកិច្ចពិភាក្សាលើការរៀបចំស្ថាប័នហិរញ្ញប្បទានបៃតងសម្រាប់កម្ពុជាកាលពីសប្តាហ៍មុន តាមប្រព័ន្ធអនឡាញ។
កិច្ចប្រជុំនេះមានការចូលរួមពីថ្នាក់ដឹកនាំ និងតំណាងអគ្គលេខាធិការនៃក្រុមប្រឹក្សាអភិវឌ្ឍន៍ដោយចីរភាព ក្រសួងបរិស្ថាន ក្រសួងសេដ្ឋកិច្ច និងហិរញ្ញវត្ថុ ធនាគារជាតិនៃកម្ពុជា ធនាគារអភិវឌ្ឍន៍កសិកម្ម និងជនបទ និងក្រុមហ៊ុន Mekong Strategic Partners ព្រមទាំងតំណាងធនាគារអភិវឌ្ឍន៍អាហ្វ្រិកខាងត្បូង សរុបទាំងអស់មានចំនួន ៣៣ នាក់។
ក្នុងកិច្ចប្រជុំនេះ ស្ថាប័នហិរញ្ញប្បទានបៃតង ដែលប្រតិបត្តិដោយធនាគារអភិវឌ្ឍន៍អាហ្វ្រិកខាងត្បូង បានធ្វើការចែករំលែកនូវបទពិសោធ និងភាពជោគជ័យដែលធនាគារនេះទទួលបានមូលនិធិពីយន្តការនៃមូលនិធិអាកាសធាតុបៃតង (GCF) សម្រាប់ការអភិវឌ្ឍគម្រោងវិនិយោគបៃតងនៅក្នុងប្រទេសរបស់ខ្លួន ដោយទាញយកមូលនិធិបានរហូត ១០០ លានដុល្លារនៅឆ្នាំ ២០១៩។
លោក វ៉ាន់ មុនីនាថ អគ្គលេខាធិការនៃក្រុមប្រឹក្សាអភិវឌ្ឍន៍កម្ពុជា លើកឡើងថា ដោយសារមានសន្តិភាព ស្ថិរភាពនយោបាយល្អបាននាំឱ្យកម្ពុជាមានឱកាសគិតគូរពីការបង្កើតស្ថាប័នហិរញ្ញប្បទានបៃតងដើម្បីទាញយកមូលនិធិអាកាសធាតុបៃតងសកលសម្រាប់គម្រោងវិនិយោគបៃតងនៅកម្ពុជា។
លោកនិយាយថា៖ «ក្រុមការងារអន្តរក្រសួងបានពិនិត្យ និងពិភាក្សាជាច្រើនលើក អំពីការជ្រើសរើសធនាគារអភិវឌ្ឍន៍ជនបទ និងកសិកម្ម (ARDB) ជាធនាគារមួយបំពេញតួនាទីសមស្របសម្រាប់កម្ពុជាធ្វើការប្រតិបត្តិហិរញ្ញប្បទាននេះ ដើម្បីឆ្លើយតបនឹងកិច្ចគាំពារបរិស្ថាន ការអភិរក្សជីវចម្រុះ និងការអភិវឌ្ឍដោយចីរភាព។
លោក កៅ ថាច អគ្គនាយកធនាគារ ARDB បានលើកឡើងក្នុងកិច្ចប្រជុំដាច់ដោយឡែកកាលពីថ្ងៃទី ២៤ ខែមិថុនា ថា ARDB កំពុងស្វែងរកការប្រឹក្សាយោបល់ពីទីភ្នាក់ងារអភិវឌ្ឍន៍បារាំង (AFD) និងក្រុមហ៊ុន Mekong Strategic Partners ដើម្បីពិនិត្យលទ្ធភាព និងយន្តការនៃផ្តល់ហិរញ្ញប្បទានបៃតង ក្រោមមូលនិធិអាកាសធាតុបៃតង (Green Climate Fund-GCF) តាមរយៈ AFD។
GCF ដំណើរការតាមរយៈបណ្តាញអង្គភាពដែលមានការទទួលស្គាល់ជាង ២០០ និងដៃគូចែកចាយដែលធ្វើការផ្ទាល់ជាមួយប្រទេសកំពុងអភិវឌ្ឍន៍សម្រាប់ការអនុវត្តគម្រោង។
GCF ឱ្យដឹងថា៖ «ការប្រែប្រួលអាកាសធាតុកំពុងដំណើរការលឿនជាងយើង។ យើងត្រូវការមហិច្ឆតា និងភាពបន្ទាន់ជាច្រើន។ ហិរញ្ញវត្ថុគឺជាគន្លឹះ។ ប្រទេសអភិវឌ្ឍន៍ប្រជាជាតិត្រូវបំពេញតាមការសន្យារបស់ខ្លួនក្នុងការកៀរគរប្រាក់ ១០០ ពាន់លានដុល្លារក្នុង ១ ឆ្នាំសម្រាប់ការកាត់បន្ថយ និងការសម្របខ្លួនក្នុងប្រទេសកំពុងអភិវឌ្ឍន៍ ដែលមូលនិធិអាកាសធាតុបៃតងមានតួនាទីសំខាន់»៕LA