ភ្នំពេញៈ ក្រសួងទេសចរណ៍បានសហការជាមួយដៃគូអភិវឌ្ឍន៍នានាក្នុងការផ្តល់វគ្គបណ្តុះបណ្តាលជំនាញកម្រិតខ្ពស់ផ្នែកម្ហូបអាហារដែលមានគុណភាព និងស្តង់ដាអនាម័យ ដើម្បីរៀបចំខ្លួនទទួលស្វាគមន៍ការជិតមកដល់នៃភ្ញៀវទេសចរអន្តរជាតិពេលដែលវិបត្តិនៃការឆ្លងរាលដាលជំងឺកូវីដ ១៩ មានភាពធូរស្រាលនាពេលខាងមុខ។
ក្រសួងទេសចរណ៍សហការជាមួយអង្គការ ASSIST វិទ្យាស្ថាន William Angliss នៃប្រទេសអូស្ត្រាលី និងក្រុមហ៊ុន Thalias Hospitality Group កាលពីថ្ងៃទី ១៦ ខែសីហា ឆ្នាំ ២០២១ បានរៀបចំសិក្ខាសាលាតាមប្រព័ន្ធអនឡាញស្តីពី «ការបណ្តុះបណ្តាលគ្រូបង្គោលជាតិ ផ្នែកផលិតកម្មម្ហូបអាហារនៃសេវាកម្មសណ្ឋាគារ» ដែលមានរយៈពេល ១៤ ថ្ងៃចាប់ពី ថ្ងៃទី ១៦ ខែសីហា ដល់ថ្ងៃទី ២ ខែកញ្ញា ឆ្នាំ ២០២១ ដោយមានសិក្ខាកាមសរុប ២៧ រូប។ សិក្ខាសាលានេះ ធ្វើឡើងក្នុងគោលបំណងដើម្បីលើកកម្ពស់ផលិតកម្មម្ហូបអាហារនៅកម្ពុជា។
រដ្ឋលេខាធិការក្រសួងទេសចរណ៍ លោក ប៉ាក់ សុខុម បានថ្លែងក្នុងពេលបើកសិក្ខាសាលានេះថា ការបណ្តុះបណ្តាលគ្រូបង្គោលជាតិផ្នែកផលិតកម្មម្ហូបអាហារ គឺពិតជាសំខាន់ក្នុងការឈានឆ្ពោះទៅត្រៀមបើកទទួលភ្ញៀវទេសចរអន្តរជាតិឡើងវិញ បន្ទាប់ពីវិបត្តិជំងឺកូវីដ ១៩ មានភាពថមថយ។ តាមរយៈការបណ្តុះបណ្តាលនេះ គ្រូបង្គោលជាតិត្រូវយកអ្វីដែលទទួលបាន ទៅធ្វើការបណ្តុះបណ្តាលបន្តដល់យុវជនខ្មែរផ្សេងៗទៀត ដើម្បីឈានឆ្ពោះទៅដល់ការត្រៀមបើកទេសចរណ៍អន្តរជាតិឡើងវិញ។
លោកថ្លែងថា៖ «សិក្ខាសាលានេះ គឺជាសកម្មភាពមួយនៃការអនុវត្តផែនទីចង្អុលផ្លូវស្តីពីការលើកស្ទួយ និងស្តារវិស័យទេសចរណ៍ឡើងវិញក្នុងអំឡុង និងក្រោយវិបត្តិកូវីដ ១៩ ដែលរដ្ឋាភិបាលបានអនុម័ត»។
លោកនាយករដ្ឋមន្ត្រី ហ៊ុន សែន កាលពីចុងខែមុន បានចេញសេចក្តីសម្រេចមួយស្តីពីការបង្កើតក្រុមការងាររាជរដ្ឋាភិបាល និងឯកជន ដើម្បីស្តារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឺកូវីដ ១៩ ដោយមានរដ្ឋមន្ត្រីក្រសួងទេសចរណ៍ លោក ថោង ខុន ជាប្រធាន។ ក្រុមការងារនេះមានតួនាទី និងភារកិច្ច ដឹកនាំ ចាត់ចែង និងតាមដានត្រួតពិនិត្យការអនុវត្តផែនទីចង្អុលផ្លូវ (Roadmap) ស្ដីអំពីផែនការស្ដារ និងលើកស្ទួយវិស័យទេសចរណ៍ក្នុង និងក្រោយវិបត្តិជំងឺកូវីដ ១៩។
ប្រធានសមាគមសហគមន៍ចុងភៅកម្ពុជា លោក សុង តេង បានប្រាប់ភ្នំពេញប៉ុស្តិ៍ នៅថ្ងៃទី ១៧ ខែសីហា ថា សិក្ខាសាលាស្តីពីម្ហូបអាហារមានគុណភាព និងស្តង់ដាអនាម័យនឹងជួយផ្សព្វផ្សាយពីមុខម្ហូបខ្មែរ ក៏ដូចជាអាហារបរទេសមួយចំនួននៅកម្ពុជា ទៅកាន់ប្រជាជននៃប្រទេសនានាលើពិភពលោកឱ្យងាកចាប់អារម្មណ៍ក្នុងការធ្វើដំណើរមកកម្សាន្តនៅកម្ពុជា។ ម្យ៉ាងទៀត សិក្ខាសាលានេះក៏ធ្វើឡើងនៅចំពេលដែលប្រទេសកម្ពុជា កំពុងរៀបចំខ្លួនដើម្បីត្រៀមបើកទ្វារទទួលភ្ញៀវទេសចរបរទេសចាក់វ៉ាក់សាំងរួចរាល់នៅត្រីមាសទី ៤ ខាងមុខនេះផងដែរ។
លោកនិយាយថា៖ «កម្ពុជាគួរតែរៀបចំសិក្ខាសាលាបណ្តុះបណ្តាលម្ហូបអាហារឱ្យបានច្រើន ព្រោះតាមរយៈនេះគេអាចធ្វើការបញ្ជ្រាបឱ្យចុងភៅខ្មែរបានយល់ដឹងកាន់តែច្រើនពីមុខម្ហូប និងស្តង់ដាគុណភាពអនាម័យ ព្រមទាំងជួយផ្សព្វផ្សាយពីមុខម្ហូបខ្មែរដល់ភ្ញៀវទេសចរបរទេសផងដែរ»។
លោក ឡុង ប៊ុនហោ ប្រធានសមាគមចុងភៅកម្ពុជាបាននិយាយថា មនុស្សគ្រប់រូបសុទ្ធតែត្រូវការអាហារបរិភោគ ដូច្នេះបើកម្ពុជាមានមុខម្ហូបអាហារល្អ រសជាតិឈ្ងុយឆ្ងាញ់ និងគុណភាពស្តង់ដាអនាម័យខ្ពស់ទៀតនោះ វានឹងក្លាយជាមេដែកមួយស្រូបទាញភ្ញៀវបរទេសឱ្យធ្វើដំណើរមកកម្ពុជាកាន់តែច្រើន។ លោកបន្តថា ដើម្បីចូលរួមជាមួយក្រសួងទេសចរណ៍ និងអាជ្ញាធរខេត្តសៀមរាប នៅពេលនេះថ្នាក់ដឹកនាំ CCA ក៏បានជួបប្រជុំគ្នាជាបណ្តើរៗដើម្បីរៀបចំផែនការ ក៏ដូចជាយុទ្ធសាស្ត្រថ្មីៗសម្រាប់ត្រៀមទទួលភ្ញៀវទេសចរបរទេសមកកម្ពុជានៅពេលខាងមុខ។
លោកអះអាងថា៖ «ប្រសិនបើមានវគ្គបណ្តុះបណ្តាលកាន់តែច្រើន វានឹងជួយលើកកម្ពស់គុណភាពម្ហូបអាហារខ្មែរ ក៏ដូចជាទាក់ទាញភ្ញៀវបរទេសឱ្យធ្វើដំណើរមកកម្ពុជាដើម្បីសាកភ្លក្សរសជាតិទៀតផង»។
បើតាមលោក ប៊ុនហោ CCA ក៏មានគម្រោងក្នុងការរៀបចំពិព័រណ៍ម្ហូបអាហារក្នុងខេត្តសៀមរាប នៅដើមឆ្នាំ ២០២២ ខាងមុខផងដែរ។
យោងតាមក្រសួងទេសចរណ៍មកដល់ពេលនេះក្រសួងបានធ្វើការបណ្តុះបណ្តាលគ្រូបង្គោល និងអ្នកវាយតម្លៃបង្គោលជាតិចំនួន ៦៣០ រូបហើយ។
ក្នុងឆមាសទី ១ ឆ្នាំ ២០២១ ប្រទេសកម្ពុជាទទួលបានភ្ញៀវទេសចរអន្តរជាតិ ១០២ ៥៦០ នាក់ ថយចុះ ៩១,៣ ភាគរយបើធៀបនឹងរយៈពេលដូចគ្នាឆ្នាំ ២០២០។ នេះបើតាមទិន្នន័យក្រសួងទេសចរណ៍៕