.jpg)
Cambodia នឹងនាំមកផលិតផលយីហោល្បីៗចូលក្នុងទីផ្សារកម្ពុជា។ រូបថត Bluebell
ភ្នំពេញៈ Bluebell Group ដែលជាក្រុមហ៊ុននាំចូល និងចែកចាយយីហោផលិតផលល្បីៗឈានមុខគេនៅទ្វីបអាស៊ី កាលពីថ្ងៃទី ១៦ ខែសីហា បានប្រកាសដាក់ឱ្យដំណើរការប្រតិបត្តិការរបស់ខ្លួននៅប្រទេសកម្ពុជា ដែលនេះជាការពង្រីកវត្តមានរបស់ខ្លួនមកកាន់បណ្តាប្រទេសនៅអាស៊ីអាគ្នេយ៍។
ក្រុមហ៊ុននេះកំពុងប្រតិបត្តិការយីហោប្រណីតប្រមាណ ១៥០ នៅលើពិភពលោកទាំងក្នុងវិស័យលក់រាយក្នុងស្រុក និងការធ្វើដំណើរ។ ចក្ខុវិស័យ Bluebell សម្រាប់គម្រោងនេះ គឺ «ការលក់រាយប្រកបដោយសុខដុមរមនា»។
លោក Allen Dodgson Tan នាយកក្រុមហ៊ុន Bluebell Cambodia បានឱ្យដឹងថា ការដាក់ឱ្យដំណើរការនេះគឺជាពេលវេលាផ្លាស់ប្តូរដ៏ធំមួយក្នុងពេលកម្ពុជាអភិវឌ្ឍសេដ្ឋកិច្ចរបស់ខ្លួន និងបង្កើតការងារដល់ប្រជាជនក្នុងអំឡុងពេលការរីករាលដាលកូវីដ ១៩។
លោកថ្លែងថា៖ «យើងមានក្តីរំភើបក្នុងការនាំយកស្តង់ដាថ្មីនៃការលក់រាយមកកម្ពុជា។ Bluebell នឹងនាំមកនូវយីហោសកលជាច្រើនចូលក្នុងទីផ្សារកម្ពុជា នាំយកការវិនិយោគផ្ទាល់ ការងារ និងប្រាក់ចំណូលពន្ធដល់ប្រទេសកម្ពុជា»។
កាលពីខែធ្នូ ឆ្នាំ ២០២០ ក្រុមហ៊ុន Oxley Gem (Cambodia)Co., Ltd បានចុះអនុស្សរណៈនៃការយោគយល់គ្នា ជាមួយក្រុមហ៊ុន Bluebell Trading Pte. Ltd ដើម្បីដាក់បញ្ចូលក្រុមហ៊ុន Bluebell ជាក្រុមហ៊ុន The Peak ដែលជាការអភិវឌ្ឍដ៏សំខាន់នៃផ្សារលក់រាយនៅប្រទេសកម្ពុជា។
បច្ចុប្បន្ន Bluebell Group មានវត្តមាននៅប្រទេសជប៉ុន កូរ៉េខាងត្បូង ចិន ថៃ សិង្ហបុរី ម៉ាឡេស៊ី និងឥណ្ឌូនេស៊ី។
លោក Pierre Balsan នាយកគ្រប់គ្រង Bluebell Cambodia ឱ្យដឹងថា កម្ពុជាត្រូវបានចាត់ទុកជាទិសដៅសំខាន់ក្រោយពីមានសេដ្ឋកិច្ចដ៏រឹងមាំរយៈពេល ២០ ឆ្នាំកន្លងមក។ នេះបើតាម Cambodia Investment Review។
លោកបន្តថា៖ «កម្ពុជាមានការកើនឡើង និងការចង់បានរបស់ប្រជាជនថ្នាក់កណ្ដាល ដែលជាស្នូលនៃគំរូអាជីវកម្មយើង។ នោះអាចនិយាយថា អតិថិជនកម្ពុជាជាច្រើនបានធ្វើដំណើរចេញទៅក្រៅប្រទេសរួចហើយ ដើម្បីទិញផលិតផលស្រដៀងគ្នានេះ ដូច្នេះយើងសង្ឃឹមថា នឹងផ្ដល់បទពិសោធក្នុងស្រុកសម្រាប់ពួកគេ»។
លោក Balsan ឱ្យដឹងទៀតថា ខណៈហាងលក់រាយលើកដំបូងនឹងមានទីតាំងនៅទីក្រុងភ្នំពេញ ក្រុមហ៊ុនក៏នឹងស្វែងរកការពង្រីកប្រតិបត្តិការទៅក្រុងព្រះសីហនុ និងខេត្តសៀមរាបនៅពេលអនាគត។
ជាការឆ្លើយតបនឹងការបារម្ភលើផលប៉ះពាល់ដោយសារជំងឺកូវីដ ១៩ នៅពេលបច្ចុប្បន្នលើការចំណាយរបស់អតិថិជន លោក Balsan បានឱ្យដឹងថា ទីផ្សារយីហោប្រណីត មិនរងផលប៉ះពាល់ដោយសារតែការប្រែប្រួលទីផ្សារទូទៅនោះទេ។
បច្ចុប្បន្ន Bluebell Group មានបុគ្គលិកជាង ៤ ០០០ នាក់ ទីតាំងលក់ ១ ០០០ និងមានប្រាក់ចំណូលប្រមាណ ២,៥ ពាន់លានដុល្លារ៕LA
