.jpg)
កសិដ្ឋានចិញ្ចឹមជ្រូកមួយកន្លែងក្នុងខេត្តកំពង់ឆ្នាំង។ ហេង ជីវ័ន
ភ្នំពេញៈ ក្រុមហ៊ុនចំនួន ៤ បានដាក់លិខិតទៅក្រសួងសេដ្ឋកិច្ច និងហិរញ្ញវត្ថុ និងក្រសួងពាណិជ្ជកម្ម ដើម្បីស្នើសុំបើកឱ្យមានការដាក់ដេញថ្លៃនាំចូលជ្រូករស់មកបំពេញតម្រូវការទីផ្សារនៅកម្ពុជា ខណៈអ្នកនៅក្នុងវិស័យនេះលើកឡើងថា ជាទង្វើដើរផ្ទុយពីគោលការណ៍របស់រដ្ឋាភិបាលដែលកំពុងជំរុញការលើកកម្ពស់ផលិតភាពចិញ្ចឹមសត្វក្នុងស្រុក។
លិខិតនោះបានបញ្ជាក់ថា ការដាក់ដេញថ្លៃនេះនឹងផ្តល់ផលប្រយោជន៍ដល់ការប្រមូលចំណូលចូលថវិកាជាតិជាង ៣ លានដុល្លារក្នុង ១ ឆ្នាំ។ ក្រុមហ៊ុនមួយមានសិទ្ធិនាំចូលសត្វជ្រូករស់បានចំនួន ៩៦០ ក្បាលក្នុង ១ ថ្ងៃ និងត្រូវបង់ថវិកាចូលជាតិជាងកន្លះលានដុល្លារ ១ ឆ្នាំ។
លិខិតនេះបានបន្ថែមថា តាមរយៈការដេញថ្លៃនឹងជួយប្រជាពលរដ្ឋបានហូបសាច់ជ្រូកក្នុងតម្លៃមួយសមរម្យ មិនថ្លៃហួសហេតុដូចសព្វថ្ងៃនេះ។
លិខិតបន្តថា៖ «ដោយសារកន្លងមក ការអនុញ្ញាតឱ្យនាំចូលសត្វជ្រូករស់សម្រាប់យកមកបំពេញសេចក្តីត្រូវការលើទីផ្សារនៅកម្ពុជា មិនមានតម្លាភាពធ្វើឱ្យឈ្មួញដែលនាំចូលមានលក្ខណៈផ្តាច់មុខគ្រប់គ្រងទីផ្សារ និងដំឡើងតម្លៃសាច់ជ្រូកលើទីផ្សារខ្ពស់ស្រេចតែចិត្ត។ កត្តានេះធ្វើឱ្យក្រុមហ៊ុនដទៃទៀតមិនមានឱកាសទទួលបានសិទ្ធិនាំចូល ដើម្បីប្រកួតប្រជែងលក្ខណៈទីផ្សារសេរីបាននោះទេ»។
ក្រុមហ៊ុនទាំង ៤ រួមមាន ក្រុមហ៊ុន ផៅវ័រ អ៊ិនធើ អេស៊ាន ជេអិន (ខេមបូឌា) អ៊ិនវេសម៉ិន ឯ.ក, ក្រុមហ៊ុន ឆាង រិទ្ធី ត្រេឌីង អ៊ិមផត អិចផត ឯ.ក, ក្រុមហ៊ុន រ៉ូស៊ីតា (អអេសធី) និងក្រុមហ៊ុន ជីធី ហ្វោនដេសិន (ខេមបូឌា) ឯ.ក។
សព្វថ្ងៃក្រុមហ៊ុនទទួលអាជ្ញាប័ណ្ណនាំចូលជ្រូកមានចំនួន ៧ ក្រុមហ៊ុន។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាប្រាប់ ភ្នំពេញ ប៉ុស្តិ៍ថា អ្នកក្នុងវិស័យនេះគួរអនុវត្តឱ្យបានតាមគោលការណ៍របស់ប្រមុខរដ្ឋាភិបាលដែលបានដាក់ចេញ ដើម្បីជំរុញការចិញ្ចឹមសត្វក្នុងស្រុក និងកាត់បន្ថយការនាំចូលជាជាងការនាំចូលធ្វើឱ្យប៉ះពាល់ដល់ប្រជាកសិករចិញ្ចឹមជ្រូកក្នុងស្រុក។
លោកនិយាយថា៖ «បើអនុញ្ញាតឱ្យក្រុមហ៊ុនទាំងនេះនាំចូលដោយសេរី ខ្ញុំជឿថា ម្តងនេះប្រជាកសិករនឹងលែងជឿទុកចិត្តទៅលើរដ្ឋាភិបាលក៏ដូចជា ក្រសួងកសិកម្មទៀតហើយ។ យើងគួរតែនាំគ្នាមកចិញ្ចឹមជ្រូកដើម្បីបង្គ្រប់ឱ្យទីផ្សារយើង។ កម្ពុជាមិនមែនជាធុងសំរាមទេ បញ្ឈប់ការនាំចូលដែលអាចនាំឱ្យមានការចម្លងមេរោគដល់សត្វក្នុងស្រុក និងប៉ះពាល់តម្លៃ ពិសេសវត្ថុធាតុដើមក្នុងស្រុកនឹងគ្មានទីផ្សារ»។
បើតាមលោក ស្រ៊ុន ពៅ កម្ពុជានឹងខាតបង់ថវិកាប្រមាណ ៣០០-៥០០ លានដុល្លារក្នុង ១ ខែ ប្រសិនបើអនុញ្ញាតឱ្យនាំចូលជ្រូករស់ទាំងស្រុងពីក្រៅប្រទេស។ លោកលើកឡើងថា៖ «សព្វថ្ងៃនេះការផ្គត់ផ្គង់សាច់ជ្រូកពីកសិករក្នុងស្រុកជិតគ្រប់លើទីផ្សារហើយ ដោយយើងនៅខ្វះប្រហែល ១០ ភាគរយទៀតទេ យើងប្រឹងប្រែងបន្តិចទៀតគ្រប់ហើយ»។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ បានប្រាប់ថា ក្រសួងនៅមិនទាន់ទទួលបានលិខិតពីក្រុមហ៊ុនទាំងនោះនៅឡើយទេ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានសរសេរនៅហ្វេសប៊ុកផ្ទាល់ខ្លួននៅថ្ងៃពុធថា ឈ្មួញមួយចំនួនមានបំណងនាំចូលសត្វពីបរទេសមកចាក់បំផ្លាញការចិញ្ចឹមសត្វនៅកម្ពុជាដែលកំពុងមានវឌ្ឍនភាពល្អ ដោយសកម្មភាពចិញ្ចឹមសត្វកើនឡើងរហូតដល់ជាង ៨៥ ភាគរយហើយ។ លោកសរសេរថា៖ «ទង្វើនេះបញ្ជាក់ឱ្យឃើញថា កំពុងធ្វើសកម្មភាពផ្ទុយនឹងគោលនយោបាយរបស់រាជរដ្ឋាភិបាល»។
លោករដ្ឋមន្ត្រីបានឱ្យដឹងថា ក្រសួងកសិកម្ម និងក្រសួងពាណិជ្ជកម្មបានប្តេជ្ញារឹតត្បិត ឬកាត់បន្ថយបរិមាណនាំចូល និងវិធានការទប់ស្កាត់ឱ្យខាងតែបានលើការនាំចូលសត្វខុសច្បាប់ក្នុងបំណង ដើម្បីលើកកម្ពស់ផលិតភាពផលិតកម្មចិញ្ចឹមសត្វក្នុងស្រុក ធានាបរិមាណផ្គត់ផ្គង់ឱ្យទីផ្សារក្នុងស្រុកប្រកបដោយគុណភាព និងសុវត្ថិភាព។
អគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្មឱ្យដឹងថា សព្វថ្ងៃមានក្រុមហ៊ុនចំនួន ៦ ដែលទទួលបានគោលការណ៍នាំជ្រូករស់ចូលមកកម្ពុជា និង ៤ ក្រុមហ៊ុនទទួលគោលការណ៍នាំឆ្លងកាត់។
អគ្គនាយកដ្ឋាននេះឱ្យដឹងទៀតថា ក្នុងរយៈពេល ៦ ខែ ដើមឆ្នាំ ២០២១ ការសុំបង្កើតកសិដ្ឋានចិញ្ចឹមជ្រូកនៅកម្ពុជាមាន ៦១ កន្លែង ក្នុងនោះកសិដ្ឋានចិញ្ចឹមពូជជ្រូក ៧ កន្លែង និងកសិដ្ឋានចិញ្ចឹមជ្រូកសាច់ ៥៤ កន្លែង៕ LA
វីដេអូ៖
