.jpg)
លោកស្រី ជា សេរី អគ្គនាយិកាបច្ចេកទេស NBC ពេលផ្តល់បទសម្ភាសន៍ដល់ CNN។ រូបភាព NBC
ភ្នំពេញៈ មន្ត្រីជាន់ខ្ពស់នៃធនាគារជាតិនៃកម្ពុជា (NBC) បានឱ្យដឹងថា ការទូទាត់តាមប្រព័ន្ធឌីជីថល ក្លាយជាមធ្យោបាយដ៏សំខាន់មួយសម្រាប់ការចំណាយប្រចាំថ្ងៃរបស់ប្រជាជន ជាពិសេសក្នុងអំឡុងពេលការរីករាលដាលជំងឺកូវីដ ១៩ ដែលតម្រូវឱ្យអនុវត្តតាមវិធានការគម្លាតសង្គម។
លោកស្រី ជា សិរី អគ្គនាយិកាបច្ចេកទេសនៃធនាគារជាតិនៃកម្ពុជាបានថ្លែងទៅកាន់បណ្តាញព័ត៌មានខ្សែកាប (CNN) របស់សហរដ្ឋអាមេរិកកាលពីសប្ដាហ៍មុនថា ការទូទាត់តាមប្រព័ន្ធឌីជីថលក្នុងអំឡុងពេលនៃការរីករាលដាលជំងឺកូវីដ ១៩ ចាប់តាំងពីចុងឆ្នាំ ២០១៩ រហូតមកដល់ចុងឆ្នាំ ២០២០ ឃើញមានកំណើន ៣៥០ ភាគរយ និងមានតម្លៃទឹកប្រាក់ប្រតិបត្តិការកើនឡើងប្រហែល ២០០ ភាគរយដល់ប្រហែល ៦៨ ពាន់លានដុល្លារ ដែលហូរចូលទៅក្នុងការទូទាត់តាមអេឡិចត្រូនិក។ ទន្ទឹមនឹងនេះ ប្រតិបត្តិការតាមបាគង ដែលជាប្រព័ន្ធទូទាត់អន្តរធនាគារ របស់ NBC កំពុងកើនឡើងយ៉ាងឆាប់រហ័ស។
លោកស្រីថ្លែងថា៖ «នៅពេលនេះ យើងមានប្រតិបត្តិការប្រហែល ១,៥ លាន នៅក្នុងប្រព័ន្ធអេកូស៊ីស្ដែមបាគង ដែលមានតម្លៃប្រហែល ៥០០ លានដុល្លារ។ វាកំពុងកើនឡើងយ៉ាងរហ័ស ដោយកាលពីត្រីមាសមុន អ្នកប្រើប្រាស់សេវាទូទាត់មានចំនួនច្រើនសែននាក់ប៉ុណ្ណោះ ប៉ុន្តែគិតត្រឹមត្រីមាសទី ២ យើងមើលឃើញការកើនឡើង ២ ដងនៃចំនួននៅពេលនេះ អ្នកប្រើប្រាស់កើនឡើងដល់ ២០០ ០០០ នាក់ ដូច្នេះយើងសង្ឃឹមថា វានឹងកើនឡើងបន្ថែមទៀត»។
លោកស្រីបន្ថែមថា៖ «សំខាន់ជាងនេះយើងសង្ឃឹមថា យើងអាចសហការជាមួយបណ្ដាប្រទេសផ្សេងទៀត ព្រមទាំងដើម្បីលើកកម្ពស់ប្រតិបត្តិការឆ្លងកាត់ព្រំដែនសម្រាប់ភ្ញៀវទេសចរ និងកម្មករចំណាកស្រុកផងដែរ»។
NBC កាលពីថ្ងៃទី ២៧ ខែតុលាឆ្នាំ ២០២០ បានដាក់ឱ្យដំណើរការកម្មវិធីទូទាត់ចល័តអន្តរធនាគារដែលគេស្គាល់ថា ជា «ប្រព័ន្ធបាគង» សំដៅផ្ដល់កម្លាំងជំរុញដ៏ខ្លាំងដល់ការអភិវឌ្ឍវិស័យហិរញ្ញវត្ថុ និងជំរុញបរិយាប័ន្នហិរញ្ញវត្ថុនៅកម្ពុជា។
ប្រព័ន្ធ «បាគង» អាចធ្វើប្រតិបត្តិការរវាងធនាគារ និងគ្រឹះស្ថានហិរញ្ញវត្ថុ ប្រកបដោយសុវត្ថិភាព និងចំណាយតិច។
លោកស្រី ជា សិរី បានឱ្យដឹងថា មានទិសដៅសំខាន់ៗចំនួន ៣ របស់ប្រព័ន្ធបាគង ដែលទី ១ ជាអន្តរប្រតិបត្តិការ ដោយសារយើងមានប្រព័ន្ធធនាគារមួយដែលបែកបាក់គ្នាយ៉ាងខ្លាំង ដោយក្រុមហ៊ុនផ្ដល់សេវាទូទាត់ និងធនាគារមិននិយាយរកគ្នាទៅវិញទៅមកនោះទេ ហើយអន្តរប្រតិបត្តិការធ្វើឱ្យការទូទាត់កាន់តែងាយស្រួល។ ទី ២ គឺជា បរិយាប័ន្នហិរញ្ញវត្ថុ និងទី ៣ គឺលើកកម្ពស់រូបិយប័ណ្ណក្នុងស្រុក។
លោកស្រីលើកឡើងថា៖ «តាមពិត ក្នុងអំឡុងពេលវិធានការគម្លាតសង្គមដោយសារជំងឺកូវីដ ១៩ នេះ សូមអរគុណដល់ព្រះ ដែលយើងបានធ្វើការងារលើគម្រោងនេះសម្រេចមុនពេលផលប៉ះពាល់ ដោយសារតែការរីករាលដាលជំងឺកូវីដ ១៩។ ដូច្នេះ ការប្រឈមនឹងស្ថានការនេះគឺថា ការទទួលយកឌីជីថលគឺរហ័សខ្លាំងបំផុត ដូច្នេះយើងបានធ្វើឱ្យវិធានការ KYC កាន់តែងាយស្រួល»។
លោក សាយ សូនី អនុប្រធានជាន់ខ្ពស់នៅប្រាសាក់បានឱ្យដឹងថា ប្រាសាក់បានចូលរួមជាមួយប្រព័ន្ធបាគង កាលពីខែកញ្ញាឆ្នាំ ២០១៩ ហើយប្រើប្រាស់វាកាលពីខែតុលាឆ្នាំ ២០១៩ ដោយមើលឃើញមានការកើនឡើងចំនួនប្រតិបត្តិការ តាមរយៈប្រព័ន្ធនេះ។
លោកថ្លែងថា៖ «យើងចូលរួមគំនិតផ្តួចផ្ដើមដោយធនាគារជាតិនៃកម្ពុជានេះដោយសារតែយើងមើលឃើញនិន្នាការតម្រូវការបច្ចេកវិទ្យា និងទីផ្សារ ដោយសារយើងមើលឃើញអតិថិជនរបស់យើង និងអតិថិជនរបស់គ្រឹះស្ថានមីក្រូហិរញ្ញវត្ថុផ្សេងទៀតមានការពិបាកក្នុងការធ្វើប្រតិបត្តិការឆ្លងកាត់ធនាគារ»។
លោកបន្តថា មានសេវាសំខាន់ ២ នៅពេលនេះ ដែលអាចរកបាននៅគ្រប់សាខារបស់ប្រាសាក់ទាំង ១៨២ និងហាងលក់ទំនិញទាំង ១៤០ ទូទាំងប្រទេស ដែលអាចឱ្យពួកគេធ្វើប្រតិបត្តិការនៃការទូទាត់តាមប្រព័ន្ធបាគង និងផ្ទេរប្រាក់ទៅគណនីធនាគារផ្សេងទៀតតាមរយៈបាគង។
គាំទ្រដោយការអភិវឌ្ឍបច្ចេកវិទ្យា និងនវានុវត្តន៍យ៉ាងឆាប់រហ័ស ក្រុមហ៊ុនបច្ចេកវិទ្យា និងឌីជីថលកម្ពុជាសម្រេចបានប្រាក់ចំណូល ៤៧០ លានដុល្លារសម្រាប់ឆ្នាំ ២០១៩។ នេះបើយោងតាមរបាយការណ៍ចុងក្រោយបានពីធនាគារអភិវឌ្ឍន៍អាស៊ី (ADB) ដែលបានចេញផ្សាយកាលពីចុងខែឧសភា។
ធនាគារអន្តរជាតិដែលមានមូលដ្ឋាននៅតំបន់ Metro Manila មួយនេះបានឱ្យដឹងថា បើបែងចែកតាមវិស័យ ពាណិជ្ជកម្មតាមអេឡិចត្រូនិក មានចំនួន ២៧,៦ ភាគរយ សេវាកម្មតាមអេឡិចត្រូនិកមានចំនួន ៧,៨ ភាគរយ ប្រព័ន្ធព័ត៌មានឌីជីថលមានចំនួន ១០,២ ភាគរយ បច្ចេកវិទ្យាផ្សព្វផ្សាយពាណិជ្ជកម្មមានចំនួន ១២,៧ ភាគរយ ការដឹកជញ្ជូន ៣,៨ ភាគរយ និងការធ្វើដំណើរតាមអនឡាញ ៣៧,៩ ភាគរយ៕LA
