.jpg)
កសិករប្រមូលផលផ្លែមៀននៅខេត្តបាត់ដំបង កាលពីឆ្នាំ ២០១៧។ រូបថត ភ្នំពេញ ប៉ុស្តិ៍
ភ្នំពេញៈ សមាគមមៀនប៉ៃលិនសង្ឃឹមថា យុទ្ធនាការទិញមៀនប៉ៃលិន (តាង៉ែន) ដែលដាក់ចេញដោយប្រមុខរដ្ឋាភិបាលនឹងជួយស្រោចស្រង់ទីផ្សារមៀនប៉ៃលិនឡើងវិញ ពីការជាប់គាំងមិនអាចនាំចេញទៅទីផ្សារអន្តរជាតិបាន។
ថ្មីនេះៗលោកនាយករដ្ឋមន្ត្រី ហ៊ុន សែន បានដាក់ចេញយុទ្ធនាការប្រមូលទិញផ្លែមៀនពីប្រជាកសិករតាមបណ្តាខេត្តជាប់ព្រំដែនកម្ពុជា-ថៃ ដោយលោកបញ្ជាឱ្យលោក ហ៊ីង ប៊ុនហៀង នាយករងខុទ្ទកាល័យនាយករដ្ឋមន្ត្រីចាប់ផ្តើមប្រមូលទិញផ្លែមៀនពីកសិករពីថ្ងៃទី ១៨ ខែ សីហាតទៅ។
លោក សួន ជុំ អនុប្រធានក្រុមប្រឹក្សាភិបាលសមាគមមៀនប៉ៃលិន កត់សម្គាល់ថា ចាប់ពីមានយុទ្ធនាការនេះ ការបញ្ជាទិញផ្លែមៀនពីសមាជិកសមាគមជាហូរហែ ដោយកាលពីថ្ងៃពុធម្សិលមិញឈ្មួញកុម្ម៉ង់ទិញប្រមាណ ១០ តោន។ លោកប្រាប់ថា៖ «ចលនាចុះទិញមៀនកសិករនេះនឹងជួយស្រោចស្រង់មៀនកសិករ។ ខ្ញុំសង្ឃឹមថា បើមិនអស់ក៏ជិតអស់ដែរ ប្រសើរជាងយើងទុកឱ្យខូចចោល»។
លោកប៉ាន់ប្រមាណថា ទិន្នផលមៀនប្រមូលបានប្រមាណ ៥ ម៉ឺនតោនសម្រាប់ខេត្តប៉ៃលិនឆ្នាំនេះ។ បច្ចុប្បន្ន ផ្លែមៀននៅចម្ការមានតម្លៃចាប់ពី ២ ០០០ ដល់ ២ ៥០០ រៀលក្នុង ១ គីឡូក្រាមអាស្រ័យលើគុណភាពនៃផ្លែមៀននីមួយៗ។ លោកបន្ថែមថា៖ «សមាជិកយើងខ្លះបានបន្តលក់ឱ្យឈ្មួញជាបន្តបន្ទាប់ ព្រោះទុកយូរខ្លាចខូចនាដើមរដូវប្រមូលផលនេះ»។
លោកស្រី ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាក៏បានបញ្ជាទិញផ្លែមៀនចំនួន ២១ តោនដើម្បីចែកជូនក្រុមគ្រូពេទ្យ និងអ្នកជំងឺកូវីដ ១៩ ដែលកំពុងសម្រាកព្យាបាលតាមមន្ទីរពេទ្យនៅទីក្រុងភ្នំពេញ។
មៀនប៉ៃលិន ឬតាង៉ែនត្រូវបានដាំដុះច្រើននៅខេត្តប៉ៃលិន និងខេត្តបាត់ដំបង ដែលជាខេត្តជាប់ព្រំដែនកម្ពុជា-ថៃ។
ប្រធានមន្ទីរពាណិជ្ជកម្មខេត្តបាត់ដំបង លោក គឹម ហួត ឱ្យដឹងថា យុទ្ធនាការនេះជាគោលនយោបាយរបស់ប្រមុខរដ្ឋាភិបាលដោយលោកឃើញថា ផ្លែមៀនរបស់ប្រជាកសិករទុំគ្មានអ្នកទិញ ព្រោះមិនអាចនាំចេញបាន ដូចនេះលោកសម្រេចបង្កើតក្រុមការងារចុះជួយទិញផ្លែមៀនពីប្រជាកសិករ។
លោកប្រាប់ថា៖ «ដោយការប្រមូលផលមៀនមានរយៈពេលយូរថ្ងៃ ហេតុនេះយុទ្ធនាការទិញក្នុងជំហានទី ១ យើងនឹងធ្វើក្នុងរយៈពេល ១ សប្តាហ៍ ដោយប្រមូលទិញពីកសិករដល់ចម្ការ។ ខ្ញុំនឹងចុះផ្ទាល់នៅតាមស្រុកទាំង ៤ ដែលដាំដុះតាង៉ែនច្រើន ដើម្បីធ្វើផែនការថា តើកសិករណាខ្លះនឹងត្រូវប្រមូលផលក្នុងសប្តាហ៍នេះ»។
ដោយឡែកអនុវត្តតាមអនុសាសន៍របស់ប្រមុខរដ្ឋាភិបាល រដ្ឋបាលខេត្តប៉ៃលិន ក៏បានប្រកាសទិញមៀនប៉ៃលិនពីប្រជាកសិករផ្ទាល់ (មិនមែនពីឈ្មួញកណ្តាល) ចាប់ពីថ្ងៃទី ១៨ ខែ សីហា ផងដែរ៕ LA
