ភ្នំពេញៈ កម្ពុជាកំពុងរៀបចំ ហើយនឹងគ្រោងដាក់ចេញនូវផែនការស្តារកំណើនសេដ្ឋកិច្ចឡើងវិញពីវិបត្តិនៃជំងឺកូវីដ ១៩ ឆ្នាំ ២០២១-២០២៣ ដើម្បី «អូសទាញកំណើនសេដ្ឋកិច្ចឱ្យត្រឡប់ទៅខិតជិតកំណើនសក្តានុពលប្រកបដោយចីរភាព និងបរិយាប័ន្ន តាមរយៈការលើកកម្ពស់ភាពប្រកួតប្រជែង និងជំរុញការធ្វើពិពិធកម្មសេដ្ឋកិច្ច ជាពិសេសឈរនៅលើមូលដ្ឋានឧស្សាហកម្មរឹងមាំដែលមានសមត្ថភាពនាំចេញខ្ពស់ និងការផ្សារភ្ជាប់កាន់តែខ្លាំងជាមួយខ្សែចង្វាក់ផ្គត់ផ្គង់តំបន់ និងពិភពលោក»។ នេះបើយោងតាមលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
ថ្លែងក្នុងសិក្ខាសាលាស្តីពីការឈ្វេងយល់អំពីការកសាងក្របខ័ណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈ សម្រាប់ការរៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២២ ដែលរៀបចំដោយរដ្ឋសភាជាតិ តាមប្រព័ន្ធអនឡាញកាលពីថ្ងៃទី ១៧ ខែសីហា លោក អូន ព័ន្ធមុនីរ័ត្ន បានឱ្យដឹងថា ចាប់តាំងពីការផ្ទុះជំងឺកូវីដ ១៩ ក្នុងឆ្នាំ ២០២០ មកសេដ្ឋកិច្ចបណ្តាប្រទេសនានាលើសកលលោក ក៏ដូចជាប្រទេសកម្ពុជាបានទទួលរងផលប៉ះពាល់យ៉ាងខ្លាំងមកដល់ពេលនេះ។
លោកបន្តថា ទោះយ៉ាងណានៅពេលនេះ កម្ពុជាក៏បាននិងកំពុងរៀបចំនឹងគ្រោងដាក់ចេញនូវយុទ្ធសាស្ត្រអាទិភាពចំនួន ៣ ដើម្បីអូសកំណើនសេដ្ឋកិច្ចរបស់ខ្លួនឱ្យត្រឡប់ទៅរកកំណើនខ្ពស់ឡើងវិញ។
លោកថ្លែងថា៖ «ស្របពេលសង្គមសេដ្ឋកិច្ចសកល បន្តស្ថិតក្នុងភាពមិនប្រាកដប្រជាខ្ពស់ ដោយសារការអូសបន្លាយនៃជំងឺកូវីដ ១៩ កម្ពុជាក៏អាចនឹងទទួលបាននូវកាលានុវត្តភាពមួយចំនួនដែរ។ ការណ៍នេះអាស្រ័យលើសមត្ថភាព និងលទ្ធភាពរបស់កម្ពុជាក្នុងការចេះបត់បែន និងតាមទាន់សភាពការណ៍ប្រែប្រួលក្នុងតំបន់ និងពិភពលោក ក៏ដូចជាការចេះប្រើប្រាស់លក្ខខណ្ឌអំណោយផលទាំងឡាយសម្រាប់លើកកម្ពស់ភាពប្រកួតប្រជែងសេដ្ឋកិច្ច និងកែលម្អបរិស្ថានវិនិយោគ ដើម្បីទាក់ទាញបន្ថែមនូវការវិនិយោគ និងធុរកិច្ច ដែលអាចនឹងហូរចេញពីតំបន់មានជម្លោះពាណិជ្ជកម្ម និងមានអស្ថិរភាពនយោបាយ ព្រមទាំងការផ្លាស់ប្ដូរខ្សែចង្វាក់ផ្គត់ផ្គង់ក្នុងតំបន់ចូលមកកាន់កម្ពុជា»។
បើតាមលោក ព័ន្ធមុនីរ័ត្ន យុទ្ធសាស្ត្រអាទិភាពចំនួន ៣ ដែលរាជរដ្ឋាភិបាលកំពុងរៀបចំមានដូចជា ការស្តារសេដ្ឋកិច្ចឡើងវិញ (ការកសាងមូលដ្ឋានរឹងមាំសម្រាប់ស្តារសេដ្ឋកិច្ចវិលទៅលើមាគ៌ានៃកំណើន ដោយផ្តោតលើការធានាសុវត្ថិភាព ការគ្រប់គ្រងផលប៉ះពាល់ ការរក្សាលំនឹង និងការរស់ឡើងវិញនៃធុរកិច្ចដែលមានសក្តានុពល ជាពិសេសក្នុងវិស័យដែលទទួលរងផលប៉ះពាល់ខ្លាំង និងការបង្កើតការងារបន្ថែមឱ្យបានច្រើន និងឆាប់រហ័ស), ការកែទម្រង់ (បន្តដាក់ចេញវិធានការកែទម្រង់សំខាន់ៗជារចនាសម្ព័ន្ធ រួមមានការធ្វើឱ្យប្រសើរឡើងបរិយាកាស និងកិច្ចសម្រួលពាណិជ្ជកម្ម ការវិនិយោគ និងធុរកិច្ច ការជំរុញ និងការអភិវឌ្ឍឌីជីថលូបនីយកម្មក្នុងប្រព័ន្ធសេដ្ឋកិច្ច) និងការកសាងភាពធន់ (ការពង្រឹង ការត្រៀមខ្លួន និងការឆ្លើយតបនឹងជំងឺ ឬស្ថានភាពស្រដៀងគ្នាដែលអាចផ្ទុះឡើងនាពេលអនាគត ដោយផ្តោតលើការអភិវឌ្ឍប្រព័ន្ធសុខាភិបាល និងប្រព័ន្ធគាំពារសង្គម)។
លោកលើកឡើងថា៖ «ដើម្បីទទួលបានជោគជ័យលើយុទ្ធសាស្ត្រទាំងអស់នេះ កម្ពុជាត្រូវបង្កើនការប្តេជ្ញាចិត្ត និងតម្រង់កិច្ចខិតខំប្រឹងប្រែងប្រកបដោយភាពម៉ឺងម៉ាត់ និងឆន្ទៈនយោបាយខ្ពស់ ដោយតម្កល់ផលប្រយោជន៍ជាតិជាធំក្នុងការប្រយុទ្ធជំងឺកូវីដ ១៩ និងពន្លឿនកិច្ចការកែទម្រង់គ្រប់ការដ្ឋាន ពិសេសការកែទម្រង់ និងការពង្រឹងសមត្ថភាពស្ថាប័នសាធារណៈ ដើម្បីធានាឱ្យកម្ពុជាអាចឈានទៅសម្រេចបានចក្ខុវិស័យនៃការអភិវឌ្ឍវែងឆ្ងាយរបស់ខ្លួន»។
វិបត្តិជំងឺកូវីដ ១៩ បានធ្វើឱ្យកំណើនសេដ្ឋកិច្ចកម្ពុជាឆ្នាំ ២០២០ ធ្លាក់ចុះក្នុងអត្រា -៣,១ ភាគរយ។ បន្ថែមពីលើនេះឥទ្ធិពលនៃព្រឹត្តិការណ៍សហគមន៍ ២០ កុម្ភៈ ដែលបន្តអូសបន្លាយដល់ពេលនេះ គួបផ្សំនឹងការកើនឡើងចំនួនករណីនាំចូល ពិសេសប្រភេទមេរោគបំប្លែងថ្មីដែលតាបានធ្វើឱ្យកម្ពុជាកែសម្រួលការព្យាករកំណើនសេដ្ឋកិច្ចសម្រាប់ឆ្នាំ ២០២១ មកនៅ ២,៤ ភាគរយវិញដោយធ្លាក់ពី ៤,០ ភាគរយកាលពីដើមឆ្នាំ។ នេះបើតាមក្រសួងសេដ្ឋកិច្ច និងហិរញ្ញវត្ថុ។
លោក លឹម ហេង អនុប្រធានសភាពាណិជ្ជកម្មបានប្រាប់ភ្នំពេញប៉ុស្តិ៍ថា ទោះបីការឆ្លងរាលដាលកូវីដ ១៩ ក្នុងព្រឹត្តិការណ៍សហគមន៍ និងការនាំចូលពីប្រទេសជិតខាងនៅតែបន្តមានច្រើន ប៉ុន្តែលោកមានជំនឿថា សេដ្ឋកិច្ចកម្ពុជាចាប់ពីឆមាសទី ២ ឆ្នាំនេះនឹងមានដំណើរការកាន់តែល្អ ព្រោះយុទ្ធនាការនៃការចាក់វ៉ាក់សាំងប្រឆាំងជំងឺកូវីដ ១៩ នៅកម្ពុជាកំពុងមានដំណើរទៅមុខយ៉ាងលឿន។ លោកបន្តថា ក្រៅពីនេះ រាជរដ្ឋាភិបាលក៏បានដាក់ចេញនូវយុទ្ធសាស្ត្រថ្មីៗជាបន្តបន្ទាប់ ដើម្បីជំរុញកំណើនសេដ្ឋកិច្ច និងការស្វែងរកទីផ្សារថ្មីៗសម្រាប់ផលិតផលនាំចេញរបស់កម្ពុជាផងដែរ៕ LA