ភ្នំពេញៈ Telcotech ដែលជាក្រុមហ៊ុនបណ្តាញខ្សែកាប្លិ៍អុបទិកក្រោមបាតសមុទ្រ បានក្លាយជាក្រុមហ៊ុនទី ៣ ទទួលបានការឯកភាពជាគោលការណ៍លើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្រនៅផ្សារមូលបត្រកម្ពុជា (ផ.ម.ក.) ក្នុងឆ្នាំ ២០២១ នេះ។
សេចក្តីប្រកាសព័ត៌មានរបស់ផ្សារមូលបត្រកម្ពុជា សរសេរថា ផ.ម.ក. បានសម្រេចឯកភាពជាគោលការណ៍លើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្របំណុលរបស់ក្រុមហ៊ុន តែលកូថេក (Telcotech) នៅថ្ងៃទី ១៩ ខែសីហា ឆ្នាំ ២០២១។
សេចក្តីជូនដំណឹងបន្តថា៖ «ដើម្បីអាចចុះបញ្ជី និងជួញដូរជាផ្លូវការនៅ ផ.ម.ក. ក្រុមហ៊ុន តែលកូថេក ត្រូវតែទទួលបានការអនុញ្ញាតឱ្យបោះផ្សាយលក់មូលបត្របំណុលពីនិយ័តករមូលបត្រកម្ពុជា (ន.ម.ក) និងត្រូវបំពេញនូវលក្ខខណ្ឌផ្សេងៗមួយចំនួនទៀតពាក់ព័ន្ធនឹងការចុះបញ្ជីនៅ ផ.ម.ក.»។
ឌី ប៊ី ឌី អ៊ិនជីនារីង (DBD Engineering Plc.) គឺជាក្រុមហ៊ុនទី ១ ដែលត្រូវបានផ្សារមូលបត្រកម្ពុជា (ផ.ម.ក.) ឯកភាពជាគោលការណ៍លើពាក្យស្នើសុំពិនិត្យលទ្ធភាពអាចចុះបញ្ជី ក្នុងឆ្នាំ ២០២១ នេះ ខណៈក្រុមហ៊ុន ជេអេស លែន ភីអិលស៊ី នៅលេខរៀងទី ២។
លោកស្រី គីម សុផានីតា ប្រធាននាយកដ្ឋានប្រតិបត្តិការទីផ្សារនៃផ្សារមូលបត្រកម្ពុជា (CSX) បានប្រាប់ភ្នំពេញប៉ុស្ដិ៍កាលពីថ្ងៃទី ២២ ខែសីហា ថា ការចេញបណ្ណបំណុលប្រភេទពិសេសនេះនឹងមានលក្ខណៈអំណោយផលចំពោះក្រុមហ៊ុននានាដែលមានបំណងចង់បង្កើនដើមទុនបំណុលពីទីផ្សារឯកជន និងត្រូវចុះបញ្ជី ព្រោះវាមានតម្រូវការកាន់តែទាបជាពិសេសលើកាតព្វកិច្ចក្នុងការបង្ហាញ និងអភិបាលកិច្ចរួមគ្នា។
លោកស្រី សុផានីតា បានអះអាងថា៖ «នៅពេលនេះទីផ្សាររបស់យើងមានផលិតផលចម្រុះកាន់តែច្រើនសម្រាប់វិនិយោគិនទាក់ទងនឹងប្រភេទផលិតផល ទំហំក្រុមហ៊ុន និងឧស្សាហកម្ម»។
ទោះយ៉ាងណាលោកស្រីបដិសេធបង្ហាញចំនួននៃការចេញលក់ និងការផ្តល់តម្លៃនៅឡើយទេ។
លោកស្រីបានបន្ថែម៖ «យើងអាចប្រាប់បានថា បណ្ណបំណុលនេះនឹងត្រូវធានាដោយ CGIF ជាក្រុមហ៊ុនធានាឥណទានរបស់ ADB»។
Telcotech ជាក្រុមហ៊ុនបណ្តាញខ្សែកាប្លិ៍អុបទិកក្រោមបាតសមុទ្របង្កើតឡើងក្នុងឆ្នាំ ២០០៧ និងជាក្រុមហ៊ុនឈានមុខគេមួយក្នុងវិស័យសេវាទូរគមនាគមន៍សាធារណៈនៅកម្ពុជា ដែលរួមមាន សេវាអ៊ីនធឺណិត មជ្ឈមណ្ឌលទិន្នន័យ និងដំណោះស្រាយតាម Cloud ជាដើម។
ក្រុមហ៊ុន Telcotech ត្រូវបានក្រុមហ៊ុន EZECOM របស់លោក គិត ម៉េង អគ្គនាយកក្រុមហ៊ុន Royal Group ទិញភាគហ៊ុនទាំងស្រុងកាលពីឆ្នាំ ២០១១៕