ភ្នំពេញៈ កម្ពុជារំពឹងថា ថៃនឹងអនុញ្ញាតឱ្យនាំមៀនប៉ៃលិនទៅប្រទេសខ្លួនជាធម្មតាឡើងវិញ ខណៈប្រទេសចិន បានអនុញ្ញាតឱ្យថៃបន្តនាំចេញផ្លែមៀនទៅកាន់ទីផ្សាររបស់ខ្លួនវិញ បន្ទាប់ពីបានហាមឃាត់កាលពីថ្ងៃទី ១៣ ខែសីហា កន្លងមក។
ប្រទេសចិន បានអនុញ្ញាតឱ្យក្រុមហ៊ុនវេចខ្ចប់មៀន នៅប្រទេសថៃចំនួន ៥៦ ធ្វើការនាំចេញផ្លែមៀន ទៅទីផ្សាររបស់ខ្លួនឡើងវិញ កាលពីថ្ងៃទី ១៧ ខែសីហា។ នេះបើតាមការចុះផ្សាយរបស់ Bangkok Post។
លោកស្រី Mallika Boonmeetrakook ទីប្រឹក្សារដ្ឋមន្ត្រីក្រសួងពាណិជ្ជកម្មថៃ បានឱ្យដឹងកាលពីថ្ងៃពុធថា រដ្ឋាភិបាលចិនបានផ្តល់ភ្លើងបៃតងដល់ក្រុមហ៊ុនវេចខ្ចប់មៀនថៃ ចំនួន ៥៦ ដែលមានកត់ត្រានៃការឆ្លងសត្វល្អិតកម្រិតទាប។
ក្រុមហ៊ុនទាំងនោះស្ថិតក្នុងចំណោមក្រុមហ៊ុនវេចខ្ចប់ចំនួន ៧៥ ដែលត្រូវបានហាមឃាត់កាលពីពេលមុន។ ក្រុមហ៊ុនចំនួន ៩ ត្រូវបានហាមឃាត់ចាប់តាំងពីខែមីនាមក។
ការហាមឃាត់ចុងក្រោយនេះត្រូវបានដាក់ចេញបន្ទាប់ពីមៀនថៃត្រូវបានគេរកឃើញថាមានចៃម្សៅ (ក្រាម្សៅ)។
បើតាម Bangkok Post ក្រុមហ៊ុនដែលនៅសេសសល់នឹងអាចបន្តការនាំចេញមៀនទៅប្រទេសចិននាពេលអនាគត បើពួកគេបង្ហាញថា បានអនុវត្តវិធានការប្រកបដោយប្រសិទ្ធភាពក្នុងការកម្ចាត់សត្វល្អិត។
លោក សួន ជុំ អនុប្រធានក្រុមប្រឹក្សាភិបាលសមាគមមៀនប៉ៃលិន ប្រាប់ ភ្នំពេញ ប៉ុស្តិ៍ កាលពីថ្ងៃព្រហស្បតិ៍ថា លោកបានទទួលបានព័ត៌មានថា ចិនបានអនុញ្ញាតឱ្យក្រុមហ៊ុនថៃមួយចំនួនអាចនាំចេញទៅចិនបានជាធម្មតាវិញហើយ ប៉ុន្តែលោកនៅមិនទាន់ទទួលបានការបញ្ជាទិញពីក្រុមហ៊ុនចិននៅក្នុងប្រទេសថៃ ដែលជាដៃគូសហការនៅឡើយទេ។
លោកប្រាប់ថា៖ «ខ្ញុំមានអារម្មណ៍រីករាយនៅពេលចិនបើកឱ្យថៃអាចនាំចេញមៀនឡើងវិញ។ បើភាគីថៃមានការយោគយល់ជាមួយកម្ពុជា យើងនឹងមានដង្ហើមដកខ្លះ ស្របពេលចលនាជួយទិញមៀនពីអ្នកក្នុងស្រុកអាចជួយសម្រាលបន្ទុកបាន ១ ផ្នែក»។
លោកសង្ឃឹមថា ថៃក៏នឹងអនុញ្ញាតឱ្យកម្ពុជាអាចនាំចូលទៅថៃឡើងវិញ ព្រោះទីផ្សារក្នុងស្រុកនឹងចាល់នៅពេលមៀនផ្តល់ផលព្រមគ្នានៅខែវិច្ឆិកា ខាងមុខ ដែលប្រមូលផលម្តងមានរាប់រយតោន។
លោកបន្តថា៖ «ខ្ញុំមានការព្រួយបារម្ភថា ប្រសិនបើថៃនៅតែបន្តហាមឃាត់រហូតដល់ខែវិច្ឆិកា ដែលជារដូវប្រមូលផលពេញនោះ វានឹងប្រឈមទីផ្សារម្តងទៀត។ ដល់ពេលនោះរដ្ឋាភិបាលជួយទិញយកទៅញ៉ាំក៏អត់អស់ដែរ ព្រោះបេះ ១ ថ្ងៃរាប់រយតោន។ ដូចនេះបើថៃបើកឱ្យនាំចេញខ្លះ យើងក៏ធូរស្រាលបន្ទុកខ្លះដែរ»។
សមាជិកសមាគមនេះមានដីដាំដុះមៀនប៉ៃលិន ២ ៩០០ ហិកតា ដែលបានដាំនៅខេត្តប៉ៃលិន បាត់ដំបង និងបន្ទាយមានជ័យ ហើយប្រមូលផលចាប់ពីខែសីហា ដល់ចុងខែធ្នូ ដោយរំពឹងថា ប្រមូលបាន ៥ ម៉ឺនតោនឆ្នាំនេះ៕ LA