.jpg)
ភ្នំពេញ៖ Smile Shop ដែលជាផ្សារអនឡាញឈានមុខគេនៅក្នុងព្រះរាជាណាចក្រកម្ពុជា និង ក្រុមហ៊ុន ជីន សា គ្រុប ដែលជាក្រុមហ៊ុនបណ្តាក់ទុនរួមបានចុះកិច្ចព្រមព្រៀងភាពជាដៃគូយុទ្ធសាស្ត្រសម្រាប់ការពង្រីកអាជីវកម្មក្នុងការជំរុញការធ្វើពាណិជ្ជកម្មតាមអនឡាញ; និង លើកស្ទួយការលក់ផលិតផលកម្ពុជានៅលើទីផ្សារអន្តរជាតិ។
បើយោងតាមសេចក្តីប្រកាសព័ត៌មានរបស់ក្រុមហ៊ុន កិច្ចព្រមព្រៀងភាពជាដៃគូយុទ្ធសាស្ត្រដែលត្រូវបានប្រកាសជាផ្លូវការនៅថ្ងៃទី ២០ ខែសីហានេះ ត្រូវបានចុះហត្ថលេខាតាមប្រព័ន្ធអនឡាញរវាងលោក Jack Lee អគ្គនាយកក្រុមហ៊ុន Smile Shop App និងលោក Liu Yang ប្រធានក្រុមហ៊ុន Jin Sha Group។
លោក Jack Lee អគ្គនាយកក្រុមហ៊ុន Smile Shop App បានថ្លែងថា ដើមទុននេះនឹងជួយជំរុញការពង្រីកក្រុមហ៊ុនឱ្យក្លាយជា Platform ពាណិជ្ជកម្មអេឡិចត្រូនិកដ៏ទំនើបមួយ។
លោកបានថ្លែងថា៖ «យើងនឹងវិនិយោគបន្ថែមទៅលើវិស័យ បច្ចេកវិទ្យាហិរញ្ញវត្ថុ ខ្សែសង្វាក់ផ្គត់ផ្គង់ទំនិញ ការដឹកជញ្ជូន និងការគាំទ្រផលិតផលក្នុងស្រុករបស់ខ្មែរ ដើម្បីលក់ទៅកាន់ទីផ្សារក្រៅប្រទេស និងសេវាកម្មបម្រើអតិថិជន ដើម្បីប្រែក្លាយ Smile Shop ទៅជា Platform មួយដែលផ្តោតសំខាន់លើតម្រូវការរបស់អតិថិជន។
លោកបានមានប្រសាសន៍បន្ថែមទៀតថា៖ « យើងមានសេចក្តីសោមនស្សរីករាយដែលបានទទួលសា្វគមន៍ ក្រុមហ៊ុន ជីន សា គ្រុប ដែលជឿជាក់លើចក្ខុវិស័យរបស់យើង ហើយចង់ក្លាយជាផ្នែកមួយនៃការវិវត្តមួយនេះ»។
លោក Liu Yang ប្រធានក្រុមហ៊ុន ជិន សា គ្រុប បានមានប្រសាសន៍ថា “Smile Shop បានធ្វើឱ្យមានការចាប់អារម្មណ៍យ៉ាងខ្លាំង នៅក្នុងអំឡុងពេលដែលមានជំងឺរាតត្បាត ហើយក្រុមហ៊ុនមើលឃើញនូវសក្តានុពលដ៏អស្ចារ្យនៅក្នុងវិស័យអាជីវកម្មអនឡាញមួយនេះ។
លោក Liu Yang បានថ្លែងថា៖ «ការចែករំលែកបន្ទុកជាមួយប្រទេសជាតិ និងការខិតខំដើម្បីបំពេញតម្រូវការរបស់ប្រជាជន ”គឺជាបេសកកម្មរបស់ក្រុមហ៊ុន ជិន សា គ្រុប។ យើងមានគោលដៅវិនិយោគជាចម្បងលើហេដ្ឋារចនាសម្ព័ន្ធថ្មី ការអប់រំវិជ្ជាជីវៈ ការថែទាំសុខភាព ប្រព័ន្ធផ្សព្វផ្សាយថ្មី បច្ចេកវិទ្យាកសិកម្ម។ ល។»
យោងតាមរបាយការណ៍ Google-Temasek ឆ្នាំ ២០២០ បានបង្ហាញថា ពាណិជ្ជកម្មតាមប្រព័ន្ធអេឡិចត្រូនិកនៅអាស៊ីអាគ្នេយ៍បានកើនឡើងដល់ ៦២ ពាន់លាន កំណើន ៦៣% ប្រៀបធៀបទៅនឹងឆ្នាំ ២០១៩ ហើយមានការប៉ាន់ស្មានថាពាណិជ្ជកម្មអេឡិចត្រូនិកនៅអាស៊ីអាគ្នេយ៍នឹងកើនឡើងដល់ ១៧២ ពាន់លាន នៅឆ្នាំ ២០២៥ ខាងមុខនេះ។
ទំហំនៃការដោះដូរក្នុងវិស័យពាណិជ្ជកម្មតាមអនឡាញរបស់ប្រទេសកម្ពុជា ត្រូវបានគេគិតថានឹងឈានដល់ ២៥១ លានដុល្លារ ក្នុងឆ្នាំ ២០២១ ហើយគេរំពឹងថានឹងមានកំណើន ៨.៩៤% ទៀតចន្លោះឆ្នាំ ២០២១ - ២០២៥ ដែលនឹងមានន័យថាទំហំនៃការដោះដូរនេះនឹងកើនឡើងរហូតដល់ទឹកប្រាក់ ៣៥៤ លានដុល្លារ នៅឆ្នាំ ២០២៥ ខាងមុខ៕
