.jpg)
អតិថិជនកំពុងធ្វើប្រតិបត្តិការហិរញ្ញវត្ថុ នៅទីស្នាក់ការកណ្តាលរបស់ធនាគារ ABA។ ហេង ជីវ័ន
ភ្នំពេញៈ ABA Bank ដែលជាធនាគារចុះបញ្ជីនៅលើផ្សារមូលបត្រកម្ពុជា (CSX) បានរាយការណ៍ពីកំណើនប្រតិបត្តិការរឹងមាំរបស់ខ្លួនក្នុងត្រីមាសទី ២ ឆ្នាំនេះ ទោះបីការរីករាលដាលជំងឺកូវីដ ១៩ នៃព្រឹត្តិការណ៍សហគមន៍ ២០ កុម្ភៈ កំពុងបន្តការរំខានដល់សកម្មភាពសេដ្ឋកិច្ចក៏ដោយ។
បើយោងតាមរបាយការណ៍របស់ធនាគារ ABA ដែលផ្ញើឱ្យ CSX កាលពីថ្ងៃទី ១៨ ខែសីហា សម្រាប់ត្រីមាសទី ២ ឆ្នាំ ២០២១ នេះ ធនាគារវឌ្ឍនៈអាស៊ី ចំកាត់ (ABA) ទទួលបានចំណូលពីការប្រាក់សរុប ៤៤៣ ៩៣៨ លានរៀល កើនឡើង ២៩ ភាគរយ និងប្រាក់ចំណេញចំនួន ១៩៥ ២៤៨ លានរៀល កើនឡើង ៤២ ភាគរយបើធៀបនឹងត្រីមាសទី ២ ឆ្នាំ ២០២០។
ប្រាក់ចំណេញសុទ្ធរបស់ធនាគារនេះបន្តកើនឡើងជាប្រចាំ ដែលកត់ត្រាប្រាក់ចំណូលសរុបចំនួន ៩៣ លានដុល្លារចាប់តាំងពីដើមឆ្នាំនេះ។
លោក Yves Jacquot ប្រធានធនាគារ ABA បានឱ្យដឹងក្នុងរបាយការណ៍ថា នៅត្រីមាសទី ២ ឆ្នាំ ២០២១ ស្ថានការណ៍រីករាលដាលជំងឺកូវីដ ១៩ នៅកម្ពុជាកាន់តែធ្ងន់ធ្ងរជាងមុន ដោយសារព្រឹត្តិការណ៍ «សហគមន៍ ២០ កុម្ភៈ» បណ្ដាលឱ្យមានកំណើនយ៉ាងឆាប់រហ័សនៃករណីឆ្លងរីករាលដាល។
លោកថ្លែងថា៖ «ព្រឹត្តិការណ៍នេះបណ្ដាលឱ្យមានការបិទខ្ទប់តំបន់នានានៅរាជធានីភ្នំពេញ និងក្រុងតាខ្មៅ ក្នុងរយៈពេល ៣ សប្ដាហ៍ ដែលបានប៉ះពាល់ធ្ងន់ធ្ងរដល់បរិស្ថានអាជីវកម្ម។ កតា្តទាំងនេះបានបន្តបង្កផលប៉ះពាល់ដល់អាជីវកម្មក្នុងស្រុក ជាពិសេសវិស័យបដិសណ្ឋារកិច្ច ទេសចរណ៍ កាត់ដេរ និងសំណង់»។
យោងតាមលោក Jacquot គិតត្រឹមត្រីមាសទី ២ ឆ្នាំ ២០២១ កម្ចីដែលបានរៀបចំឡើងវិញមានចំនួន ១៣ ៨០៦ ស្មើនឹងទឹកប្រាក់ចំនួន ៧០៤ លានដុល្លារ។ ចំណែកកម្ចីដែលរៀបចំឡើងវិញក្នុងផលបត្រកម្ចីសរុបមាន ១៦ ភាគរយ។ ទន្ទឹមនឹងនេះដែរកម្ចីដែលរៀបចំឡើងវិញ គឺជាកម្ចីដែលមានគុណភាពខ្ពស់ ដោយសារ ៧៥ ភាគរយក្នុងចំណោមនោះបានស្នើសុំរយៈពេលអនុគ្រោះសម្រាប់ការបង់ប្រាក់ដើម និងបន្តបង់តែការប្រាក់។
លោកលើកឡើងថា៖ «ABA នឹងបន្តជួយដល់អតិថិជនកម្ចីរបស់ខ្លួន នៅក្នុងការជម្នះពេលវេលាដ៏លំបាកនេះតាមរយៈគោលនយោបាយរៀបចំកម្ចីឡើងវិញ។ បន្ថែមលើការរៀបចំកម្ចីឡើងវិញ ធនាគារក៏បានបន្តផ្ដល់កម្ចីថ្មីៗដល់អតិថិជនរបស់ខ្លួន ដោយសារការទទួលបានដើមទុនពិតជាមានសារៈសំខាន់សម្រាប់ប្រជាពលរដ្ឋ និងអាជីវកម្មនានា មិនត្រឹមតែនៅក្នុងពេលសេដ្ឋកិច្ចកំពុងរីកចម្រើនប៉ុណ្ណោះទេ ប៉ុន្តែថែមទាំងនៅក្នុងគ្រាមានវិបត្តិផងដែរ»។
លោកបន្ថែមថា៖ «ក្នុងត្រីមាសទី ២ ឆ្នាំ ២០២១ កម្ចីមានចំនួន ៧ ៨២៨ គិតជាទឹកប្រាក់ចំនួន ២៧១,២ លានដុល្លារ ត្រូវបានផ្តល់ជូនអតិថិជន។ កម្ចីនេះបានបង្កើនផលបត្រកម្ចីដុលរបស់ធនាគារប្រមាណ ៦ ភាគរយ គិតជាទឹកប្រាក់សរុបចំនួន ៤,៥ ពាន់លានដុល្លារ។
ធនាគារ ABA បន្តចូលរួមក្នុងគម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យមឆ្នាំ ២០២០ (SCFS) ដែលជាគំនិតផ្តួចផ្ដើមរបស់រាជរដ្ឋាភិបាលកម្ពុជានៅក្នុងគោលបំណងផ្ដល់កម្ចីដែលមានអត្រាការប្រាក់សមរម្យដល់សហគ្រាសធុនតូច និងមធ្យម។
នៅក្រោមគម្រោងនេះ ABA បានផ្ដល់កម្ចីជាទឹកប្រាក់ចំនួន ២,៣ លានដុល្លារសម្រាប់ចំណាយដើមទុន និងទុនបង្វិលដែលមានអត្រាការប្រាក់ពិសេស ៧ ភាគរយក្នុង ១ ឆ្នាំ និងមានរយៈពេលរហូតដល់ ៧ ឆ្នាំ។
ABA គឺជាធនាគារពាណិជ្ជដំបូងគេដែលចេញសញ្ញាបណ្ណសាជីវកម្មក្នុងតម្លៃ ៨៤,៨ ពាន់លានរៀល ធនាគារ ABA ក៏បានដើរតួនាទីក្នុងការអភិវឌ្ឍផ្សារមូលបត្រ និងលើកកម្ពស់ប្រាក់រៀលផងដែរ៕ LA
