.jpg)
ភ្នំពេញៈ ក្រសួងពាណិជ្ជកម្មកំពុងប្រមូលធាតុចូលសំខាន់ៗពីអន្តរក្រសួងពាក់ព័ន្ធ ដើម្បីត្រៀមរៀបចំកិច្ចប្រជុំលើកទី ៣ ស្តីពីកិច្ចសហប្រតិបត្តិការរវាងកម្ពុជា និងគណៈកម្មការសេដ្ឋកិច្ចអឺរ៉ុប-អាស៊ី (EEC: Eurasian Economic Commission) ដែលគ្រោងនឹងប្រព្រឹត្តទៅពីថ្ងៃទី ៧-៨ ខែកញ្ញា ឆ្នាំ ២០២១។
ថ្នាក់ដឹកនាំជាន់ខ្ពស់ក្រសួងពាណិជ្ជកម្មកម្ពុជាធ្លាប់លើកឡើងថា កិច្ចសហប្រតិបត្តិការរវាងកម្ពុជា និងគណៈកម្មការសេដ្ឋកិច្ចអឺរ៉ុប-អាស៊ី គឺជាការត្រួសត្រាយផ្លូវសម្រាប់ភាគីទាំង ២ ដើម្បីឈានទៅបង្កើតកិច្ចព្រមព្រៀងពាណិជ្ជកម្មសេរី (FTA) រវាងកម្ពុជា និង EAEU។
រដ្ឋលេខាធិការក្រសួងពាណិជ្ជកម្មលោកស្រី តឹករ៉េត កំរង ដែលបានដឹកនាំកិច្ចប្រជុំអន្តរក្រសួង តាមរយៈប្រព័ន្ធវីដេអូកាលពីថ្ងៃទី ១៩ ខែសីហា ដើម្បីប្រមូលធាតុចូលសម្រាប់ត្រៀមរៀបចំកិច្ចប្រជុំលើកទី ៣ រវាងកម្ពុជា និង EEC បានលើកឡើងថា កិច្ចប្រជុំនេះរៀបចំឡើងក្រោមក្របខ័ណ្ឌនៃអនុស្សរណៈយោគយល់គ្នារវាងរដ្ឋាភិបាលកម្ពុជា និងគណៈកម្មការសេដ្ឋកិច្ចអឺរ៉ុប-អាស៊ី ដែលបានចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីពេលកន្លងមក។
យោងតាមក្រសួងពាណិជ្ជកម្ម កិច្ចប្រជុំនេះមានគោលបំណងពិនិត្យ ពិភាក្សា និងប្រមូលធាតុចូលលើសេចក្តីព្រាងនៃសេចក្តីថ្លែងការណ៍រួមនៃកិច្ចប្រជុំលើកទី ៣ ស្តីពីកិច្ចសហប្រតិបត្តិការ ដោយគ្របដណ្តប់លើវិស័យសំខាន់ៗចំនួន ៧ រួមមាន កិច្ចសហប្រតិបត្តិការពាណិជ្ជកម្ម និងវិនិយោគ, កិច្ចសហប្រតិបត្តិការសេដ្ឋកិច្ចឌីជីថល និងគយ, ឧស្សាហកម្មថាមពល និងហេដ្ឋារចនាសម្ព័ន្ធ, វិទ្យាសាស្ត្រ បច្ចេកវិទ្យា នវានុវត្តន៍ និងបច្ចេកវិទ្យាទំនាក់ទំនងព័ត៌មាន, បទប្បញ្ញត្តិបច្ចេកទេស និងអនាម័យ និងភូតគាមអនាម័យ, និងកម្មសិទ្ធិបញ្ញា កិច្ចការពារអ្នកប្រើប្រាស់ និងការប្រកួតប្រជែង។
កិច្ចប្រជុំនៃក្រុមការងាររួមស្តីពីកិច្ចសហប្រតិបត្តិការកម្ពុជា -EEC បានរៀបចំចំនួន ០២ លើករួចមកហើយ ដោយលើកទី ១ ធ្វើនៅកម្ពុជាក្នុងឆ្នាំ ២០១៧ និងលើកទី ២ នៅសហព័ន្ធរុស្ស៊ី ក្នុងឆ្នាំ ២០១៨។
ទិន្នន័យក្រសួងពាណិជ្ជកម្មបង្ហាញថា ទំហំពាណិជ្ជកម្មសរុបរវាងប្រទេសកម្ពុជា និងសហភាពសេដ្ឋកិច្ចអឺរ៉ុប-អាស៊ី នៅឆ្នាំ ២០២០ សម្រេចបាន ៦៧,៣៧ លានដុល្លារកើនឡើង ១៨,២២ ភាគរយធៀបនឹងឆ្នាំ ២០១៩៕
