.jpg)
វគ្គបណ្តុះបណ្តាល និងការប្រឡងសម្រាប់បុគ្គលត្រូវទទួលស្គាល់គុណវុឌ្ឍិ និងកម្មវិធីអប់រំវិជ្ជាជីវៈបន្តលើកទី ១៩ ។
ចាប់តាំងពីការបង្កើតឱ្យមានទីផ្សារមូលបត្រនៅក្នុងព្រះរាជាណាចក្រកម្ពុជាមក យើងសង្កេតឃើញថាទីផ្សារមួយនេះបាននិងកំពុងបោះជំហានទៅមុខគួរឱ្យកត់សម្គាល់ ដែលអាចនិយាយបានថា វិនិយោគិន និងក្រុមហ៊ុនចាប់ផ្តើមមានចំណាប់អារម្មណ៍ខ្លាំងក្នុងការស្វែងរកឱកាសវិនិយោគ ក៏ដូចជាកៀរគរមូលនិធិតាមរយៈទីផ្សារមូលបត្រនេះ។ និយតករមូលបត្រកម្ពុជា (ន.ម.ក.) ដែលជាអាណាព្យាបាលនៅក្នុងវិស័យនេះតែងតែបំពេញការងារយ៉ាងសកម្ម និងយកចិត្តទុកដាក់ខ្ពស់ ដើម្បីធានាបានថា ទីផ្សារនេះដំណើរការប្រកបដោយតម្លាភាព គណនេយ្យភាព និងសណ្តាប់ធ្នាប់ល្អ។
ដើម្បីសម្រេចបាននូវចក្ខុវិស័យនេះ ន.ម.ក. តែងតែមានការយកចិត្តទុកដាក់ខ្ពស់ក្នុងការពង្រឹង និងពង្រីកបន្ថែមនូវវិជ្ជាជីវៈជំនាញរបស់អ្នកចូលរួមក្នុងទីផ្សារ ជាពិសេសថ្នាក់ដឹកនាំ និងបុគ្គលិកជាន់ខ្ពស់របស់ក្រុមហ៊ុនដែលទទួលបានអាជ្ញាប័ណ្ណ ការអនុញ្ញាត និង/ឬ ការទទួលស្គាល់ ពី ន.ម.ក. ដើម្បីធ្វើអាជីវកម្មមូលបត្រ អាជីវកម្មគម្រោងវិនិយោគរួម អាជីវកម្មឧបករណ៍និស្សន្ទ និងអាជីវកម្មទាំងឡាយណាដែលផ្តល់សេវាក្នុងវិស័យមូលបត្រផ្សេងៗទៀត តាមរយៈការតម្រូវឱ្យចូលរួមវគ្គបណ្តុះបណ្តាល និងការប្រឡងសម្រាប់បុគ្គលត្រូវទទួលស្គាល់គុណវុឌ្ឍិ និងកម្មវិធីអប់រំវិជ្ជាជីវៈបន្ត។
តើអ្វីទៅជាវគ្គបណ្តុះបណ្តាល និងការប្រឡងសម្រាប់បុគ្គលត្រូវទទួលស្គាល់គុណវុឌ្ឍិ? កម្មវិធីអប់រំវិជ្ជាជីវៈបន្ត? នរណាខ្លះដែលអាចចូលរៀនវគ្គទាំងនេះបាន?
ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយតករមូលបត្រកម្ពុជា។
វគ្គបណ្តុះបណ្តាល និងការប្រឡងសម្រាប់បុគ្គលត្រូវទទួលស្គាល់គុណវុឌ្ឍិ សំដៅដល់វគ្គបណ្តុះបណ្តាល និងការប្រឡងដែលរៀបចំឡើងដោយ ន.ម.ក. សម្រាប់រាល់រូបវន្តបុគ្គលទាំងឡាយណាដែលបម្រើការងារនៅក្នុងក្រុមហ៊ុនដែលធ្វើអាជីវកម្ម និងផ្តល់សេវាកម្មនៅក្នុងវិស័យមូលបត្រ ដូចជាបុគ្គលិកជាន់ខ្ពស់ បុគ្គលិកផ្នែកបច្ចេកទេស និងបុគ្គលិកសំខាន់ៗដទៃទៀតរបស់ក្រុមហ៊ុនទាំងនោះដែលវគ្គបណ្តុះបណ្តាលនេះ ផ្តោតជាសំខាន់ទៅលើក្របខ័ណ្ឌបទប្បញ្ញត្តិ និងផ្នែកបច្ចេកទេសក្នុងវិស័យមូលបត្រ។
បន្ទាប់ពីការចូលរួមវគ្គបណ្តុះបណា្តលនេះហើយ រូបវន្តបុគ្គលទាំងនោះត្រូវចូលរួមការប្រឡងដែលរៀបចំឡើងដោយ ន.ម.ក.។ ហេតុអ្វីបានជាចាំបាច់ត្រូវចូលរួមវគ្គបណ្តុះបណ្តាលនេះ និងត្រូវប្រឡងឱ្យជាប់? ដើម្បីទទួលបានអាជ្ញាប័ណ្ណ ការអនុញ្ញាត និង/ឬ ការទទួលស្គាល់ជាក្រុមហ៊ុនផ្តល់សេវានៅក្នុង វិស័យមូលបត្រ ក្រុមហ៊ុនចាំបាច់ត្រូវបំពេញនូវលក្ខខណ្ឌធនធានមនុស្សដែលជាលក្ខខណ្ឌមួយក្នុងចំណោមលក្ខខណ្ឌផ្សេងៗទៀត ហើយមានតែការចូលរួមវគ្គបណ្តុះបណ្តាលនេះ និងប្រឡងជាប់ក្នុងវគ្គបណ្តុះបណ្តាលនេះតែប៉ុណ្ណោះ ទើបអាចទទួលបាននូវការទទួលស្គាល់ និងបំពេញលក្ខខណ្ឌនេះបាន។
កម្មវិធីអប់រំវិជ្ជាជីវៈបន្ត (Continuing Professional Education) គឺជាកម្មវិធីបំពេញបន្ថែមនូវវិជ្ជាជីវៈជំនាញក៏ដូចជាចំណេះដឹងថ្មីៗរួមមាន៖ បទប្បញ្ញត្តិថ្មីៗផ្នែកបច្ចេកទេស និងករណីសិក្សាជាដើម បន្ទាប់ពីបានការទទួលស្គាល់គុណវុឌ្ឍិរបស់ខ្លួនលើកដំបូង តាមរយៈការចូលរួមវគ្គបណ្តុះបណ្តាល និងបានប្រឡងជាប់ជាស្ថាពរ។ ដើម្បីបន្តសុពលភាពគុណវុឌ្ឍិរបស់ខ្លួន និងអាចបន្តធ្វើអាជីវកម្ម និងផ្តល់សេវាកម្មក្នុងវិស័យមូលបត្រ បុគ្គលទទួលបានគុណវុឌ្ឍិត្រូវតែចូលរួមកម្មវិធីអប់រំវិជ្ជាជីវៈបន្តរៀងរាល់ ២ ឆ្នាំម្តង ឬតាមការកំណត់របស់ ន.ម.ក.។ ចំពោះបុគ្គលដែលតម្រូវឱ្យចូលរួមកម្មវិធីអប់រំវិជ្ជាជីវៈបន្ត គឺត្រូវបំពេញតាមលក្ខខណ្ឌវត្តមាន និងមិនតម្រូវឱ្យមានការប្រឡងម្តងទៀតឡើយ។
វគ្គបណ្តុះបណ្តាល និងការប្រឡងនេះត្រូវបានរៀបចំឡើងចាប់តាំងពីឆ្នាំ ២០១០ ដែលរហូតមកដល់ឆ្នាំ ២០២១ នេះ ន.ម.ក. បានរៀបចំច្រើនជាង ២០ លើករួចមកហើយ ដែលរាប់បញ្ចូលទាំងការរៀបចំតាមអនឡាញផងដែរ និងមានអ្នកចូលរួមសរុប ១៦៣៥ នាក់។ ន.ម.ក. បានរៀបចំវគ្គបណ្តុះបណ្តាល និងការប្រឡងសម្រាប់បុគ្គលត្រូវទទួលស្គាល់គុណវុឌ្ឍិជារៀងរាល់ឆ្នាំ យ៉ាងហោចណាស់ ២ ដងក្នុង ១ ឆ្នាំ។ សម្រាប់សាធារណជនទូទៅដែលមានបំណងស្វែងយល់ពីវិស័យមូលបត្រក៏អាចចូលរួមក្នុងវគ្គបណ្តុះបណ្តាល និងការប្រឡងនេះបានផងដែរ ព្រោះថាវគ្គបណ្តុះបណ្តាលនេះ គឺគ្របដណ្តប់នូវប្រព័ន្ធទីផ្សារមូលបត្រកម្ពុជាទាំងមូល។
កម្មវិធីប្រឡងទទួលស្គាល់គុណវុឌ្ឍិលើកទី ២០ តាមប្រព័ន្ធអនឡាញ។ រូបថត supplied
វគ្គបណ្តុះបណ្តាលនេះត្រូវបានរៀបចំឡើងជាភាសាខ្មែរ ដោយមានការបកប្រែជាភាសាអង់គ្លេស និងអាចមានការបកប្រែជាភាសាចិនផងដែរ។
ចំពោះការដាក់ពាក្យចូលរួមវគ្គបណ្តុះបណ្តាល និងការប្រឡងសម្រាប់បុគ្គលត្រូវទទួលស្គាល់គុណវុឌ្ឍិ និងកម្មវិធីអប់រំវិជ្ជាជីវៈបន្ត សាធារណជន អាចស្វែងរកបាននៅក្នុងគេហទំព័ររបស់ ន.ម.ក. (www.secc.gov.kh) និងទំព័រហ្វេកប៊ុកផ្លូវការ ន.ម.ក. (Facebook: និយតករមូលបត្រកម្ពុជា Securities and Exchange Regulator of Cambodia)៕
រៀបចំដោយ៖ និយតករមូលបត្រកម្ពុជានាយកដ្ឋានស្រាវជ្រាវ បណ្តុះបណ្តាល អភិវឌ្ឍន៍ទីផ្សារមូលបត្រ និងទំនាក់ទំនងអន្តរជាតិ
អ៊ីមែល៖ edu@.secc.gov.kh
ទូរស័ព្ទ៖ ០២៣ ៨៨៥ ៦១១
