ភ្នំពេញៈ ការរីករាលដាលជំងឺកូវីដ ១៩ កំពុងបង្កផលប៉ះពាល់ធ្ងន់ធ្ងរដល់សកម្មភាពអាជីវកម្មនៅក្នុងឧស្សាហកម្មភោជនីយដ្ឋានកម្ពុជា។ តួលេខចុងក្រោយពីសមាគមភោជនីយដ្ឋានកម្ពុជា (CRA) ឱ្យដឹងថា ការលក់នៅក្នុងឧស្សាហកម្មនេះបានធ្លាក់ចុះ ៥០ ភាគរយ កាលពីឆ្នាំ ២០២០ ធៀបឆ្នាំ ២០១៩ ខណៈឆ្នាំ ២០២១ កំពុងបន្តធ្លាក់ចុះប្រហែល ៦០ ភាគរយទៀតធៀបនឹងឆ្នាំ ២០២០។
លោក Arnaud Darc ប្រធាន CRA បានឱ្យដឹងក្នុងសិក្ខាសាលាអនឡាញលើកដំបូងស្ដីពីពន្ធសម្រាប់ភោជនីយដ្ឋានកាលពីថ្ងៃទី ២៣ ខែសីហាថា ក្នុងរយៈពេល ១៦ ខែចុងក្រោយនេះម្ចាស់ភោជនីយដ្ឋានជាច្រើននិយាយថា កង្វះតម្រូវការដែលបណ្ដាលមកពីជំងឺកូវីដ ១៩ បានបង្ខំ ឬជំរុញឱ្យបិទទីតាំងបរិភោគអាហារនៅតាមភោជនីយដ្ឋានក្នុងឧស្សាហកម្មនេះ ហើយបុគ្គលដែលធ្វើការងារពីផ្ទះបានលុបចោលការញ៉ាំអាហារថ្ងៃត្រង់នៅតាមភោជនីយដ្ឋាន។
លោកបន្តថា CRA ប៉ាន់ប្រមាណថា ចំណែកអតិថិជនដែលចូលអង្គុយញ៉ាំអាហារនៅតាមភោជនីយដ្ឋានបានធ្លាក់ចុះ ៨៥ ភាគរយ ចាប់តាំងពីការរីករាលដាលជំងឺកូវីដ ១៩។
លោកថ្លែងថា៖ «យើងកត់សម្គាល់ថា ការចរាចរមិនគ្រាន់តែផ្លាស់ប្តូរទៅជាការវេចខ្ចប់ប៉ុណ្ណោះទេ ប៉ុន្តែយើងថែមទាំងប៉ាន់ប្រមាណថា មានការបញ្ជាទិញតែ ១៦ ភាគរយប៉ុណ្ណោះ ដើម្បីជំនួសឱ្យការចូលញ៉ាំនៅក្នុងភោជនីយដ្ឋានទូទៅ»។
លោកបន្ថែមទៀតថា ផលប៉ះពាល់នៅក្នុងឧស្សាហកម្មភោជនីយដ្ឋានកំពុងបំផ្លាញទាំងម្ចាស់ និងបុគ្គលិកភោជនីយដ្ឋាន។ សំខាន់ជាងនេះទៅទៀត ឧស្សាហកម្មនេះថមថយល្បឿនបន្តិចម្ដងៗ ហើយដំណាលគ្នានេះក៏មានការព្យាយាមផ្លាស់ប្តូរអាជីវកម្ម ដើម្បីស្វែងយល់ពីរបៀបក្នុងការបន្ថែមការដឹកជញ្ជូន និងការចែកចាយ។
លោកលើកឡើងថា៖ «យើងមិនអាចផ្លាស់ប្តូរវិបត្តិនេះបានទេ ការបិទទ្វារ ឬដំណើរការលើវិថីនេះនឹងកើតមាននៅពេលខាងមុខ ប៉ុន្តែពួកគេអាចនឹងបានផ្លាស់ប្តូរប្រតិបត្តិការរបស់ពួកគេ ហើយទំនងជានឹងធ្វើដូច្នេះរយៈពេលយូរ បន្ទាប់ពីការរីករាលដាលជំងឺនេះបានកន្លងផុតទៅ»។
លោកថ្លែងថា៖ «ខណៈឧស្សាហកម្មភោជនីយដ្ឋានបានរងផលប៉ះពាល់ដោយសារការរីករាលដាលជំងឺ យើងកត់សម្គាល់ថា ផលប៉ះពាល់ពិតអាចពិបាកក្នុងការវាស់វែង ព្រោះផលប៉ះពាល់ខ្លាំងមិនអាចវាស់វែងបានស្មើគ្នាទេ»។
លោកបានបន្ថែមថា រទេះលក់អាហារតាមផ្លូវ អាហាររហ័ស ឬសេវាកម្មម្ហូបអាហារតាមបញ្ជរ កំពុងជម្នះកាន់តែប្រសើរ ដោយសារផលិតផលរបស់ពួកគេមានតម្លៃសមរម្យ និងងាយស្រួលក្នុងការវេចខ្ចប់ ដោយកាត់បន្ថយសេវាកម្មបម្រើដោយមនុស្ស។
លោកបន្ថែមថា៖ «ចាប់តាំងពីការរីករាលដាលកូវីដ ១៩ មក សហគ្រាស ធុនតូច និងមធ្យមពាក់កណ្ដាលនៅក្នុងឧស្សាហកម្មនេះបានបាត់មុខ ហើយយើងរំពឹងថា នឹងមើលឃើញការបិទទ្វារកាន់តែច្រើនទៀតនៅក្នុងពេលដ៏ខ្លីខាងមុខ»។
លោក អេង រតនា ប្រធាននាយកដ្ឋានគ្រប់គ្រងអ្នកជាប់ពន្ធធំនៃអគ្គយកដ្ឋានពន្ធដារ ដែលចូលរួមក្នុងសិក្ខាសាលានេះបានឱ្យដឹងថា សកម្មភាពសេដ្ឋកិច្ច បានថយល្បឿន ដែលបង្កឡើងដោយជំងឺកូវីដ ១៩ ខណៈឧស្សាហកម្មភោជនីយដ្ឋាន មិនអាចគេចផុតពីផលប៉ះពាល់នេះឡើយ។
លោកបញ្ជាក់ថា រដ្ឋាភិបាលបានដាក់ចេញវិធានការអន្តរាគមន៍មួយចំនួន ដើម្បីជួយដល់ម្ចាស់អាជីវកម្ម ក្នុងអំឡុងពេលវេលាដ៏ពិបាកនេះ។ លោកបន្តថា៖ «ស្ថានការណ៍សេដ្ឋកិច្ច បានធ្លាក់ចុះយ៉ាងខ្លាំង ដែលបណ្តាលឱ្យប៉ះពាល់ធ្ងន់ធ្ងរដល់ការប្រមូលចំណូលពន្ធ ទោះបីជាយ៉ាងណាយើងកោតសរសើរវិស័យឯកជន ដែលនៅគោរពច្បាប់ក្នុងការចំណាយពេលវេលាដោយភាពទទួលខុសត្រូវ»។
លោក Anthony Galliano អគ្គនាយកក្រុមហ៊ុន CIM Holding បានឱ្យដឹងថា វិស័យបដិសណ្ឋារកិច្ច កំពុងធ្លាក់ចុះយ៉ាងរហ័ស ទោះបីមានការគាំទ្ររបស់រដ្ឋាភិបាលក៏ដោយ និងចាំបាច់ត្រូវមានផែនការស្ទុះងើបឡើងវិញ ដែលរួមបញ្ចូលទាំងការលើកទឹកចិត្តពន្ធដើម្បីជំរុញការវិនិយោគរយៈពេលវែង និងមាននិរន្តរភាព។
លោកថ្លែងថា៖ «រដ្ឋាភិបាលគួរតែពិចារណាចំពោះការអនុញ្ញាតឱ្យជនបរទេសអនុវត្តនៅក្នុងឧស្សាហកម្មប្រភេទនេះ ដែលបង្កើនចំនួនកំណត់ប្រាក់ចំណូលដល់ ៥០០ ០០០ ដុល្លារ និងការអនុញ្ញាតឱ្យក្រុមហ៊ុនទទួលខុសត្រូវមានកម្រិតជាមធ្យោបាយស្តារឧស្សាហកម្មឡើងវិញ ជំរុញការវិនិយោគ និងលើកកម្ពស់ភាពធន់នៅក្នុងឧស្សាហកម្មមួយ ដែលមានអត្រាធ្លាក់ចុះ ៦០ ភាគរយក្នុងរយៈពេលមួយល្អបំផុត»៕ LA
វីដេអូ៖