ភ្នំពេញៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានជំរុញ និងលើកទឹកចិត្តឱ្យមានការវិនិយោគលើការចិញ្ចឹមបង្កងទឹកសាបអូស្ត្រាលី ឬបង្កងតង្កៀបក្រហមនៅកម្ពុជាឱ្យបានកាន់តែច្រើន ដើម្បីរួមចំណែកធានាបរិមាណផ្គត់ផ្គង់ទីផ្សារក្នុងស្រុក និងឈានទៅនាំចេញនាពេលអនាគត ខណៈក្រសួងកសិកម្មនឹងសហការ សម្របសម្រួល ដើម្បីធ្វើឱ្យការវិនិយោគនេះទទួលបានជោគជ័យ។
ថ្លែងក្នុងពេលចុះពិនិត្យកសិដ្ឋានចិញ្ចឹមបង្កងទួលទន្លេជុំ ក្នុងស្រុកបារាយណ៍ ខេត្តកំពង់ធំ កាលពីថ្ងៃទី ២១ សីហា លោក វេង សាខុន ឱ្យដឹងថា បង្កងទឹកសាបអូស្ត្រាលី ឬបង្កងតង្កៀបក្រហម គឺជាប្រភេទបង្កងពូជថ្មីដែលការចិញ្ចឹមនៅកម្ពុជាមិនទាន់មានលក្ខណៈទូលំទូលាយ ហេតុនេះលោកលើកទឹកចិត្តឱ្យកសិដ្ឋានចិញ្ចឹមបង្កងទួលទន្លេជុំ ត្រូវខិតខំបន្តផលិតកូនបង្កង និងបង្កងសាច់ពូជថ្មីនេះឱ្យបានកាន់តែច្រើនដើម្បីឆ្លើយតបនឹងតម្រូវការទីផ្សារក្នុងស្រុក ក៏ដូចជាបញ្ចេញលក់កូនពូជឱ្យកសិករយកចិញ្ចឹមបន្ត។
លោកបន្តថា សកម្មភាពនេះដើរស្របតាមនឹងគោលនយោបាយអភិវឌ្ឍន៍វិស័យវារីវប្បកម្មរបស់រដ្ឋាភិបាលក្នុងការធានាសុវត្ថិភាពស្បៀង បង្កើនប្រាក់ចំណូល ជំរុញ និងបង្កើនផលិតកម្មផ្គត់ផ្គង់ឱ្យទីផ្សារក្នុងស្រុក ពិសេសក្នុងបរិបទនៃការរីករាលដាលជំងឺឆ្លងកូវីដ ១៩។
លោកបានថ្លែងថា៖ «ជាមួយនឹងសមិទ្ធផលដែលកសិដ្ឋានសម្រេចបានពេលនេះ ខ្ញុំសូមណែនាំឱ្យកសិដ្ឋានត្រូវខំពង្រីកសក្តានុពលចិញ្ចឹមបន្ថែមទៀត ដោយត្រូវសហការជាមួយនឹងរដ្ឋបាលជលផលធ្វើការបង្កាត់ពូជ និងពង្រីកដៃគូចិញ្ចឹមជាមួយកសិករ បង្កើនបរិមាណបង្កងក្នុងស្រុក ដើម្បីធានាបរិមាណផ្គត់ផ្គង់ឱ្យទីផ្សារនាពេលបច្ចុប្បន្ន»។
លោកបន្ថែមថា៖ «ក្រសួង ក៏ដូចជារដ្ឋបាលជលផលនឹងរង់ចាំសហការសម្របសម្រួលដើម្បីធ្វើឱ្យដំណើរការវិនិយោគការចិញ្ចឹមបង្កងអូស្ត្រាលីទទួលបានជោគជ័យ»។
ចាប់ផ្តើមសាកល្បងចិញ្ចឹមលើកដំបូងក្នុងឆ្នាំ ២០១៨ លើផ្ទៃដី ១៨ ហិកតា បច្ចុប្បន្នកសិដ្ឋានបង្កងទួលទន្លេជុំ មានអាងសម្រាប់បង្កាត់ពូជ ចំនួន ៦២ និងមានស្រះចំនួន ៦០ (ទំហំតូច-ធំ) ដោយមានបង្កង (មេ) ទឹកសាបពូជអូស្ត្រាលីចំនួនជាង ៦ ម៉ឺនក្បាល និងអាចផលិតកូនបង្កង បានចន្លោះពី ៥-១០ ម៉ឺនកូនក្នុង ១ ខែ។
ម្ចាស់កសិដ្ឋានបង្កងទួលទន្លេជុំ លោក តាន់ នរវិន្ទ បានប្រាប់ ភ្នំពេញ ប៉ុស្តិ៍ ក្នុងថ្ងៃទី ២៣ ខែសីហាថា បច្ចុប្បន្នការចិញ្ចឹមបង្កងសាច់ទឹកសាបអូស្ត្រាលី នៅប្រទេសកម្ពុជាស្ទើរតែមិនទាន់មាននៅឡើយទេ បើទោះបីផលិតផលនេះរំពឹងនឹងមានទីផ្សារខ្ពស់ក្នុងពេលឆាប់ៗ ជាពិសេសនៅពេលស្ថានភាពជំងឺកូវីដ ១៩ មានភាពធូរស្រាល។ លោកបន្តថា បង្កងទឹកសាបអូស្ត្រាលីនៅពេលនេះមានតម្លៃចន្លោះពី ១២-២៥ ដុល្លារក្នុង ១ គីឡូក្រាម ដោយអាស្រ័យទៅលើទំហំបង្កង។
លោកប្រាប់ថា៖ «ទោះតម្លៃអាចទទួលយកបានសម្រាប់អ្នកចិញ្ចឹម ក៏បរិមាណការផ្គត់ផ្គង់បង្កងប្រភេទនេះនៅទីផ្សារកម្ពុជានៅមានតិចតួចបំផុត ឬពេលខ្លះមិនមានតែម្តង»។
លោកលើកឡើងទៀតថា ជាមួយនឹងការលើកឡើងរបស់រដ្ឋមន្ត្រីក្រសួងកសិកម្ម កសិដ្ឋានរបស់លោកនឹងខិតខំពង្រីកការបង្កើតពូជកូន និងចិញ្ចឹមបង្កងយកសាច់ឱ្យបានកាន់តែច្រើន ដើម្បីចូលរួមជាមួយរដ្ឋាភិបាលក្នុងការបង្កើនសមត្ថភាពផលិតក្នុងស្រុក បង្កើតការងារថ្មីៗ។
ចាប់ពីខែកញ្ញាខាងមុខ កសិដ្ឋានបង្កងទួលទន្លេជុំ គ្រោងនឹងបញ្ចេញលក់បង្កងទឹកសាបអូស្ត្រាលីឱ្យបាន ៣០០ គីឡូក្រាមក្នុង ១ ខែ ហើយចំនួននេះនឹងកើនបន្ថែមទៀតចាប់ពីដើមឆ្នាំ ២០២២ តទៅ។ ធម្មតាគេត្រូវចំណាយពេល ៤ ខែ ដើម្បីអាចចាប់កូនបង្កងលក់បាន។ នេះបើតាមលោក នរវិន្ទ។
បើយោងតាម លោក នរវិន្ទ ផែនការរបស់កសិដ្ឋានលោកក៏នឹងបង្កើនការផលិតកូនបង្កងពូជ ពីចំនួន ៥-១០ ម៉ឺនក្បាលក្នុង ១ ខែឱ្យកើនដល់ ១-២ លាន នៅពេលឆាប់ៗ។
ទាក់ទងនឹងបញ្ហាហិរញ្ញវត្ថុ លោក នរវិន្ទ បានឱ្យដឹងថា ទោះពេលនេះកសិដ្ឋានលោកបញ្ចេញទុនវិនិយោគរហូតដល់ប្រហែល ៥០ ម៉ឺនដុល្លារហើយក៏ដោយ ក៏កសិដ្ឋាននៅតែមានបញ្ហាប្រឈមកង្វះទុនវិនិយោគបន្ថែមផងដែរ ដោយលោកស្នើឱ្យធនាគារអភិវឌ្ឍន៍ជនបទ និងកសិកម្ម ពិនិត្យលទ្ធភាពក្នុងការទម្លាក់កម្ចីសម្រាប់អាជីវកម្មនេះផង៕ LA