ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទ និងសមាគមមៀនប៉ៃលិន បាននិងកំពុងពន្លឿនការបើកទីផ្សារមៀនទៅកាន់ប្រទេសចិន ដោយរំពឹងថា កិច្ចការនេះនឹងឆាប់សម្រេចបាន ដើម្បីដោះស្រាយទីផ្សារផ្លែមៀន នារដូវប្រមូលផលឆ្នាំនេះ។
អនុប្រធានក្រុមប្រឹក្សាភិបាលសមាគមមៀនប៉ៃលិន លោក សួន ជុំ បានឱ្យដឹងថា ក្រសួងកសិកម្ម និងក្រសួងពាណិជ្ជកម្មបានដាក់សំណើចរចាជាមួយភាគីចិនរួចហើយ លើពិធីសារលក្ខខណ្ឌតម្រូវភូតគាមអនាម័យសម្រាប់ការនាំចេញមៀនប៉ៃលិន (តាង៉ែន) ស្រស់ និងក្លាស្សេទៅកាន់ប្រទេសចិន។
លោកឱ្យដឹងទៀតថា កម្ពុជាមានសមត្ថភាពគ្រប់គ្រាន់ក្នុងការផ្គត់ផ្គង់មៀនទៅកាន់ទីផ្សារប្រទេសចិន ខណៈរោងចក្រកែច្នៃមៀនបានកសាងរួចរាល់ហើយ។ រោងចក្រនេះ វិនិយោគដោយវិនិយោគិនចិន ដែលមានទុនវិនិយោគជិត ៥ លានដុល្លារនៅក្នុងខេត្តប៉ៃលិន។
លោកប្រាប់ថា៖ «រោងចក្រនេះនៅមិនទាន់ដំណើរការទេ ព្រោះយើងមិនទាន់មានច្បាប់អនុញ្ញាតឱ្យនាំចេញត្រង់ទៅចិន ដោយការចរចាលក្ខខណ្ឌភូតគាមអនាម័យជាមួយចិនកំពុងដំណើរការនៅឡើយ»។
លោកបន្ថែមថា រោងចក្រនេះមានសមត្ថភាពវេចខ្ចប់បានចំនួនរាប់រយតោនក្នុង ១ ថ្ងៃៗ ហើយរោងចក្រនេះអាចសម្ងួតមៀនបានប្រមាណ ៣០ តោនក្នុងរយៈពេល ១ ម៉ោង។
លោកនិយាយថា៖ «ក្រសួងកសិកម្មពិតជាបានខំប្រឹងប្រែងណាស់ក្នុងការបើកទីផ្សារមៀនប៉ៃលិននៅប្រទេសចិន យើងមើលទៅការបើកទីផ្សារមៀនទៅចិនជិតនឹងសម្រេចបានហើយ បើយើងពិនិត្យមើលទៅវាដល់ពេលវេលាហើយ»។
ទាក់ទងនឹងការបើកទីផ្សារ ក្រសួងពាណិជ្ជកម្មកម្ពុជាបានចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគីជាមួយចិន កាលពីថ្ងៃទី ១២ ខែ តុលា ឆ្នាំ ២០២០ ដែលកិច្ចព្រមព្រៀងនេះនឹងចូលជាធរមានក្នុងរយៈពេល ៣០ ថ្ងៃក្រោយ បន្ទាប់ពីរដ្ឋសភានៃប្រទេសទាំង ២ បានផ្តល់សច្ចាប័ន។
ផលិតផលផ្លែមៀន និងមុខទំនិញជាច្រើនទៀត ត្រូវភាគីចិនលុបចោលពន្ធនាំចូលទាំងស្រុង (ពន្ធគយសូន្យ)។
កាលពីសប្តាហ៍ទី ២ ខែសីហា កសិករដាំផ្លែមៀនប៉ៃលិន និងក្រុមឈ្មួញនាំចេញទៅប្រទេសថៃបានជួបនឹងបញ្ហាទីផ្សារយ៉ាងខ្លាំង ដែលបណ្តាលមកពីប្រទេសថៃ សម្រេចបញ្ឈប់ការទិញផ្លែមៀនពីកម្ពុជាទាំងស្រុង ក្រោយពីប្រទេសចិន សម្រេចឈប់ឱ្យប្រទេសថៃនាំចូលទៅប្រទេសខ្លួន។
បើតាមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បច្ចុប្បន្នការដាំមៀនប៉ៃលិនកំពុងកើនឡើងគួរឱ្យកត់សម្គាល់ដោយមានផ្ទៃដីដាំជាង ១៣ ៦០៨ ហិកតា នៅទូទាំងប្រទេស ហើយភាគច្រើនដាំនៅខេត្តប៉ៃលិន បាត់ដំបង និងខេត្តបន្ទាយមានជ័យ។ ក្នុងនោះផ្ទៃដីជិត ៧ ពាន់ហិកតាកំពុងប្រមូលផលនៅឆ្នាំនេះ ដែលនឹងផ្តល់ប្រមាណ ១១ ម៉ឺនតោន។
តាង៉ែនផ្តល់ផលជាមធ្យមពី ៧៣០ តោន ក្នុង ១ ហិកតា អាស្រ័យលើការថែទាំ៕ LA
វីដេអូ៖