ភ្នំពេញៈ ប្រទេសកម្ពុជាស្ថិតក្នុងចំណោមប្រទេសអភិវឌ្ឍន៍តិចតួចបំផុត (LDC) ទាំង ២៩ ដែលទទួលបានហិរញ្ញប្បទានពីកញ្ចប់មូលនិធិ ៦៥០ ពាន់លានដុល្លាររបស់មូលនិធិរូបិយវត្ថុអន្តរជាតិ (IMF) សម្រាប់ធ្វើឱ្យសេដ្ឋកិច្ចស្ទុះងើបឡើងវិញ ដែលបណ្តាលមកពីការញាំញីដោយការរីករាលដាលកូវីដ-១៩ ជាពិសេសវីរុសវ៉ារ្យង់ថ្មី។
លោកស្រី Kristalina Georgieva នាយកគ្រប់គ្រងមូលនិធិរូបិយវត្ថុអន្តរជាតិ (IMF) កាលពីថ្ងៃទី ២៣ ខែសីហា បានចាប់ផ្តើមការបែងចែកចំនួនច្រើនបំផុតនៃសិទ្ធិដកប្រាក់ជាពិសេស (SDRs) នៅក្នុងប្រវត្តិសាស្ត្រប្រហែល ៦៥០ ពាន់លានដុល្លារអាមេរិក។ ការបែងចែកទុកនេះ គឺជាការលើកទឹកចិត្តដ៏សំខាន់មួយសម្រាប់ពិភពលោក ហើយវាជាឱកាសពិសេសដើម្បីប្រយុទ្ធប្រឆាំងនឹងវិបត្តិដែលមិនធ្លាប់មានពីមុន។
លោកស្រីបានលើកឡើងថា SDRs កំពុងត្រូវបានចែកចាយទៅឱ្យប្រទេសជាច្រើននៅក្នុងសមាមាត្រទៅនឹងចំណែកកូតារបស់ពួកគេក្នុង IMF។ មានន័យថា ប្រហែល ២៧៥ ពាន់លានដុល្លារនឹងត្រូវផ្ដល់ឱ្យប្រទេសកំពុងអភិវឌ្ឍន៍ដោយក្នុងចំណោមនោះបណ្ដាប្រទេសមានប្រាក់ចំណូលទាបនឹងបានទទួលប្រហែល ២១ ពាន់លានដុល្លារស្មើនឹង ៦ ភាគរយនៃផលិតផលក្នុងស្រុកសរុប (GDP) ក្នុងករណីមួយចំនួន។
លោកស្រីថ្លែងថា៖ «ការបែងចែក SDR នឹងផ្ដល់សន្ទនីយភាពបន្ថែមដល់ប្រព័ន្ធសេដ្ឋកិច្ចពិភពលោក ដែលបន្ថែមទុនបម្រុងរូបិយប័ណ្ណបរទេសរបស់ប្រទេសនានា និងកាត់បន្ថយការពឹងផ្អែករបស់ពួកគេទៅលើបំណុលក្នុងស្រុក ឬក្រៅប្រទេសដែលមានតម្លៃកាន់តែខ្ពស់។ បណ្ដាប្រទេសទាំងនោះអាចប្រើប្រាស់លម្ហដែលបានផ្ដល់ដោយការបែងចែក SDR ដើម្បីគាំទ្រសេដ្ឋកិច្ចរបស់ពួកគេ និងបង្កើនល្បឿនការប្រយុទ្ធប្រឆាំងនឹងវិបត្តិរបស់ពួកគេ»។
លោកស្រីអះអាងថា៖ «ការបែងចែក SDR គឺជាសមាសធាតុដ៏សំខាន់នៃកិច្ចខំប្រឹងប្រែងទូលំទូលាយរបស់ IMF ដើម្បីគាំទ្រដល់ប្រទេសជាច្រើន តាមរយៈការរីករាលដាលជំងឺដែលរួមមាន ១១៧ ពាន់លានដុល្លារជាហិរញ្ញប្បទានថ្មីសម្រាប់ប្រទេសចំនួន ៨៥ បន្ធូរបន្ថយសេវាបំណុលសម្រាប់ប្រទេសមានប្រាក់ចំណូលទាបចំនួន ២៩ (រួមទាំងកម្ពុជា) និងដំបូន្មានគោលនយោបាយ និងការគាំទ្រការអភិវឌ្ឍសមត្ថភាពដល់ប្រទេសជាង ១៧៥ ដើម្បីជួយធានានូវការស្ទុះងើបឡើងវិញដ៏រឹងមាំ និងមានស្ថិរភាព»។
កាលពីថ្ងៃទី ២ សីហា IMF បានអនុម័តជំនួយឥតសំណង ២៤០ លានដុល្លារដល់ប្រទេសកម្ពុជា ដើម្បីស្តារសេដ្ឋកិច្ចឡើងវិញពីផលប៉ះពាល់ដែលបណ្តាលពីការរីករាលដាលកូវីដ ១៩។
លោកស្រី Lim Solinn នាយកប្រចាំប្រទេសរបស់អង្គការ Oxfam Cambodia បានឱ្យដឹងកាលពីថ្ងៃទី ១១ ខែសីហាថា៖ «SDR ថ្មីនឹងជួយដល់បណ្ដាប្រទេសកំពុងអភិវឌ្ឍន៍រួមទាំងកម្ពុជា ដើម្បីជម្នះនឹងផលប៉ះពាល់ដោយសារជំងឺកូវីដ ១៩ និងស្ដារសេដ្ឋកិច្ចខ្លួនឡើងវិញ»។
លោកស្រីលើកឡើងថា រដ្ឋាភិបាលបានខិតខំយ៉ាងខ្លាំងដើម្បីទប់ស្កាត់ការឆ្លងវីរុស និងគាំទ្រដល់ប្រជាជនដែលងាយទទួលរងគ្រោះ ព្រមទាំងជម្នះនឹងការខាតបង់ជីវភាពរស់នៅរបស់ពួកគេជាមួយនឹងកម្មវិធីផ្ទេរសាច់ប្រាក់ជាប្រវត្តិសាស្ដ្ររបស់ខ្លួន។
លោកស្រីបន្តថា រដ្ឋាភិបាលបន្តធ្វើការងារប្រកបដោយតម្លាភាព ជាមួយអង្គការសង្គមស៊ីវិល ដើម្បីធានាថាហិរញ្ញប្បទានដែលមិនមានបំណុលនេះត្រូវបានប្រើប្រាស់ ដើម្បីផ្ដល់អត្ថប្រយោជន៍ដល់ប្រជាជនកម្ពុជាទាំងអស់ដែលរងផលប៉ះពាល់ដោយជំងឺកូវីដ ១៩។
SDR គឺជាទ្រព្យសកម្មទុនបម្រុងអន្តរជាតិមួយដែលបានបង្កើតឡើងដោយ IMF ដើម្បីបំពេញបន្ថែមទុនបម្រុងផ្លូវការរបស់ប្រទេសជាសមាជិកខ្លួន។ SDR មិនមែនជារូបិយប័ណ្ណទេ ប៉ុន្តែវាគឺជាប្រាក់សំណងដ៏មានសក្តានុពលលើរូបិយប័ណ្ណដែលអាចប្រើបានដោយសេរីរបស់សមាជិក IMF។ ក្រុមរូបិយប័ណ្ណកំណត់ SDR គឺជាប្រាក់ដុល្លារអាមេរិក អឺរ៉ូ ប្រាក់យន់ចិន ប្រាក់យ៉េនជប៉ុន និងប្រាក់ផោន របស់អង់គ្លេស៕ LA