ភ្នំពេញៈ ការនាំចេញទំនិញពីកម្ពុជាទៅប្រទេសកូរ៉េខាងត្បូងរយៈពេល ៧ ខែដើមឆ្នាំ ២០២១ មានតម្លៃជាង ១៨៨ លានដុល្លារ កើនឡើងតិចតួចធៀបនឹងរយៈពេលដូចគ្នាឆ្នាំ ២០២១ ខណៈពាណិជ្ជកម្មទ្វេភាគីមានតម្លៃសរុប ៥៥២,១ លានដុល្លារ កើនឡើង ១០,៦ ភាគរយ។ នេះបើយោងតាមទិន្នន័យពីសមាគមពាណិជ្ជកម្មអន្តរជាតិកូរ៉េ (Kita)។
ទិន្នន័យបង្ហាញថា ចាប់ពីខែមករា ដល់ខែកក្កដា ទំនិញដែលកម្ពុជានាំទៅប្រទេសកូរ៉េមានតម្លៃ ១៨៨,២ លានដុល្លារ កើនឡើង ០,២ ភាគរយពីចំនួន ១៨៧,៨ លានដុល្លារក្នុងរយៈពេលដូចគ្នាឆ្នាំ ២០២០។ ចំណែកការនាំចូលទំនិញពីប្រទេសកូរ៉េមានតម្លៃ ៣៦៤ លានដុល្លារ កើន ១៧,២ ភាគរយពីចំនួន ៣១០,៩៤ លានដុល្លារ។
សម្រាប់ការធ្វើពាណិជ្ជកម្មទ្វេភាគីក្នុងអំឡុងខាងលើមានតម្លៃ ៥៥២,១ លានដុល្លារ កើនពី ៤៩៨,៧៥ លានដុល្លារ ឬស្មើនឹង ១០,៦ ភាគរយ។
ដោយឡែកក្នុងខែកក្កដា ឆ្នាំ ២០២១ ទំហំពាណិជ្ជកម្មសរុបរវាងភាគីទាំង ២ មានតម្លៃសរុប ១០០,៧២ លានដុល្លារ ក្នុងនោះការនាំចេញពីកម្ពុជាមានតម្លៃ ២៨,៨២ លានដុល្លារ កើនឡើង ១១,៩ ភាគរយធៀបខែកក្កដា ឆ្នាំ ២០២០ និងនាំចូលមានតម្លៃ ៧២ លានដុល្លារ កើន ៤៥,៥ ភាគរយ។
ទំនិញសំខាន់ៗដែលកម្ពុជានាំទៅប្រទេសកូរ៉េខាងត្បូង ភាគច្រើនជាសម្លៀកបំពាក់ ស្បែកជើង ផលិតផលធ្វើដំណើរ ភេសជ្ជៈ គ្រឿងអេឡិចត្រូនិក គ្រឿងបន្លាស់ កៅស៊ូ ថ្នាំពេទ្យ និងផលិតផលកសិកម្ម ហើយកម្ពុជានាំចូលមកវិញរួមមាន យានយន្ត គ្រឿងអេឡិចត្រូនិក សម្ភារផ្ទះបាយ ភេសជ្ជៈ ថ្នាំពេទ្យ ផលិតផលវត្ថុធាតុដើម និងផលិតផលប្លាស្ទិក ជាដើម។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ភ្នំពេញ-ប៉ុស្តិ៍ក្នុងថ្ងៃទី ២៤ ខែសីហា ថាការកើនឡើងព្រមគ្នានៃចំនួនទឹកប្រាក់នាំចេញរបស់ភាគីទាំង ២ គឺជាសញ្ញាល្អ ខណៈកំណើននេះត្រូវរំពឹងថានឹងមានសម្ទុះខ្លាំងនៅពេលប្រទេសទាំង ២ ផ្តល់សច្ចាប័នលើកិច្ចព្រមព្រៀងពាណិជ្ជកម្មសេរីទ្វេភាគី (FTA) ដែលភាគីទាំង ២ បានបញ្ចប់ការចរចាកាលពីដើមឆ្នាំ ២០២១ នេះ។
លោកបន្តថា ដោយឡែកសម្រាប់ចំនួនទឹកប្រាក់ដែលកូរ៉េ នាំចូលមកកម្ពុជាច្រើនជាងកម្ពុជានាំចេញនោះ វាមិនមែនជារឿងបារម្ភទេ ព្រោះផលិតផលនាំចូលពីប្រទេសកូរ៉េភាគច្រើនជាវត្ថុធាតុដើម ឬជាគ្រឿងបង្គុំសម្រាប់ចូលរួមក្នុងចង្វាក់ផលិតកម្ម ដើម្បីផលិត ឬកែច្នៃនាំចេញទៅទីផ្សារប្រទេសនានាលើពិភពលោក។
លោកថ្លែងថា៖ «អ្វីដែលជាក្តីបារម្ភនោះ គឺយើងមិនមានប្រាក់គ្រប់គ្រាន់ដើម្បីនាំចូលវត្ថុសំខាន់ៗសម្រាប់ទ្រទ្រង់ដល់ការផលិត និងនាំចេញទៅទីផ្សារអន្តរជាតិ»។
ជាមួយគ្នានេះ លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិវិទ្យាស្ថានទំនាក់ទំនងអន្តរជាតិនៃកម្ពុជា (បណ្ឌិត្យសភាកម្ពុជា) បាននិយាយថា ទំហំពាណិជ្ជកម្មរបស់ភាគីទាំង ២ កើនដូចគ្នា គ្រាន់តែចំនួនទឹកប្រាក់ និងអត្រាកំណើនគិតជាភាគរយរបស់ភាគីកូរ៉េ មានសញ្ញាល្អជាង។ លោកបន្ថែមថា តាមរយៈទិន្នន័យខាងលើទឹកប្រាក់ដែលកម្ពុជានាំចេញធៀបនឹងភាគីកូរ៉េ គឺមានអតុល្យភាពប្រមាណជិត ៥០ ភាគរយ ដែលទាមទារឱ្យកម្ពុជាត្រូវខិតខំបន្ថែមទៀតក្នុងការធ្វើពិពិធកម្មផលិតផលនាំចេញរបស់ខ្លួន ជាពិសេសដើម្បីត្រៀមនៅពេលកិច្ចព្រមព្រៀងពាណិជ្ជកម្មសេរីទ្វេភាគីចូលជាធរមាន។
លោកលើកឡើងថា៖ «ដើម្បីកាត់បន្ថយគម្លាតចំនួនទឹកប្រាក់នាំចេញនេះ កម្ពុជាគួរពិចារណាបន្ថែមទៀតក្នុងការបង្កើនកិច្ចសហប្រតិបត្តិការជាមួយភាគីពាក់ព័ន្ធទាំងក្នុងស្រុក និងនៅប្រទេសកូរ៉េ ដើម្បីសិក្សាពីលទ្ធភាពរបស់ផលិតផលកម្ពុជាដែលអាចនាំចេញទៅប្រទេសកូរ៉េ»។
យោងតាម Kita ក្នុងឆ្នាំ ២០២០ ពាណិជ្ជកម្មទ្វេភាគីរវាងកម្ពុជា និងកូរ៉េសម្រេចបានក្នុងទឹកប្រាក់ ៨៨៤,៨៨ លានដុល្លារ ធ្លាក់ ១៧,៧៧ ភាគរយធៀបឆ្នាំ ២០១៩ ដែលមាន ១ ០៣២ លានដុល្លារ ក្នុងនោះកម្ពុជានាំចេញទៅកូរ៉េតម្លៃជាង ៣១៧ លានដុល្លារធ្លាក់ចុះ ៥,៤ ភាគរយ ចំណែកការនាំចូលមានជាង ៥៦៧ លានដុល្លារធ្លាក់ចុះ ១៨,៦ ភាគរយ៕ LA