.jpg)
SINET ចាប់ដៃគូជាមួយ Juniper Network ដើម្បីកែលម្អហេដ្ឋារចនាសម្ព័ន្ធបណ្ដាញ ការបង្កើនល្បឿន និងការប្រើប្រាស់។ ហុង មិនា
ភ្នំពេញៈ SINET ដែលជាក្រុមហ៊ុនផ្គត់ផ្គង់សេវាអ៊ីនធឺណិត និងទូរគមនាគមន៍នៅកម្ពុជាបានប្រកាសកាលពីថ្ងៃទី ២៣ ខែសីហា នូវភាពជាដៃគូរយៈពេលវែងជាមួយក្រុមហ៊ុន Juniper Network ដែលជាបណ្ដាញបច្ចេកវិទ្យាបញ្ញាសិប្បនិម្មិត (AI) ឈានមុខលំដាប់ពិភពលោក ដើម្បីកែលម្អហេដ្ឋារចនាសម្ព័ន្ធបណ្ដាញរបស់ខ្លួន ការបង្កើនល្បឿន និងការប្រើប្រាស់ដំណោះស្រាយទំនើបៗឆ្លើយតបនឹងកំណើនរហ័សនៃប្រព័ន្ធបច្ចេកវិទ្យានៅកម្ពុជា។
ជាមួយនឹងវត្តមានជិត ២០ ឆ្នាំនៅកម្ពុជា SINET បានបង្ហាញដំណោះស្រាយបណ្តាញថ្មីជាបន្តបន្ទាប់ ដើម្បីធ្វើឱ្យមានភាពងាយស្រួលក្នុងការតភ្ជាប់ និងផ្តល់ភាពងាយស្រួលដល់អាជីវកម្មនៅប្រទេសកម្ពុជា។ បច្ចុប្បន្នក្រុមហ៊ុនមានប្រតិបត្តិការបណ្ដាញតភ្ជាប់ដ៏សកម្មជាង ២០០ ដែលផ្ដល់ការតភ្ជាប់អ៊ីនធឺណិតរហ័ស និងអាចទុកចិត្តបានដល់ក្រុងសំខាន់ៗ និងខេត្តក្រុងជាច្រើន ព្រមទាំងភូមិស្រុកឆ្ងាយដាច់ស្រយាលផងដែរ។
លោក ដៀប គង់ ប្រធានផ្នែកបច្ចេកទេសក្រុមហ៊ុន SINET បានប្រាប់ថា បទពិសោធខ្ពស់របស់ Juniper នឹងរួមចំណែកសម្រាប់ការធ្វើឱ្យប្រសើរឡើងបណ្ដាញក្រុមហ៊ុនរបស់លោក ហើយក៏ដើម្បីឆ្លើយតបតម្រូវការកើនឡើងនៅកម្ពុជាដែរ។
លោកបានថ្លែងថា៖ «យើងរីករាយក្នុងការពង្រឹងភាពជាដៃគូយូរអង្វែងជាមួយ Juniper Networks។ ការធ្វើឱ្យប្រសើរឡើងហេដ្ឋារចនាសម្ព័ន្ធបណ្ដាញទាំងនេះបានរៀបចំសម្រាប់ការទទួលជោគជ័យ»។
លោកបន្ថែមថា៖ «ជាមួយបណ្តាញដែលមានស្ថិរភាព និងសុវត្ថិភាព ដែលបានដាក់ឱ្យដំណើរការដោយដំណោះស្រាយដ៏ទំនើប យើងនឹងបន្តផ្ដល់ការសន្យាក្នុងការផ្ដល់អំណាចដល់អាជីវកម្ម និងគាំទ្រដំណើរផ្លូវរបស់ប្រទេសកម្ពុជាឆ្ពោះទៅរកគំរូថ្មីនៃកំណើនសេដ្ឋកិច្ច ដែលបានបង្កើតឡើងដោយឈរលើមូលដ្ឋាននៃសេដ្ឋកិច្ចឌីជីថលដែលកំពុងរីកចម្រើន»។
លោក Perry Sui នាយកជាន់ខ្ពស់ក្រុមហ៊ុន Juniper Networks ទទួលបន្ទុកតំបន់អាស៊ី និងកោះតៃវ៉ាន់ឱ្យដឹងថា តាមរយៈការផ្ដល់នូវដំណោះស្រាយបណ្ដាញដែលអាចបត់បែនបាន និងងាយស្រួលផ្លាស់ប្តូរ លោកជឿថានឹងអាចគាំទ្រកំណើនជាបន្តរបស់ក្រុមហ៊ុន SINET និងដើម្បីជួយផ្ដល់ការតភ្ជាប់ប្រតិបត្តិការខ្ពស់ដល់សហគមន៍ឌីជីថលដ៏សកម្មនៅតំបន់ទីក្រុង និងជនបទ។
លោក Perry លើកឡើងថា៖ «វាជាកិត្តិយសមួយដែលត្រូវបានជ្រើសរើសដោយក្រុមហ៊ុនមួយក្នុងចំណោមក្រុមហ៊ុនផ្តល់សេវាបណ្តាញអ៊ីនធឺណិតធំជាងគេជាច្រើនរបស់កម្ពុជា ហើយយើងមានក្តីរីករាយក្នុងការផ្តល់អំណាចដល់ SINET ក្នុងការតភ្ជាប់អ្នកប្រើប្រាស់រាប់លាននាក់តាមរយៈបណ្តាញសាមញ្ញរហ័ស និងអាចទុកចិត្តបាន»។
ទិន្នន័យចុងក្រោយពីនិយតករទូរគមនាគមន៍កម្ពុជា (TRC) បង្ហាញថា គិតត្រឹមខែឧសភា ឆ្នាំ ២០២០ ចំនួនការជាវទូរស័ព្ទចល័តដ៏សកម្មពីប្រតិបត្តិករទាំង ៦ របស់កម្ពុជាមាន ២០ ៤៨១ ០៥១ ធ្លាក់ចុះ ០,០៨ ភាគរយធៀបនឹងរយៈពេលដូចគ្នាកាលពីឆ្នាំមុន។ តួលេខនេះគឺស្មើនឹង ១២៤,០៩ ភាគរយនៃចំនួនប្រជាជនសរុប៕ LA
