ភ្នំពេញៈ លោក អ៊ូក សោភ័ណ ឯកអគ្គរាជទូតកម្ពុជាប្រចាំទីក្រុងបាងកកបានប្រាប់មេដឹកនាំធុរកិច្ចរបស់ប្រទេសកម្ពុជា ឡាវ មីយ៉ាន់ម៉ា វៀតណាម និងថៃ (CLMVT) ថា រដ្ឋាភិបាលកម្ពុជាបានធ្វើកំណែទម្រង់សេដ្ឋកិច្ចស៊ីជម្រៅនៅចំពេលមានការរីករាលដាលជំងឺកូវីដ ១៩ ដើម្បីរក្សាកំណើនសេដ្ឋកិច្ចក្នុងរយៈពេលវែងរបស់ខ្លួន។
ការលើកឡើងនេះបានធ្វើក្នុងវេទិកា CLMVT Forum 2021 ក្រោមប្រធានបទ «ការបង្កើនល្បឿនការស្ទុះងើបឡើងវិញដ៏រឹងមាំ» ដែលរៀបចំដោយក្រសួងពាណិជ្ជកម្មប្រទេសថៃ កាលពីថ្ងៃទី ២៤ ខែសីហា។
លោកបានឱ្យដឹងថា កម្ពុជាបានធ្វើកំណែទម្រង់ និងវិធានការផ្តោតការយកចិត្តទុកដាក់ជាបន្តបន្ទាប់ ដែលរួមមាន ការបង្ហាញច្បាប់វិនិយោគថ្មី ការធានាឥណទានរបស់រដ្ឋាភិបាល ការអនុម័តច្បាប់ពាណិជ្ជកម្មអេឡិចត្រូនិក សេចក្តីព្រាងច្បាប់ស្តីពីភាពជាដៃគូសាធារណៈឯកជន ការចុះឈ្មោះអាជីវកម្មអនឡាញ និងគំនិតផ្តួចផ្តើមសេដ្ឋកិច្ចឌីជីថល ជាដើម។
បន្ថែមពីលើនេះ លោកក៏បានលើកឡើងថា រដ្ឋាភិបាលក៏បានដាក់ចេញនូវការទូតសេដ្ឋកិច្ច ចាប់ពីឆ្នាំ ២០១៨ ហើយបន្ទាប់មកគឺការអនុម័ត «យុទ្ធសាស្ដ្រការទូតសេដ្ឋកិច្ច (EDS)» កាលពីដើមឆ្នាំនេះ ដែលសំដៅផ្លាស់ប្តូរការទូតធម្មតា ទៅជាការទូតប្រភេទថ្មី និងរឹងមាំ ដើម្បីជំរុញការផ្លាស់ប្តូរពាណិជ្ជកម្មអន្តរជាតិ ការវិនិយោគផ្ទាល់ពីបរទេស ទេសចរណ៍ វប្បធម៌ និងកីឡា តាមរយៈការប្រែក្លាយបញ្ហាប្រឈមទៅជាកាលានុវត្តភាព។
លោកថ្លែងថា៖ «ទាំងនេះមានគោលបំណង ដើម្បីលើកកម្ពស់សមត្ថភាពប្រកួតប្រជែង ជួយសម្រួលបរិយាកាសអំណោយផលសម្រាប់ធុរកិច្ច និងការវិនិយោគនៅក្នុងប្រទេស»។
លោកបន្ថែមទៀតថា ពេលនេះរដ្ឋាភិបាលកម្ពុជាក៏កំពុងត្រៀមដាក់ចេញផែនការស្ទុះងើបឡើងវិញនៃសេដ្ឋកិច្ចឆ្នាំ ២០២១-២០២៣ ដើម្បីលើកស្ទួយសេដ្ឋកិច្ចចេញផុតពីវិបត្តិកូវីដ ១៩។
លោកបានអះអាងថា៖ «រដ្ឋាភិបាលប្ដេជ្ញាចិត្តនឹងប្រែក្លាយវិបត្តិនេះទៅជាកាលានុវត្តភាពសម្រាប់កំណើនក្នុងអំឡុង និងក្រោយដំណាក់កាលកូវីដ-១៩ ដើម្បីបង្កើតប្រព័ន្ធសង្គមសេដ្ឋកិច្ចកាន់តែរឹងមាំមួយដែលធន់នឹងវិបត្តិអាចកើតឡើងនៅពេលអនាគត»។
កាលពីសប្ដាហ៍មុន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានលើកឡើងថា វិបត្តិជំងឺកូវីដ ១៩ បានបំផ្លាញសេដ្ឋកិច្ចនៅជុំវិញពិភពលោករួមទាំងកម្ពុជា។ ទោះយ៉ាងណាកម្ពុជាកំពុងរៀបចំយុទ្ធសាស្ត្រអាទិភាពចំនួន ៣ ដើម្បីប្រែក្លាយសេដ្ឋកិច្ចឆ្ពោះទៅកំណើនខ្ពស់តាមរយៈការស្ទុះងើបឡើងវិញនៃសេដ្ឋកិច្ច, ការកែទម្រង់ និងការបង្កើតភាពធន់។
លោកថ្លែងថា៖ «ទោះស្ថានការណ៍សង្គមសេដ្ឋកិច្ចពិភពលោកនៅតែមានភាពមិនច្បាស់លាស់ដោយសារកូវីដ-១៩បន្តពេលកាន់តែយូរ កម្ពុជាក៏អាចមានឱកាសមួយចំនួនផងដែរ»។
ការផ្ទុះឡើងការឆ្លងក្នុងសហគមន៍ ២០ កុម្ភៈ គួបផ្សំនឹងការមកដល់របស់វីរុសវ៉ារ្យង់ Delta និងការកើនឡើងករណីឆ្លងនាំចូលនៅពេលថ្មីៗបានជំរុញឱ្យកម្ពុជាកែតម្រូវការព្យាករកំណើនសេដ្ឋកិច្ចខ្លួនឆ្នាំ ២០២១ មកនៅត្រឹម ២,៤ ភាគរយធ្លាក់ចុះពី ៤,០ ភាគរយកាលពីដើមឆ្នាំ។ នេះបើតាមក្រសួងសេដ្ឋកិច្ច៕ LA