ទីក្រុងសេអ៊ូលៈ ធនាគារកណ្តាលកូរ៉េខាងត្បូងបានបង្កើនអត្រាការប្រាក់នៅថ្ងៃព្រហស្បតិ៍នេះដែល ជាវិធានការលើកដំបូងនៃប្រទេសសេដ្ឋកិច្ចធំត្រូវធ្វើ ចាប់តាំងពីការចំណាយលើប្រាក់កម្ចីត្រូវបានកាត់បន្ថយដល់កម្រិតទាបជាប្រវត្តិសាស្ត្រក្នុងបុព្វហេតុនៃការរីករាលដាលវីរុសកូរ៉ូណា។
ធនាគារកូរ៉េបានបង្កើនអត្រាគោលចំនួន ២៥ ពិន្ទុ ដល់ ០,៧៥ ភាគរយ បន្ទាប់ពីកិច្ចប្រជុំផ្នែកគោលនយោបាយពេលដែលប្រទេសនេះព្យាយាមគ្រប់គ្រងកំណើនបំណុលតាមគ្រួសារកំពុងកើនឡើង និង ទីផ្សារលំនៅឋានដែលគួរឱ្យចាប់អារម្មណ៍។
ប្រទេសមួយចំនួនតូចបានចាប់ផ្តើមបង្កើនអត្រាការប្រាក់ឡើងវិញមានដូចជា ប្រទេស ប្រេស៊ីល រុស្ស៊ី ឈីលី និង ម៉ិចស៊ិក ហើយ អ្នកវិនិយោគនៅជុំវិញពិភពលោកកំពុងតាមដានយ៉ាងដិតដល់សម្រាប់ពេលវេលាដែលធនាគារកណ្តាលអាមេរិកនឹងចាប់ផ្តើមកាត់បន្ថយកម្មវិធីជំនួយជំរុញសេដ្ឋកិច្ចដ៏សម្បើម។
កូរ៉េខាងត្បូង ជាប្រទេសដែលមានសេដ្ឋកិច្ចធំបំផុតលំដាប់ទី ១២ ក្នុងពិភពលោកបានរក្សាអត្រាគោលរបស់ខ្លួន កម្រិតទាបក្នុងកំណត់ត្រា ដល់ ០,៥ ភាគរយចាប់តាំងពីខែឧសភាឆ្នាំ ២០២០។
ការសម្រេចនេះជាអត្រាកើនឡើងដំបូងបំផុតចាប់តាំងពីខែវិច្ឆិកាឆ្នាំ ២០១៨ និង កើតមានឡើង ពេលដែលអាជ្ញាធរហិរញ្ញវត្ថុជម្នះជាមួយបំណុលតាមគ្រួសារកើនឡើង ហើយទីផ្សារលំនៅឋានកើនឡើងខ្លាំង ដែលអ្នកវិភាគព្រមានថា អាចគំរាមកំហែងសេ្ថរភាពសេដ្ឋកិច្ច។
បំណុលតាមគ្រួសាររបស់កូរ៉េខាងត្បូងបានកើនឡើង ៤១,២ ពាន់ពាន់លានវ៉ុន (៣៥៣ ពាន់លានដុល្លារ) អំឡុងពេលខែមេសា ដល់ខែមិថុនា ដល់កម្រិតខ្ពស់បំផុត ១ ៨០៦ ពាន់ពាន់លានវ៉ុន ដែលស្ទើរសមមូលទៅនឹងផលិតផលក្នុងស្រុកសរុបរបស់ប្រទេសទៅហើយ។
ធនាគារកូរ៉េបានអះអាងថា៖ «កំណើនកម្ចីតាមគ្រួសារមានល្បឿនលឿន ហើយតម្លៃលំនៅឋានបន្តងើបឡើងយ៉ាងរហ័សក្នុងគ្រប់តំបន់ក្នុងប្រទេស»៕ RR